ߒߞߏ ߛߌ߲ߘߌ ߛߊ߲߬ ߇߆ ߢߊ߰ߢߊ߮ ߡߍ߲ ߞߍ߫ ߘߊ߫ ߞߊ߲ߞߊ߲߫ ߂߀߂߅ ߞߏ߲ߞߏߘߓߌ ߕߋ߬ߟߋ߫ ߂߉ ߣߴߊ߬ ߕߟߋ߬ ߃߀ ߡߊ߬߸ ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߓߘߊ߫ ߥߌ߬ߟߌ߫ ߏ߬ ߟߋ ߥߊߟߢߌߡߊߟߐ߲ ߝߏ߬ߟߌ߬ ߞߟߊߒߞߋ ߟߎ߬ ߟߊ߫، ߏ߬ ߟߋ ߞߏߛߐ߲߬߸ ߊ߬ߟߎ߬ ߓߘߊ߫ ߥߊߟߢߌߡߊߟߐ߲߫ ߛߙߋߓߍ ߘߌ ߘߊߡߌ߬ߣߊ߫ ߡߐ߰ߓߊ ߟߎ߬ ߣߌ߫ ߘߍ߬ߡߍ߲߬ߓߊ߮ ߟߎ߫ ߡߊ߬߸ ߡߍ߲ ߠߎ߬ ߞߵߊ߬ߟߎ߬ ߛߋߞߏ ߞߍ߫ ߖߊ߲߬ߖߏ߲ ߠߊ߫ ߛߎߘߊ߲ ߘߐ߫. ߏ߬ ߟߋ ߘߐ߫߸ ߛߍ߲ߓߊ߫ ߗߋߘߋ߲ ߠߎ߬ ߛߣߍ߫ ߘߊ߫ ߞߊ߲ߞߊ߲߫ ߛߏߕߌ߮ ߕߍ߰ߟߊ ߘߐ߫߸ ߒߓߋ߲ߓߊ߫ ߡߊ߬ߘߌ߬ߝߌ߲߫ ߞߓߊ߬، ߊ߬ߟߎ߬ ߟߊ߫ ߓߐߒߡߊߟߌ ߣߌ߲߬ ߡߊ߫ ߞߍ߫ ߘߏ߫ ߜߘߍ߫ ߘߐ߫߸ ߞߏ߫ ߞߊ߬ ߡߐ߰ߓߊ ߝߏ߬ ߞߵߊ߬ ߥߊߟߢߌߡߊߟߐ߲߫߸ ߊ߬ ߟߊ߫ ߟߊ߬ߟߌ߬ߟߌ߬ ߓߘߍ ߟߎ߬ ߣߴߊ߬ ߟߊ߫ ߓߊ߯ߙߊ߫ ߓߟߋߓߟߋ ߟߎ߬ ߞߏߛߐ߲߬ ߝߊ߬ߛߏ߬ ߞߊ߲ ߠߎ߬ ߡߞߊߘߊ߲ ߘߐ߫.
ߕߊ߯ߡߊ߫ ߛߘߍ ߡߍ߲ ߠߎ߬ ߥߟߌ߬ ߘߊ߫ ߒߞߏ ߛߍ߲ߓߊ߫ ߟߊ߫ ߞߎ߲߬ߠߊ߫߸ ߏ߬ ߟߎ߬ ߢߍߡߌ߬ߘߊ߬ߣߍ߲߫ ߕߘߍ߬ ߛߟߊߕߌ߯ ߓߊߛߓߊ߬ߕߌ߫ ߛߘߌ߬ߓߋ߫ ߟߋ߬ ߓߟߏ߫߸ ߊ߬ߟߋ ߡߍ߲ ߦߋ߫ ߒߞߏ ߛߍ߲ߓߊ߫ ߘߏ߲߬ߖߟߎ߬ߡߊ߬ߟߌ߬ߟߊ ߘߌ߫، ߊ߬ߟߎ߬ ߡߊߟߐ߬ ߘߊ߫ ߛߘߍ߫ ߘߊ߲߬ߘߌߦߊ߫ ߄߲ ߠߋ߬ ߓߟߏ߫߸ ߏ߬ ߟߎ߬ ߡߍ߲ ߦߋ߫ ߓߙߊ ߘߐ߫ ߕߋ߲߬، ߏ߬ ߟߎ߬ ߝߣߊ߫ ߕߊ߫ ߛߌߟߊ ߢߍ߫߸ ߡߎߛߊ߫ ߝߊ߯ߖ߭ߊ߬ ߛߌ߬ߛߋ߫ ߟߋ߬ ߕߘߍ߬ ߢߍ ߘߐ߫߸ ߘߊ߲߬ߘߌߦߊ߫ ߞߎ߲߬ߕߌ߮ ߘߏ߫߸ ߊ߬ ߣߌ߫ ߞߙߊߟߌߟߊ ߟߎ߬ ߟߊ߫ ߞߙߎ ߞߊ߲ߕߌ߮، ߏ߬ ߟߎ߫ ߟߋ߬ ߕߊ߯ ߘߊ߫ ߥߊߟߢߌߡߊߟߐ߲߫ ߛߙߋߓߍ ߣߌ߲߬ ߡߊߟߐ߬ ߡߐ߰ߓߊ ߟߊ߫߸ ߒߞߏ ߟߊߥߊ߲߬ߞߊ߲ ߣߴߊ߬ ߛߘߊߟߊ ߞߊߡߊ߲ ߞߣߐ߫.
ߞߊ߬ ߞߐ߲߰ ߛߙߋߓߍ ߟߊߕߊ߬ߡߌ߲ ߢߍ߫߸ ߛߟߊߕߌ߯ ߓߊߛߓߊ߬ߕߌ߫ ߛߘߌ߬ߓߋ߫ ߞߊ߬ ߛߙߊ߬ߣߎ߲ ߕߊ߬߸ ߞߵߊ߬ ߦߌ߬ߘߊ߬ ߞߏ߫ ߛߏߕߌ߮ ߣߐ߬ ߞߏ߫ ߟߋ߬ ߞߍ߫ ߟߊ߫߸ ߊ߬ ߢߍߓߊ߮ ߟߎ߫ ߕߎ߲߬ ߡߊ߫ ߡߍ߲ ߢߐ߲߰ ߞߍ߫ ߒߞߏ ߦߋ߫ ߝߟߐ߫، ߞߊ߬ߕߎ߲߯߸ ߊ߬ ߛߋ߫ ߘߴߊ߬ ߛߋߞߏ ߞߍ߫ ߟߊ߫ ߞߊ߬ ߞߎߡߊ߫ ߘߐ߬ߕߊߡߌ߲ ߞߏߟߊߕߍ߯ߘߊ߫ ߝߊ߬ߛߏ߬ߟߊ߬ߞߊ ߦߋ߫߸ ߘߊ߲߬ߛߊ߫ ߞߙߎ߬ߡߊ߬ ߟߊ߫ ߖߡߊ߬ߣߊ ߞߣߐߟߊ ߘߐߕߊ߯ߡߊ ߛߋ߲߭ߝߍ߬߸ ߝߏ߫ ߝߊ߬ߛߏ߬ ߞߊ߲ ߠߎ߬ ߓߘߊ߫ ߛߋ߫ ߘߊ߲ߞߎ߲߫ ߠߊ߫ ߛߌ߰ߞߊ߲߬ ߞߎߘߊ ߞߣߐ߫.
ߊ߬ ߡߊ߫ ߘߊ߲߬ ߏ߬ ߝߐ ߡߊ߬ ߘߋ߬߸ ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߡߐ߰ ߛߌ߫ ߞߊ߬ ߘߏ߫ ߞߍ߫ ߝߊ߬ߛߏ߬ ߞߊ߲ ߠߎ߬ ߟߊ߫ ߞߏ ߘߐ߫߸ ߞߏ߫ ߊ߬ߟߎ߬ ߘߴߏ߬ ߟߎ߬ ߞߐ߲ߘߐ߲߫ ߞߵߊ߬ߟߎ߬ ߕߐ߮ ߟߊߡߊ߬ߙߊ߫ ߘߐ߬ߝߐ ߞߣߐ߫.
ߊ߬ ߓߊ߲߫ ߘߊ߫ ߞߊ߬ ߛߙߋߓߍ ߞߣߐߘߐ ߢߊߝߐ߫߸ ߞߣߊ߬ߕߏ߫ ߊ߬ ߟߊߕߊ߬ߡߌ߲߬ ߠߊ߫ ߡߐ߬ߓߊ ߟߎ߫ ߡߊ߬ ߛߊ߫.
ߒߞߏ ߞߊ߲߬ߜߍ߬ߘߊ ߞߎ߲߬ߕߌ߮ ߟߊ߱ߖߌ߬ ߡߊ߬ߡߊ߬ߘߌ߫ ߛߎ߬ߥߊ߬ߙߋ߫ ߟߋ߬ ߞߊ߬ ߛߙߋߓߍ ߟߊߕߊ߬ߡߌ߲߫ ߡߐ߰ߓߊ߬ ߓߏߟߏ߲ ߠߊ߫ ߗߋߘߋ߲ ߠߎ߬ ߡߊ߬، ߞߵߊ߬ ߟߊ߫ ߛߘߍ ߟߎ߬ ߟߊ߫ ߘߏ߲߬ߖߟߎ߬ߡߊ߬ߘߊ ߞߎ߲߫߬ߕߌ߮ ߟߋ߬ ߡߊ߬߸ ߞߵߏ߬ ߟߐ߬ ߊ߬ ߘߌ߫ ߟߊ߫ ߡߐ߰ߓߊ ߡߊ߬ ߒߞߏ ߛߍ߬ߘߏ߲߬ߠߊ ߟߎ߬ ߕߐ߯ ߘߐ߫،
ߞߊ߲ߞߊ߲߫ ߛߏߕߌ߯ ߗߍߡߐ߮ ߒߓߋ߲ߓߊ߫ ߡߊ߬ߘߌ߬ߝߌ߲߫ ߞߊ߬ߓߊ߫ ߞߊ߬ ߘߎ߬ߥߊ߬ߥߎ ߞߍ߫߸ ߛߍ߬ߘߏ߲߬ߠߊ ߟߎ߬ ߤߊ߲ߞߟߌ ߛߓߊ߬ߕߌ ߟߊ߫߸ ߊ߬ ߣߌ߫ ߝߊ߬ߛߏ߬ ߞߊ߲ ߠߎ߬ ߘߏ߲߬ߘߊ߬ߟߊ ߣߌ߫ ߖߡߊ߬ߣߊ ߟߊ߫ ߛߓߊ߬ߕߌ ߘߐ߫.
ߡߎߛߊ߫ ߝߊ߯ߖ߭ߊ߬ ߛߌ߬ߛߋ߫ ߡߍ߲ ߦߋ߫ ߛߘߍ ߘߊ߲ߘߌߦߊ߫ ߄߲ ߛߘߍ߫ ߞߎ߲ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߛߙߋߓߍ ߣߌ߲߬ ߦߋ߫ ߊ߬ߟߎ ߟߋ߬ ߞߎ߲߬ߠߊ߬ߦߋߙߋ߲ ߘߌ߫߸ ߊ߬ߟߎ߬ ߟߊ߫ ߞߋߟߦߊ ߓߐߢߟߊ ߘߐ߫.
ߞߎ߲߬ߘߏ߲ ߘߐ߫ ߛߊ߫߸ ߓߊߛߓߊ߬ߕߌ߫ ߛߘߌ߬ߓߋ߫ ߞߊ߬ ߦߟߌߓߌߟߊߟߌ ߞߍ ߛߙߋߓߍ ߘߌ߫ ߞߎ߲ ߠߊ߫߸ ߞߏ߫ ߛߊ߫ ߛߏߕߌ߮ ߓߐ߲ߛߐ߲ ߠߎ߬ ߘߌ߫ ߣߌ߲߬ ߕߊ߬ ߗߍ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߋ߲ߓߊ߫ ߞߊ߬ ߞߏ߫ ߞߍ߫߸ߑ ߊ߬ ߓߐߢߐ߲߯ߞߏ ߕߐ߭ ߟߎ߬ ߡߊ߫ ߛߋ߫ ߡߍ߲ ߢߐ߲߰ ߞߍ߫ ߟߊ߫.
ߟߊ߬ߟߌ߬ߟߌ߬ߞߊ߲߬ߠߊ߫ ߛߐ߬ߘߐ߲߬ ߘߊ߫ ߞߊ߬ ߝߘߊ߫ ߛߍ߲ߓߊ߫ ߞߊ߲ߕߌ߮ ߟߊ߫߸ ߞߏ߫ ߓߌ߬ߟߊ߬ߢߐ߲߰ߡߊ ߣߌ߫ ߟߐ߲ߠߌ߲ ߓߍ߯ ߦߋ߫ ߟߊߛߋ߫ ߟߊ߫ ߞߊ߲ ߘߏ߫ ߟߋ߬ ߘߐ߫߸ ߏ߬ ߡߍ߲ ߦߋ߫ ߓߌ߬ߟߊ߬ߢߐ߲߰ߡߊ ߖߎ߬ߟߎ ߘߌ߫، ߏ߬ ߘߐ߫߸ ߞߏ߫ ߓߍ߯ ߦߋ߫ ߒߞߏ ߞߊ߬ߙߊ߲߬߸ ߞߵߊ߬ ߟߐ߲߫ ߞߏ߫ ߥߙߎߞߌ ߛߌߟߊ ߟߋ߬.
ߤߊߟߌ߬ߛߊ߫߸ ߒߞߏ ߛߍ߲ߓߊ߫ ߦߋ߫ ߛߙߋߓߍ߫ ߟߕߊߡߌ߲ ߣߌ߲߬ ߞߊ߲߬߸ ߤߊߟߌ߬ ߞߎߣߎ߲߬ ߞߍ߲ߘߍߟߏ߲ ߡߊ߬߸ ߊ߬ߟߎ߫ ߞߊ߬ ߖߊ߲߬ߖߏ߲ ߝߊ߬ߓߘߍ ߞߐ߲ߘߐ߲߫ ߛߙߋߓߍ߫ ߞߟߊߒߞߋ߫ ߟߊ߫߸ ߛߟߊߕߌ߯ ߡߊ߬ߡߊ߬ߘߎ߬ߓߊ߬ ߕߐߛ ߞߡߊ߬ߙߊ߬، ߏ߬ ߝߣߊ߫ ߞߍ߫ ߘߴߊ߬ ߕߊ߫ ߖߌ߲ߘߊ߲ߓߊ߫ ߘߌ߫ ߛߍ߲ߓߊ߫ ߝߊ߲ߓߊ ߟߊ߫ ߞߎߣߎ߲߬.
ߞߊ߲߬ߞߎߡߊ: ߟߏ߲ߞߊߛߌߦߊ߫ ߞߡߊ߬ߙߊ߬
