ߓߙߋߖ߭ߌߟ ߕߏ߬ߟߊ߲߬ߕߊ߲߬ߠߊ߬ ߞߘߐ ߘߊߣߌ߫ ߊߟߑߝ߭ߍߛ ߓߘߊ߫ ߣߌߛߐߘߌߦߊ ߛߐ߬ߘߐ߲߬ ߊߛߌߔߊ߲߫ ߞߕߌߘߊ ߟߊ߫ ߓߌ߬، ߂߀߂߄ ߞߏ߲ߞߏߜߍ ߟߊ߫߸ ߘߊߣߌ߫ ߊߟߑߝ߭ߍߛ ߖߊ߲ߞߌ߲߫ ߘߊ߫ ߓߋ߬ߒ߬ߞߊ߲߬ߠߌ߲߬ ߞߏ ߘߏ߫ ߘߐ߫، ߒ߬ߓߊ߬߸ ߕߙߊߓߊ ߕߋ߬ߟߋ߫ ߂߈ ߣߌ߲߬ ߡߊ߬߸ ߓߊߙߑߛߋߟߐߣ ߞߕߌ߫ ߡߛߊߦߌ߲ߘߊ ߞߵߊ߬ ߟߊ߫ ߖߊ߲߬ߞߌ߬ߟߌ ߏ߬ ߘߐߛߊ߬، ߊ߬ߟߋ ߦߋ߫ ߓߊߙߑߛߋߟߐߣ ߕߏߟߏ߲ߠߊ߫ ߞߘߐ ߟߋ߬ ߘߌ߫߸ ߊ߬ ߣߌ߫ ߔߊ߬ߙߌ ߛߍ߲ ߖ߭ߍߙߑߡߍ߲ ߣߌ߫ ߖ߭ߎ߳ߝ߭ߍ߲ߕߌߛ، ߛߊ߲߬ ߣߊ߯ߣߌ߲ ߡߍ߲ ߟߊߣߍ߲߫ ߕߍ߬ߘߍ߫ ߊ߬ ߞߎ߲߬߸ ߊ߬ ߕߴߏ߬ ߞߍ߫ ߟߊ߫ ߏ߬ ߞߐ߫.
ߞߕߌ߫ ߡߛߊߦߌ߲ߘߊ ߞߵߊ߬ ߦߌ߬ߘߊ߫ ߟߋ߬߸ ߞߏ߫ ߘߊߣߌ߫ ߟߊ߫ ߞߏߢߊ ߣߌ߲߬ ߘߐ߫߸ ߘߐ߯ߦߡߊ ߟߎ߬ ߦߴߊ߬ ߘߐ߫߸ ߊ߬ ߞߏ߫ ߟߎ߬ ߔߘߋߔߘߋߟߊߕߍ߰ߓߊߟߌߦߊ߸ ߞߵߏ߬ ߟߊ߫ ߞߏ߫ ߘߐߝߌ߲߬ߣߍ߲ ߘߏ߫ ߟߎ߫ ߞߊ߲߬، ߏ߬ ߟߋ ߘߐ߫߸ ߞߏ߫ ߊ߬ߟߎ߬ ߓߘߴߊ߬ߟߎ߬ ߢߊ ߡߊߖߌ߰ ߊ߬ ߞߏ ߞߘߐ߫߸ ߞߵߊ߬ ߦߋ߫ ߞߏ߫ ߊ߬ ߞߕߌ ߞߍߣߍ߲߫ ߞߕߌ߫ ߝߊ߲߬ߞߋ߬ߟߋ߲߬ߡߊ ߟߋ߬ ߘߌ߫.
ߊ߬ ߟߊ߫ ߞߕߌ ߡߊߛߊ߬ߦߌ߲ ߣߌ߲߬ ߘߐ߫߸ ߊ߬ ߦߌ߬ߘߊ߬ߣߍ߲߫ ߠߋ߬ ߞߏ߫ ߡߞߊ߬ߛߌ߬ߓߊ߰ߕߐ ߣߐ߬ ߞߊ߲ ߡߍ߲ ߝߐ߫ ߟߊ߫߸ ߊ߬ߟߎ߬ ߡߴߏ߬ ߦߋ߫ ߛߥߊ߬ߓߊ߬ ߘߌ߫، ߓߊߏ߬߸ ߞߊ߲ ߡߍ߲ ߝߐߣߴߊ߬ ߓߟߏ߫߸ ߊ߬ ߣߌ߫ ߞߏ ߡߍ߲ ߕߊ߬ߡߌ߲߬ߣߍ߲߫ ߣߌ߫ ߓߟߏ߫ ߘߌ߫ ߞߍ߫ ߊ߬ ߟߊ߫ ߘߊ߬ߟߌ߬ ߘߌ߫߸ ߦߏ߫ ߖߌ߬ߦߊ߬ߖߟߎ ߡߍ߲ ߠߊߞߎ߲߬ߘߎ߬ߣߍ߲߫ ߊ߬ ߛߎ ߘߐ߫ ߘߐ߲߬ ߦߙߐ ߘߐ߫ ߦߋ߲߬، ߞߕߌߘߊ ߞߊ߲߫ ߞߏ߫ ߖߌ߬ߦߊ߬ߖߟߎ ߏ߬ ߡߴߊ߬ߟߎ߬ ߖߊߙߋ߫ ߞߵߊ߬ ߟߐ߲߫ ߕߌ߯ߕߌ߯߸ ߣߌ߫ ߞߏ ߡߍ߲ ߕߊ߬ߡߌ߲߬ ߘߊ߫ ߘߊߣߌ߫ ߣߌ߫ ߘߋ߲ߡߛߏ ߕߍ߫߸ ߣߌ߫ ߞߘߊߡߊߟߌ ߟߋ߬ ߥߟߊ߫ ߞߊ߬ߘߌߦߊߢߍ ߟߋ߬، ߞߵߊ߬ ߟߴߊ߬ ߞߊ߲߬߸ ߞߏ߫ ߘߋ߲ߡߛߏ ߞߊ߬ ߞߏ ߡߍ߲ ߠߎ߬ ߞߍ߫ ߢߍ߲߮ ߞߣߐ߫ ߦߋ߲߬ ߕߊߛߙߊߟߌ߫ ߓߟߏ ߡߊ߬߸ ߞߏ߫ ߊ߬ߟߎ ߡߴߏ߬ ߦߋ߫ ߘߊ߬ߟߎ߬ ߖߐ߲ߖߐ߲߫ ߘߌ߫߸ ߊ߬ ߞߏ ߡߴߊ߬ߟߎ߬ ߕߊ߫ ߡߌ߬ߣߊ߬ ߓߐ߫ ߝߋߎ߫.
ߞߕߌ ߣߌ߲߬ ߞߐ ߘߐ߫߸ ߘߐ߬ߜߍߘߍ߲ ߡߍ߲ ߺ ߍ ߺ ߡߍ߲߫ ߕߘߍ߬ ߘߊߣߌ߫ ߞߊ߲߬߸ ߏ߬ ߓߍ߯ ߓߘߊ߫ ߟߊߥߌ߬ߟߌ߫ ߡߎ߬ߕߎ߲߬ ߝߋߝߋ߫، ߏ߬ ߘߏ߫ ߟߎ߫ ߝߟߍ߫ ߣߌ߲߬:
ߊ߬ ߝߐߣߍ߲߫ ߠߋ߬ ߕߘߍ߬ ߞߏ߫ ߛߊ߲߬ ߣߊ߯ߣߌ߲߫ ߣߌ߫ ߕߟߊ߫ ߓߘߊ߫ ߟߴߊ߬ ߞߎ߲߬
ߞߏ߫ ߊ߬ ߞߊߣߵߊ߬ ߡߊߘߏ߲߬ ߘߋ߲ߡߛߏ ߟߊ߫ ߤߊ߲߯ ߛߊ߲߭ ߞߐ߬ߣߐ߲߬ߘߐ߬ ߣߌ߫ ߕߟߊ߫
ߊ߬ ߘߌ߫ ߕߏ߫ ߞߣߐ߬ߜߍ߲߬ߠߌ߲ ߘߊߞߘߐ߫ ߊ߬ ߞߊ߲ߠߊߓߌ߬ߟߊ߬ߣߍ߲ ߞߐߝߍ߬ ߤߊ߲߯ ߛߊ߲߬ ߟߏ߯ߟߎ߫
ߊ߬ ߣߌ߫ ߞߏ߫ ߊ߬ ߦߋ߫ ߋߙߏ ߁߅߀ ߀߀߀ ߛߙߊ߬ ߘߌߦߊߜߏߦߊ ߟߊ߫
߂߀߂߄ ߕߙߊߓߊ ߟߊ߫߸ ߘߊߣߌ߫ ߊߟߑߝ߭ߍߛ ߓߐ߫ ߘߊ߫ ߟߋ߬ ߥߛߎ ߟߊ߫߸ ߓߊߏ߬ ߊ߬ ߞߊ߬ ߋߙߏ ߞߋ߲߬ߥߟߎ߬ ߞߋߟߋ߲߫ ߠߋ߬ ߛߊ߬ߙߊ߫ ߞߎ߲߬ߞߘߐ߬ߛߌ߮ ߘߌ߫، ߓߌ߬ ߕߊ ߞߐ߫߸ ߊ߬ ߓߘߊ߫ ߞߊ߲ߠߊߓߌߟߊ߫ ߘߝߊߣߍ߲ ߛߐ߬ߘߐ߲߫ ߊ߬ ߟߊ߫ ߞߏ ߟߎ߬ ߘߐ߫ ߡߎ߬ߕߎ߲߬، ߤߊߟߵߊ߬ ߝߐ ߡߍ߲ ߞߍߣߍ߲߫ ߕߘߍ߬ ߞߏ߫ ߊ߬ ߦߋ߫ ߓߐ߫ ߊߛߌߔߊ߲߫ ߘߎ߰ߞߟߏ ߞߊ߲߬߸ ߏ߬ ߝߣߊ߫ ߓߘߊ߫ ߟߊߥߌ߬ߟߌ߫ ߊ߬ ߞߐ߫.
ߊߟߎ߫ ߞߏ߬ߣߌ߲ ߦߴߊ߬ ߟߐ߲߫߸ ߘߊߣߌ߫ ߊߟߑߝ߭ߍߛ ߓߘߊ߫ ߞߊ߲ߠߊߓߌ߬ߟߊ߬ ߝߋߎ߫، ߒ߬ߞߊ߬߸ ߏ߬ ߕߴߊ߬ ߞߏ ߓߊ߲ߣߍ߲߫ ߘߌ߫ ߤߊ߲߫، ߓߊߏ߬߸ ߊߛߌߔߊ߲߫ ߞߕߌߖߌ߲ ߛߊ߲ߘߐߕߊ ߞߊ߫ ߞߊ߲߫ ߞߵߊ߬ ߡߙߌߦߊ߫ ߟߊߓߊ߲ ߘߌ߫ ߊ߬ ߞߏ ߞߊ߲߬.
ߞߕߌߘߊ ߟߊ߫ ߡߙߌߘߐ ߣߌ߲߬ ߓߘߊ߫ ߣߊ߬ ߞߎߡߊ߫ ߓߎߚߎߕߎߕߎ߫ ߛߌߦߊߡߊ߲߫ ߠߋ߬ ߘߌ߫ ߊߛߌߔߊ߲߫ ߞߣߐ߫߸ ߊ߬ ߣߌ߫ ߓߙߋߖ߭ߌߟ ߞߣߐ߫، ߊ߬ ߟߊ߫ ߟߊ߬ߝߛߊ߬ߟߌ߬ߟߊ߬ ߡߛߏ ߞߊ߲߫ ߞߏ߫ ߞߕߌ ߣߌ߲߬ ߟߊ߫ ߢߊ ߘߌߦߊߣߴߊ߬ ߦߋ߫ ߟߋ߬ ߢߊ ߓߍ߯ ߡߊ߬، ߓߊ߬ߙߌ߬߸ ߡߞߊ߬ߛߌ߬ߓߊ߰ߕߐ ߟߊ߫ ߟߊ߬ߝߛߊ߬ߟߌ߬ߟߊ ߡߊ߫ ߝߋ߲߫ ߝߐ߫ ߝߟߐ߫.
ߊ߬ ߟߊ߫ ߞߕߌ ߣߌ߲߬ ߞߏ߬ߣߌ߲ ߕߎ߲߬ ߓߘߊ߫ ߘߎߢߊ߫ ߕߏ߬ߟߊ߲߬ߕߊ߲߬ߠߊ ߟߎ߬ ߓߊ߬ߟߌ߫ ߟߋ߬ ߞߏߛߓߍ߫، ߊ߬ ߞߏ ߞߏ߬ߣߌ߲ ߘߌߣߊ߬ ߡߊ߲߬ߞߊ߲߬ ߞߎߘߊ߫ ߕߊ߬߸ ߣߌ߫ ߊߛߌߔߊ߲߫ ߞߕߌߖߌ߲߫ ߛߊ߲ߘߐߕߊ ߝߣߊ߫ ߞߊ߬ ߞߊ߲߫ ߞߎߘߊ߫ ߝߐ߫߸ ߡߍ߲ ߣߌ߫ ߘߐ ߢߌ߲߬ ߕߍ߫ ߞߋߟߋ߲߫ ߘߌ߫، ߊ߬ ߞߏ߬ߣߌ߲ ߞߍ߫ ߘߊ߫ ߢߊ ߺ ߊ ߺ ߢߊ߫ ߡߊ߬߸ ߞߏ߫ ߜߍߟߍ߲ߓߊ߫ ߟߋ߬ ߕߊ߬ߡߌ߲߬ߣߍ߲߫ ߘߊߣߌ߫ ߊߟߑߝ߭ߍߛ ߞߊ߲߬ ߕߋ߲߬߸ ߊ߬ ߟߊ߫ ߢߣߊߡߦߊ ߘߐ߫߸ ߊ߬ ߣߴߊ߬ ߟߊ߫ ߓߊ߯ߙߊ ߘߐ߫.
