ߞߊ߲ߞߊ߲߫: ߒߞߏ ߘߏ߲߬ߞߏ ߟߎ߫ ߞߊ߬ ߛߊߟߌߡߊߝߏ߫ ߓߊߘߏߓߊ߫ ߟߋ߬ ߞߍ߫ ߢߌ߬ߣߊ߲߬ ߛߎ߲ߞߊߙߏ߫ ߛߊߟߌ ߢߌ߲߬ ߡߊ߬
ߓߌ߬ ߞߎߣߎ߲ߟߏ߲ ߣߌ߲߬ ߡߊ߬ ߞߏ߲ߞߏߘߌ߬ߓߌ ߕߋ߬ߟߋ߫ ߂ /߂߀߂߅.
ߒߞߏ߫ ߘߏ߲߬ߖߟߎ߬ߡߊ߬ߘߊ ߡߍ߲ ߕߐ߯ ߞߏ߫ "ߛߍ߲ߓߊ߮" ߸ ߏ߬ ߟߋ߬ ߣߐ߬ ߒߞߏߡߐ߮ ߓߍ߯ ߟߊߘߍ߬ ߟߊ߫ ߛߓߏ߬ ߢߌߡߌ߲ ߘߏ߫ ߡߊ߬ ߞߓߊߘߊ ߞߌ߲߬ߘߊ ߁߭ ߟߊ߫߸ ߡߍ߲ ߓߎ߲ߓߎ߲ߣߍ߲߫ ߕߍ߬ߘߍ߫ ߓߊ߬ߘߏ߬ߢߐ߲߰ߦߊ ߡߵߊ߬ߟߎ߫ ߜߊ߲߬ߛߊ߲ ߣߌ߫ ߢߐ߲߮ ߕߍ߫߸ ߞߊ߬ ߓߍ߲߬ ߒߞߏ ߟߊ߫ ߛߌߣߌ߲ߢߍߛߌ߮ ߓߟߏߘߐߓߍ߲ ߡߊ߬: ߓߍ߲߬ ߞߎ߲ߘߊ߫߸ ߛߌ߲߬ߝߏ߲߬ߧߊ߬ߟߌ߬ ߞߎ߲ߘߊ߫߸ ߣߊ߲߬ߝߟߏ߬ ߞߎ߲ߘߊ߫߸ ߊ߬ ߣߌ߫ ߞߎ߲߬ߠߞߊ߬ߟߌ߬ ߞߎ߲ߘߊ߫. ߏ߬ ߟߋ߬ ߣߐ߬ ߊ߬ ߞߎߡߊ߫ ߞߍߟߊ ߟߎ߬ ߓߎ߲ߓߎ߲߫ ߠߊ߫ ߡߐ߰ ߞߟߊ߬ߒ߬ߞߋ߬ ߣߊ߯ߣߌ߲߫ ߡߊ߬ ߕߊ߲߬ߘߐ: ߓߊߛߓߊ߬ߕߌ߫ ߛߘߌ߬ߓߋ߫ (ߛߍ߲ߓߊ߫ ߞߊ߲ߕߌ߮)߸ ߣߊ߲߬ߝߏ߯ ߌߛߎ߬ߡߊ߬ߌ߯ߟߊ߫ ߖߊ߰ߓߌ߬ (ߖߘߍ߬ߞߟߏ߬ߓߊ߰ߦߊ ߢߍߓߊ߮)߸ ߞߏߕߍߓߊ߲߫ ߞߡߊ߬ߙߊ߬ (ߒߞߏ ߘߊ߲ߘߊߟߌߟߊ)߸ ߊߡߊߘߎ߫ ߞߊ߲ߕߍ߫ (ߛߌ߲ߘߌߓߊ߮ ߡߏߦߌߝߋ߲ ߘߏ߫)...
ߟߊ߬ߘߍ ߞߐ߬ߣߌ߲ ߢߣߊߓߊ߯ߦߊߓߊ߮ ߞߊ߫ ߛߌߦߊ߫ ߕߘߍ߬ ߞߏߛߓߍ߫߸ ߝߊߦߌߘߊ߫ ߒߞߏߡߐ߮ ߓߍ߯ ߟߋ߬ ߓߐ߫ ߘߊ߫.
ߟߊ߬ߘߍ ߣߌ߲߬ ߟߊ߬ߢߌߣߌ߲ ߕߎ߲߬ ߞߊ߫ ߛߌߦߊ߫، ߊ߬ ߘߐ߫ ߞߎ߲߬ߓߊ߬ߓߊ ߟߎ߫ ߟߋ߬ ߕߋ߲߬ ߞߊ߬ ߓߍ߲߬ ߞߎߡߟߊ ߟߎ߫ ߡߊ߬:
ߛߍ߲ߓߊ߫ ߞߊ߲ߕߌ߮ ߦߋ߫ ߓߊߛߓߊ߬ߕߌ߫ ߛߘߌ߬ߓߋ߬ ߡߍ߲ ߘߌ߫߸ ߏ߬ ߝߟߐ߫ ߞߊ߬ ߞߎߡߊ ߕߊ߬߸ ߞߊ߬ ߛߐ߰ ߖߊ߬ߡߊ ߝߏ߭ ߡߊ߬. ߏ߬ ߞߐ߫ ߞߊ߬ ߞߎߡߊ߫ ߓߍ߲߭ ߕߐ߬ߣߐ ߣߌ߫ ߓߍ߬ߓߊ߬ߟߌ߬ߦߊ ߡߊ߲߬ߕߙߐ ߞߊ߲߬، ߞߏ߫ « ߓߍ߲߭ ߠߋ߬ ߞߙߍ ߓߛߏ߫ ߟߊ߫ ߤߊ߲߰. ߏ߬ ߡߍ߲ ߛߡߊ߬ߛߋ߲ ߘߏ߫ ߦߋ߫ ߕߋߟߋ߲ ߣߌ߫ ߕߎ߬ߢߊ߬ ߝߐ ߣߌ߫ ߓߘߍ߬ ߞߍ ߘߌ߫. ». ߊ߬ ߓߊ߲߫ ߘߊ߫ ߞߊ߬ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߟߊ߫ ߞߍߣߍ߲ ߠߎ߫ ߘߊ߲߬ߕߍ߰ߟߌ ߞߍ߫ : ߛߌߟߊߓߐߛߐ߯ߣߊ߫ ߞߍߦߙߐ (silabosoona.com) ߣߴߊ߬ ߟߥߊߟߌߟߊ߲، ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߊ ߟߎ߬ ߓߍߣߊ߬ ߟߊߥߊ߲߬ߞߊ߲߬ ߞߏ߲ߞߏߘߌ߬ߓߌ ߁߄ ߟߏ߲ ߝߐ߰ߓߍ߬ߦߊ߬ߟߌ ߓߏ߲ߓߊ ߞߣߐ߫.
ߊ߬ ߞߵߊ߬ ߟߊߛߋ߫ ߝߣߊ߫ ߞߏ߫߸ ߒߞߏ ߛߓߍߛߎ߲ ߛߌ߲ߘߌ ߛߊ߲߬ ߞߎ߲ߢߐ߮ ߜߙߊ߬ߓߊ ߡߍ߲ ߓߟߏߟߊߣߍ߲߫ ߕߘߍ߬ ߛߍ߲ߓߊ߫ ߓߟߏ߫ ߞߵߊ߬ ߛߌ߰ ߞߏ߲ߞߏߘߌ߬ߓߌ ߁߄ ߣߊ߬ߕߐ ߞߊ߲߬߸ ߏ߬ ߓߘߊ߫ ߘߓߐ߫ ߊ߬ ߞߕߐ߫ ߞߵߊ߬ ߛߌ߰ ߞߏ߲ߞߏߘߌ߬ߓߌ ߕߟߋ߬ ߃߀ ߞߊ߲߬߸ ߞߵߏ߬ ߞߎ߲߭ ߞߍ߫ ߓߟߏߘߐߓߍ߲߫ ߞߟߊߒߞߋ ߘߏ߫ ߟߎ߫ ߕߊ߬ߟߌ ߘߌ߫. ߜߊ߬ߙߊ ߏ߬ ߕߏ߰ߝߏ ߝߊ߲߬ߞߊ ߘߌߣߊ߬ ߥߙߊ߬ ߞߏߛߓߍ߫.
ߛߟߊߕߌ߮ ߣߊ߲߬ߝߏ߯ ߌߛߎ߬ߡߊ߬ߌ߯ߟߊ߫ ߖߊ߰ߓߌ߬ ߕߊ߫ ߝߐߟߌ ߓߏ߬ߙߌ߬ ߘߊ߫ ߒߞߏ߫ ߞߊߙߊ߲ߘߋ߲ ߠߎ߬ ߟߊ߫ ߛߓߍ߬ߘߏ߲ ߠߋ߬ ߞߊ߲߬ ߊ߬ߟߎ߫ ߖߍ߬ߘߍ ߣߌ߫ ߒߞߏ ߟߊ߫، ߖߐ߲߰ߛߊ߫ ߒߞߏ ߘߌ߫ ߡߊߦߋߙߋ߲߫، ߞߏ߫ ߒߞߏߡߐ߮ ߟߎ߬ ߦߋ߫ ߞߛߌ߬ߞߛߊ ߓߐ߫ ߊ߬ߟߎ߬ ߟߊ߫ ߢߍߥߟߊ ߘߐ߫، ߞߏ߫ : « ߊ߲ ߧߋ߫ ߝߟߐߦߊ ߘߌ߫ ߒߞߏ ߟߋ߬ ߡߊ߬ ߞߏ ߓߍ߯ ߘߐ߫߸ ߞߊ߬ ߞߛߌ߬ߞߛߊ ߓߌ߬ߟߊ߬ ߔߋߎ߫ ߸ ߒߞߏ ߛߓߍߛߎ߲ ߦߋ߫ ߜߟߏ߬ߝߌ߲߬ߘߋ߲ ߠߎ߫ ߞߎ߲߬ߠߊ߬ߦߋ߬ߙߋ߲߬ߝߋ߲߫ ߠߋ߬ ߘߌ߫ ߡߍ߲ ߞߊ߫ ߞߊ߲߫ ߞߊ߬ ߕߣߐ߬ߓߐ߫ ».
ߏ߬ ߞߐ߫߸ ߞߙߊ߬ߡߐ߯ ߢߊ߰ߟߋ߲߬ ߓߎߙߋߡߊ ߝߣߊ߫ ߞߵߊ߬ ߞߊ߲ߕߏ߫ ߞߏ߫ « ߓߟߏߞߏߟߏ߲ߧߊ ߞߊ߫ ߡߐ߱ ߟߐ߬ ߊ߬ ߝߐ߫ ߟߊ߫ ߞߏ߫ ߘߋ߲ߠߊߓߐ ߕߍ߫ ߞߍ߫ ߟߊ߫ ߒ ߝߊ߬ ߓߘߊ. ߏ߬ ߘߐ߫߸ ߊ߲ ߧߋ߫ ߛߍ߬ߓߍ ߞߍ߫ ߞߊ߬ ߟߐ߲ߠߌ߲ ߢߌߣߌ߲߫.»
ߞߏ߲߬ߓߏ߫ ߞߏߕߍߓߊ߲߫ ߞߡߊ߬ߙߊ߫ ߞߵߊ߬ ߦߌ߬ߘߵߊ߬ ߕߊ߫ ߞߎߡߊ ߘߐ߫ ߞߏ߫ :
« ߊ߲ ߧߋ߫ ߛߟߊ߬ߦߊ ߓߐ߫ ߒ߬ ߠߊ߫ ߞߏ ߟߎ߬ ߘߐ߫߸ ߞߊ߬ ߞߎߡߊ ߡߊߓߍ߲߬ ߞߊ߬ ߓߊ߯ߙߊ ߟߊߛߌߦߊߦߊ߫ ߏ߬ ߟߋ߬ ߘߌ߫ ߒߞߏߡߐ߮ ߟߎ߬ ߛߋ߫ ߞߏ߫ ߟߊ߫. ߝߘߊ߬ߜߍ ߟߎ߬ ߣߌ߫ ߊߙߊߓߎ߫ ߟߎ߬ ߕߐ߮ ߦߋ߫ ߘߎߢߊ߫ ߘߝߐ߬ߓߊ ߟߎ߬ ߓߍ߯ ߘߐ߫ ߸ ߞߊ߬ߛߐ߬ߘߐ߲߬ ߟߐ߲ߞߏ ߣߌ߫ ߛߓߍߛߎ߲ ߣߌ߫ ߣߍ߱ ߟߎ߬ ߓߍ߯ ߞߎ߲߬ߠߊߞߊ߬ ߘߊ߫ ߝߘߊ߬ߝߌ߲߬ߠߊ߬ ߜߙߋ ߟߋ߬ ߞߊ߲߬... ߏ߬ ߘߐ߫߸ ߝߏ߫ ߊ߲ ߧߋ߫ ߞߟߊߓߎ ߕߊ߬ ߞߍߕߊ ߣߌ߫ ߝߐߕߊ ߟߎ߬ ߓߍ߯ ߘߐ߫ ߞߐߘߍ߫. »
ߞߎߡߊ ߞߎ߲߬ߘߏ߲ ߘߐ߫ ߛߊ߫߸ ߓߏ߲߬ߧߊ ߘߌ߫ ߘߊ߫ ߛߟߊߕߌ߮ ߊߡߊߘߎ߫ ߞߊ߲ߕߍ߫ ߟߋ߬ ߡߵߊ߬ ߦߋ߫ ߓߊ߬ߘߏ ߞߎߡߊ ߞߎ߲߭ߘߏ߲߬߸ ߊ߬ߟߋ ߡߍ߲ ߟߐ߲ߞߏߕߌ߮ ߛߟߏ߬ߡߊ߰ߣߊ߬ ߞߊ߲ߕߍ߫ ߖߍ߬ߘߍ ߡߏߦߌߝߋ߲ ߘߏ߫ ߘߌ߫. ߏ߬ ߞߊ߬ ߖߊ߬ߡߊ ߝߏ߬ ߞߊ߬ ߡߐ߱ ߟߎ߬ ߞߟߊߓߎߘߏ߲߬ߞߊ߲ ߛߌߦߊߡߊ߲߫ ߝߐ߫߸ ߞߊ߬ ߕߌ߲ߞߌ߫ ߒߞߏ߫ ߟߊ߫ ߛߓߊ߬ߕߌ ߟߊ߫.
ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߞߍߦߙߐ
ߟߞߊ߬ߟߌ߬ߟߌ: ߌߛߌߦߊߞߊ߬ ߘߝߐ߬ߦߊ߬ߟߊ߫ ߞߓߊ߬ ߣߌ߫ ߣߊߡߊ߲߬ߖߊ߲߫ ߡߐ߰ߟߊ߲߬ߘߌ߫ ߡߊ߰ߛߎ߬ߓߊ߬
