ߟߊ߬ߞߊ߲߬ߘߊ߬ߟߌ ߣߌ߫ ߡߊ߬ߞߊ߲߬ߞߊ߲߬ߠߌ߲ ߝߏ߯ߓߊ߫ ߡߊ߲߬ߕߏ߲߬ߕߍ߬ߟߊ߬ߞߊ ߞߍߞߏ߫ ߝߟߐ ߟߋ߬ ߞߍߣߍ߲߫ ߓߡߊ߬ߞߐ߫ (BAMEX’2025)߸ ߏ߬ ߞߍ߫ ߘߊ߫ ߕߙߎ߬ ߘߌ߫ ߡߊ߬ߟߌ ߣߴߊ߬ ߞߏߟߊߘߍߢߐ߲߯ ߝߘߊ߬ߝߌ߲߬ ߖߡߊߣߊ ߘߏ߫ ߟߎ߫ ߞߵߊ߬ߟߎ߬ ߟߊ߫ ߣߊ߲߬ߕߌ߰ߦߊ ߓߌ߬ߟߊ߬ߢߐ߲߰ߡߊ ߝߊ߲߬ߞߊߘߏ߲߬ ߞߏߛߓߍ߫، ߏ߬ ߓߍ߲߬ߒ߬ߛߋ߲߬ߡߊ ߘߏ߫ ߟߋ߬ ߞߍ߫ ߘߊ߫ ߖߋ߬ߟߌ߬ߓߊ߬ߟߊ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߟߊ߫ ߓߐߒߡߊߟߌ ߘߌ߫߸ ߞߵߊ߬ ߓߍ߲߬ ߊ߬ߟߎ߬ ߟߊ߫ ߓߊ߯ߙߊߢߐ߲߯ߦߊ ߝߊ߲߬ߞߊߘߏ߲߬ ߞߏ ߡߊ߬ ߟߊ߬ߞߊ߲߬ߘߊ߬ߟߌ ߜߟߍ߬ߦߊ ߟߎ߬ ߘߊ߲ߘߊ ߘߐ߫.
ߖߋ߬ߟߌ߬ߓߊ߬ߟߊ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߡߏ߬ߤߊߡߍߘ ߓߘߊߙߎ ߊߓߎߓߞߊߙ ߣߊ߬ ߘߊ߫ ߓߡߊ߬ߞߐ߫ ߂߀߂߅ ߣߍߣߍߓߊ ߕߟߋ߬ ߁߃ ߡߊ߬߸ ߓߐߒߡߊߟߌ߫ ߟߊ߲ߞߣߍߡߊߣߍ߲ ߘߏ߫ ߟߊ߫߸ ߞߵߊ߬ ߛߐ߬ߘߐ߲߬ ߟߊ߬ߞߊ߲߬ߘߊ߬ߟߌ ߣߌ߫ ߡߊ߬ߞߊ߲߬ߞߊ߲߬ߠߌ߲ ߖߊ߲߬ߖߏ߲߬ߓߊ ߘߏ߫ ߦߋ߫ ߛߋ߲߬ߠߊ߫ ߓߡߊ߬ߞߐ߬ ߞߣߐ߫، ߊ߬ ߟߊߛߣߍ߫ ߘߊ߫ ߡߊ߲߬ߕߏ߲߬ߕߍ߬ ߛߊ߲ߡߊߘߊ߲߫ ߞߊ߲ߕߌ߯ ߡߏߘߌߓߐ߬ ߞߋߕߊ߬ ߟߋ߬ ߟߴߊ߬ ߓߐߢߐ߲߯ߞߏ߫ ߡߊ߬ߟߌ߬ߞߊ ߓߟߏ߫߸ ߞߟߍ߬ߕߌ߯ ߛߊ߯ߖߐ߬ ߞߡߊ߬ߙߊ߬.
ߊ߬ߟߎ߬ ߟߊ߫ ߢߐ߲߯ߦߋ ߣߌ߲߬ ߞߍ߫ ߘߊ߫ ߡߊ߬ߟߌ ߣߌ߫ ߖߋ߬ߟߌ߬ߓߊ߬ߟߊ߫ ߟߊ߫ ߣߊ߲߬ߕߌ߰ߦߊ ߓߊ߯ߙߊߢߐ߲߯ߦߊ ߝߊ߲߬ߞߊߘߏ߲߬ ߞߏߓߊ߫ ߟߋ߬ ߘߌ߫߸ ߖߡߊ߬ߣߊ߫ ߝߌ߬ߟߊ ߏ߬ ߟߎ߬ ߡߍ߲ ߠߎ߬ ߓߍ߯ ߦߋ߫ ߟߊ߬ߞߊ߲߬ߘߊ߬ߟߌ ߖߐ߬ߘߐ ߞߣߐ߫ ߕߟߋ߬ߓߋ߬ ߊߝߙߌߞߌ߬ ߞߊ߲߬.
ߖߋ߬ߟߌ߬ߓߊ߬ߟߊ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߟߊ߫ ߓߐߒߡߊߟߌ ߣߌ߲߬ ߞߣߐ߫߸ ߡߏ߬ߤߊߡߍߘ ߓߘߊߙߎ ߊߓߎߓߞߊߙ ߣߌ߫ ߡߊ߬ߟߌ ߞߏߕߌ߯ ߝߟߐ ߞߊ߫ ߞߊ߲߫ ߞߊ߬ ߢߐ߲߯ߦߋ߫߸ ߞߟߍ߬ߕߌ߰ ߊߓߘߎߟߊߦߌ߬ ߡߊ߬ߦߌߜ߭ߊ߬߸ ߊ߬ ߣߌ߫ ߞߏߟߊߕߍ߯ ߜߘߍ߫ ߟߎ߫߸ ߛߊ߫ ߞߵߊ߬ߟߎ߬ ߟߊ߫ ߘߏ߲߬ߖߟߎ߬ߡߊ߬ߟߌ ߞߍߢߊ ߟߎ߫ ߝߊ߲߬ߞߊߘߏ߲߬ ߓߞߏ߫ ߤߙߊߡ ߞߍ߬ߟߍ ߘߐ߫߸ ߊ߬ ߣߌ߫ ߛߌ߬ߟߡߊ߬ ߞߊߝߏ ߟߎ߬ ߣߌ߫ ߓߊ߰ߓߊ߰ߟߌ߬ ߞߙߎ߫ ߜߘߍ߫ ߟߎ߫.
ߓߐߒߡߊߟߌ ߢߌ߲߬ ߣߌ߫ ߓߊߡߍߞߛ ߂߀߂߅ ߟߋ߬ ߓߍ߲߬ߣߍ߲߬ ߢߐ߲߮ ߡߊ߬߸ ߏ߬ ߡߍ߲ ߦߋ߫ ߖߊ߲߬ߖߏ߲߬ ߘߌ߫߸ ߘߎߢߊ߫ ߡߊ߬ߞߊ߲߬ߞߊ߲߬ߠߌ߲ ߓߊ߯ߙߟߊ ߟߎ߬ ߦߴߊ߬ߟߎ߬ ߟߊߘߍ߬ ߟߊ߫ ߡߍ߲ ߘߐ߫߸ ߞߵߊ߬ߟߎ߬ ߟߊ߫ ߟߐ߲ߠߌ߲ ߠߎ߬ ߣߴߊ߬ߟߎ߬ ߛߋߞߏߦߊ ߟߎ߬ ߟߊߕߊ߬ߡߌ߲߬ ߢߐ߲߮ ߡߊ߬ ߟߊ߬ߞߊ߲߬ߘߊ߬ߟߌ ߡߊ߬ߘߎ߮ ߘߐ߫.
ߒ߬ߓߊ߬߸ ߡߊ߬ߟߌ ߣߌ߫ ߖߋ߬ߟߌ߬ߓߊ߬ߟߊ߫ ߡߊ߫ ߓߐ߫ ߓߎ߬ ߘߐ߬ߞߏߟߏ߲߫ ߘߐ߫ ߣߌ߲߬ ߞߏ ߘߐ߫ ߘߋ߬: ߖߡߊ߬ߣߊ߫ ߝߌ߬ߟߊ ߢߌ߲߬ ߠߎ߫ ߕߎ߲߬ ߓߘߊ߫ ߓߊ߯ߙߊ߫ ߞߘߐ߬ߡߊ߲߬߸ ߊߝߌߛߑߡߊ ߗߋߦߊߟߌ ߘߐ߫ ߂߀߁߃ ߟߊ߫߸ ߏ߬ ߥߊ߯ߕߌ ߟߋ߬ ߖߍ߬ߘߍ ߟߊ߫ ߖߋ߬ߟߌ߬ߓߊ߬ߟߊ߫ ߞߊ߬ ߣߊ߲߬ߕߌ߰ ߞߙߎ ߘߏ߫ ߟߎ߫ ߟߊߕߊ߯ ߡߊ߬ߟߌ ߟߊ߫߸ ߊ߬ ߣߌ߫ ߛߊ߲ߡߊ߫ ߝߙߍ ߘߏ߫ ߟߎ߫߸ ߞߊ߬ ߡߊ߬ߟߌ ߣߊ߲߬ߕߌ߮ ߟߎ߬ ߡߊߘߍ߬ߡߍ߲߬߸ ߊ߬ ߣߌ߫ ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߞߊߝߏ ߟߎ߬ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߍ߬ߓߊ (ߝ.ߕ.ߞ.ߡ.ߘ) ߟߊ߫ ߗߋߦߊߟߌ ߞߣߐ߲߫.
ߓߊ߬ߙߌ߬߸ ߞߊ߬ߦߌ߯ ߡߊ߬ߟߌ ߣߌ߫ ߓߙߎߞߌߣߊ߫ ߝߊ߬ߛߏ߬ ߣߌ߫ ߖߋ߬ߟߌ߬ߓߊ߬ߘߎ߯ ߟߎ߫ ߞߵߊ߬ߟߎ߫ ߛߋ߲߬ߓߐ߫ ߕߐ߲ߓߊ ߏ߬ ߘߐ߫ ߛߊ߫߸ ߞߵߊ߬ߟߎ߫ ߘߐ߱ߘߏ߲߬ ߞߞߢ ߟߊ߫߸ ߖߡߊ߬ߣߊ߫ ߝߌ߬ߟߊ ߢߌ߲߬ ߠߎ߬ ߓߐ߫ ߘߊ߫ ߘߍ߬ ߞߋߟߋ߲߫ ߘߐ߫߸ ߞߵߊ߬ߟߎ߬ ߝߘߊ߫ ߞߏߟߊߘߍߢߐ߲߯ߦߊ ߘߏ߫ ߟߎ߫ ߡߊ߬.
ߒ߬ߓߊ߬߸ ߊ߬ߟߎ߬ ߟߊ߫ ߢߐ߲߯ߦߋ ߢߌ߲߬ ߠߋ߬ ߞߍߕߐ߫ ߥߏ߬ߘߊ ߘߏ߫ ߟߎ߫ ߟߊߝߊ߰ ߟߊ߫߸ ߞߊ߬ ߕߊ߬ߡߌ߲߬ ߊ߬ߟߎ߬ ߟߊ߫ ߖߡߊ߬ߣߊ߫ ߝߌ߬ߟߊ ߟߊ߫ ߓߟߏ ߘߌ߫ ߢߐ߲߰ ߡߊ ߝߊ߲߬ߞߊߘߏ߲߬ ߠߊ߫߸ ߞߊ߬ ߛߋ߫ ߓߐߘߊ߫ ߢߌߣߌ߲߫ ߠߊ߫ ߟߊߞߊ߲ߘߊ ߜߟߍ߬ߦߊ ߟߎ߬ ߟߊ߫ ߞߌ߬ߢߍ߬ߞߏ߲ߞߏ߫ ߞߊ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
