ߓߌ߬ߟߊ߬ߒ߬ߘߐ ߣߌ߲߬ ߓߘߊ߫ ߞߍ߫ ߊ߬ ߕߊ߫ ߥߎ߬ߣߎ߲߬ߥߎ߬ߣߎ߲߬ ߞߏ߫ ߘߌ߫ ߛߌ߯ߙߌ߫ ߛߏ ߞߣߐ߫ ߞߏߛߓߍ߫.
ߏ߬ ߟߋ ߞߏߛߐ߲߬ ߊ߲ߠߎ߬ ߝߐ߰ߓߍ߬ߦߊ߬ߟߊ ߟߎ߬ ߝߣߊ߫ ߡߊ߫ ߕߏ߫ ߛߌ߰ߟߌ߬ ߘߐ߫ ߣߌ߲߬ ߞߏߢߊ ߡߊ߬ߘߎ߮ ߘߐ߫ ߝߛߍߞߘߎ߫.
ߏ߬ ߓߟߏߡߊ߬ ߸ ߊ߲ ߛߋ߫ ߘߊ߫ ߞߊ߬ ߘߊ߲ߘߊߟߌߟߊ ߊߓߘߎߟߊߦߌ߬ ߓߊߛߌߙߎ߬ ߞߐ߲ߘߍ߫ ߘߟߊߛߎ߲ߓߎ߫ ߊ߬ ߞߏ ߕߊ߬ߡߌ߲߬ ߢߊ ߞߊ߲߬ ߕߊ߲߬ ߘߐ߫ ߞߏ߫ : <<ߒ ߧߋ߫ ߛߐ߰ ߟߊ߫ ߝߐ߰ߓߍ߬ߦߊ߬ߟߊ ߟߎ߫ ߕߊ߲߬ߘߏ ߡߊ߬ ߞߵߊ߬ߟߎ߬ ߞߎߟߎ߲ߖߋ߫ ߘߐ߬ߖߊ ߣߌ߫ ߞߟߊߓߎ ߟߊ߫߸ ߊߟߎ ߡߍ߲ ߦߴߊ߲ߠߎ߬ ߝߍ߬ ߕߎ߬ߡߊ ߓߍ߯ ߟߊߘߍ߬ߣߍ߲ ߠߊ߫ ߞߊ߬ߣߌ߲߬ .
ߒߠߋ ߕߐ߯ ߟߋ߬ ߞߏ߫ :ߘߊ߲ߘߊߟߌߟߊ ߊߓߘߎߟߊߦߌ߬ ߓߊߛߌߙߎ߬ ߞߐ߲ߘߍ߫، ߣߌ߫ ߘߏ߫ ߟߎ߫ ߦߋ߫ ߒ ߥߟߋ߫ ߟߊ߫ ߞߏ߫" ߊߓߋ߬ ߛߋ߫" ߸ ߒ ߧߋ߫ ߘߊ߲ߘߟߊ ߘߊ߯ߕߌ߮ ߟߋ߬ ߘߌ߫߸ ߏ߬ ߡߍ߲ ߦߋ߫ ߝߊ߬ߛߏ ߞߟߍ߬ߡߐ߰ߟߊ߫ ߢߍߡߌߘߊ߫ ߛߊ߲ߘߐߕߊ ߣߌ߫ ߣߊ߲߬ߕߌ߰ ߗߋߘߊߕߌ߮ ߢߍߡߐ߮ ߘߌ߫ ߸ ߓߌ߬ ߒ ߧߋ߫ ߛߌ߯ߙߌ߫ ߘߊ߲ߘߊߛߏߓߊ ߟߋ߬ ߟߊ߫ ߸ߒ ߠߊ߫ ߓߊ߯ߙߊ߫ ߦߋ߫ ߡߊ߬ߜߍ߲߬ߠߌ ߣߌ߫ ߘߊ߲ߘߊߟߌ ߣߌ߫ ߘߐ߬ߓߛߏ߬ߟߌ ߘߐ߬ߜߊ߬ߟߌ߬ ߟߋ߬ ߟߊ߫ .
ߏ߬ ߓߟߏߡߊ߬߸ ߓߌ߬ ߞߍ߲ߘߍߟߏ߲ ߛߐ߰ߡߊ߬ߘߊ ߇ ߙߋ߲ ߝߊ߲߬ߝߍ߬ ߟߊ߫ ߟߋ߬ ߟߊ߫ ߸ ߒ ߞߊ߬ ߥߟߋߟߌ߫ ߞߊ߲߫ ߠߊ߫ ߟߋ߬ ߛߐ߬ߘߐ߲߬ ߞߊ߬ ߝߘߊ߫ ߒ ߓߊ߯ߙߊߢߐ߲߮ ߘߏ߫ ߟߎ߫ ߟߊ߫ ߣߊߟߌ߬ߡߎ߲߫ ߞߍ߲ߘߍߦߊ ߞߏ ߡߊ߬ߘߎ߮ ߘߌ߫ ߸ ߊ߬ߟߎ߫ ߞߵߊ߬ ߦߌ߬ߘߊ߬ ߒ ߠߊ߫ ߞߏ߫ ߞߊߡߋߙߋ߲ ߘߏ߫ ߛߎ߭ ߓߘߊ߫ ߦߋ߲߫ ߘߊ߬ߡߊ߲ ߞߣߐ߫ ߟߍߘߐ߫ ߸ߞߐ߬ߣߌ߲߬ ߞߏ߫ ߊ߬ߟߎ߬ ߓߘߊ߫ ߥߎ߬ߣߎ߲߬ߥߎ߬ߣߎ߲߬ ߞߊ߲߬ ߛߘߍߡߊ߲߫ ߡߍ߲߫ ߡߍ߲ ߣߐ߬ ߕߍ߫ ߊ߬ߟߎ߬ ߘߌߦߊ߫ ߟߊ߫ ߝߋߎ߫ ߸ ߓߊߏ߬ ߞߏ߫ ߞߟߍ߬ߡߐ߮ ߟߎ߫ ߓߘߊ߫ ߕߏ߫ ߡߐ߱ ߘߏ߫ ߟߎ߫ ߜߍ߲߫ ߠߊ߫ ߤߊ߲߯ ߡߐ߰ ߞߋߟߋ߲߫ ߓߘߊ߫ ߓߐ߬ߣߐ߫ ߊ߬ ߣߌ ߘߐ߫ ߏ߬ ߟߎ߬ ߘߐ߫ ߸ ߘߏ߫ ߟߎ߫ ߖߍ߬ߘߍ ߞߊ߲߫ ߞߏ߫ ߊ߬ߟߎ߫ ߣߐ߬ ߊ߬ ߜߍ߲߫ ߠߊ߫ ߟߋ߬ ߞߵ ߊ߬ ߡߌ߬ߣߊ߬ ߞߵߊ߬ ߜߊ߬ߛߌ߬ ߤߊ߲߯ ߞߵߊ߬ ߝߊ߰.
ߏ߬ ߞߍ߸ ߒ ߝߣߊ߫ ߞߵߊ߬ ߦߌ߬ߘߴߊ߬ߟߎ߬ ߟߊ߫ ߞߏ߫ ߸ ߏ߬ ߦߋ߫ ߞߎߡߊ߫ ߜߊ߲ߛߊ߲߫ ߠߋ߬ ߘߌ߫ ߡߐ߰ ߡߊ߲߫ ߞߊ߲߫ ߞߊ߬ ߡߍ߲ ߖߊ߬ߕߋ߬ ߝߋߎ߫ ߸ ߓߊߏ߬ ߣߊ߲߬ߕߌ߰ߦߊ ߘߐ߫ ، ߣߴߌ ߞߊ߬ ߕߏ߲ߕߊߟߊ߲ ߕߊ߬ ߸ߌ ߕߴߊ߬ ߘߏ߲߬ߣߴߌ ߞߣߊ߫ ߖߡߊ߬ߣߊ߬ߘߋ߲ ߠߎ߬ ߞߊߡߊ߬ ߘߋ߬ ߸ ߌ ߦߴߊ߬ ߘߏ߲߬ ߠߊ߫ ߖߡߊ߬ߣߊ߬ߘߋ߲ ߠߎ߬ ߢߍ߫ ߟߋ߬ ߸ߞߊ߬ߡߊߛߐ߬ߘߐ߲߬ ߡߎ߲߬ ߝߍ߬ ߸ ߕߏ߲ߕߊߟߊ߲ (Tenue ) ߡߍ߲ ߦߴߌ ߞߣߊ߫ ߓߊ߬، ߡߐ߬ߙߌ߬ߝߊ ߓߊ߬، ߖߡߊ߬ߣߊ߬ߘߋ߲ ߠߎ߬ ߟߊ߫ ߓߟߏߟߊߘߍ߫ ߟߋ߬ ߞߵߊ߬ ߘߴߌ ߡߊ߬ ߸ ߏ߬ ߘߐ߸ ߒ ߡߴߊ߬ ߝߐ ߘߋ߬ ߓߌ߲߬ߘߌߓߊ߲߬ߘߊ ߕߊ߬ߟߌ߬ ߞߏ߬ߖߎ߰ߦߊ ߣߌ߫ ߞߏ߫ ߜߘߍ߫ ߟߎ߬ ߡߊ߬ ߸ ߣߴߏ߬ ߕߍ߫ ߏ߬ ߛߌ߫ ߘߝߊߣߍ߲߫ ߕߴߛߋ߫ ߕߏ߫ ߟߴߌ ߓߟߏ߫ ߞߏ߫ ߌ ߘߌ߫ ߞߍ߫ ߘߎ߰ߘߋ߲ ߠߎ߫ ߖߎ߮ ߘߌ߫ ߝߣߊ߫...
ߏ߬ ߟߋ߬ ߞߐߝߍ߬ ߛߊ߫߸ߒ ߞߵߊ߬ߟߎ߬ ߡߊ߫ ߛߓߊߙߌ߫ ߊ߬ߟߎ߬ ߦߴߊ߬ ߕߏ߫ ߤߊ߲߯ ߒ ߧߋ߫ ߖߡߊ߬ߙߌ ߕߊ߬ ߞߎ߲߬ߕߌ߮ ߟߎ߬ ߝߍ߬ ߸ ߖߐ߲߬ߛߊ߫ ߒ ߣߌ߫ ߒ ߘߍ߬ߢߐ߲߮ ߠߎ߬ ߘߴߊ߬ ߞߏߢߊ ߛߍ߲߬ߛߍ߲߬ ߞߵߊ߬ ߞߌ߬ߛߍ ߟߐ߲߫ ߸ߞߵߊ߬ ߦߌ߬ߘߴߊ߬ߟߎ߬ ߟߊ߫.
ߓߊߏ߬ ،ߡߐ߰ ߡߊ߲߫ ߞߊ߲߫ ߞߵߌ ߛߌ߰ ߣߌ߲߬ ߞߏ߫ ߛߎ߮ ߘߊߝߍ߬ ߝߋߎ߫ ߸ߞߊ߬ߕߎ߲߯ ،ߓߊ߲߬ߓߊ߲߬ ߛߓߏ ߞߟߊߡߊ߲ ߠߋ߬ ߘߌ߫ ߘߌߡߊ߲߫.
ߓߊߘߋ߲߫ ߠߎ߬ ߸ ߣߌ߲߬ ߦߋ߫ ߛߎ߭ ߟߋ߬ ߘߌ߫ ߡߍ߲ ߥߊߣߍ߲ ߦߋ߫ ߠߊ߫ ߘߊ߬ߡߊ߲ ߞߣߐ߫ ߟߍߘߐ߫ ߸ ߓߊߏ߬ ߞߟߍ߬ߡߐ߰ ߞߙߎ ߘߏ߫ ߦߴߊ߲ ߓߟߏ߫ ߟߍߘߐ߫ ߛߏߕߌ߮ ߞߍ߬ߙߍߝߍ߬ ، ߏ߬ ߟߎ߬ ߟߊ߫ ߓߊ߯ߙߊ ߦߋ߫ ߡߐ߱ ߟߎ߬ ߟߊ߫ ߞߊ߲ߘߊ ߣߌ߫ ߘߊ߬ߡߊ߲ ߞߣߐ߬ߜߍ߲ ߠߋ߬ ߘߌ߫ ߞߵߊ߬ߟߎ߫ ߞߎ߲߬ ߓߐ߫ ߖߐ߬ߘߐ ߡߊ߬ ߸ ߏ߬ ߟߋ߬ ߞߏߛߐ߲߬ ߸ ߌ ߓߊ߯ ߊ߲ ߠߊ߫ ߡߙߊ߬ߓߊ߮ ߣߌ߫ ߢߍߡߐ߮ ߟߎ߬ ߦߋ߫ ߞߎߡߊ߫ ߟߊ߫ ߛߐ߲߬ ߞߏ߫ : ߊߟߎ߫ ߘߊ߬ߡߊ߲߬ ߞߣߐ߬ߟߊ ߕߴߦߋ߲߬ ߸ ߕߐ߲ߓߟߏߡߊ ߟߎ߬ ߦߋ߫ ߡߐ߱ ߞߐ߫ ߛߎ ߘߐ߫ ߛߐ߲߬߸ ߓߊߘߋ߲߫ ߓߘߍ ߟߎ߬ ߸ ߏ߬ ߓߍ߯ ߞߎ߲߭ ߦߋ߫ ߛߦߊ߬ ߛߎ߮ ߣߌ߲߬ ߡߊߕߊ߲߬ߞߊ߫ ߟߋ߬ ߘߌ߫.
ߒ߬ߞߊ߬ ߥߊߦߌߞߊ߫ ߸ ߏ߬ ߓߍ߯ ߣߴߊ߬ ߕߊ߫ ߸ ߘߏ߫ ߟߎ߫ ߘߴߊ߬ߟߎ߫ ߘߏ߲߬ ߖߐ߫ ߞߊ߬ ߕߊ߯ ߘߌ߲߬ߞߌ߬ߙߊ߬ ߛߎ߯ ߣߌ߲߬ ߘߐ߫߸ ߤߊ߲߯ ߞߊ߬ ߥߊ߫ ߛߊ߬ߦߊ ߟߊߛߋ߫ ߊ߬ߟߎ߫ ߖߍ߬ߘߍ ߡߊ߬ ߦߏ߫ ߡߍ߲ ߛߎ߮ ߞߍߣߍ߲߫ ߣߌ߲߬ .
ߏ߬ ߓߟߏߡߊ߬ ߸ ߊ߬ߟߋ߬ ߛߎ߭ ߦߋߣߍ߲߫ ߣߊ߲߬ߕߌ߰ ߞߙߎ ߏ߬ ߟߎ߬ ߟߋ߬ ߓߟߏ߫ ߛߍߣߍ߲߬ ߘߊ߬ߡߊ߲ ߞߣߐ߫ ، ߏ߬ ߟߎ߬ ߝߣߊ߫ ߞߊ߬ ߟߌ߬ߤߟߊ ߟߊߛߋ߫ ߡߐ߱ ߟߎ߬ ߡߊ߬ ߞߏ߫ ߸ ߊ߲ ߓߘߊ߫ ߡߐ߱ ߘߏ߫ ߦߋ߲߫ ߦߊ߲߬ ߘߋ߬ ߞߐ߬ߣߵߊ߬ ߛߎ߭ ߟߋ߬.
ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߡߐ߱ ߟߎ߬ ߝߎ߯ߘߌߕߏ߲ ߡߍ߲ ߠߎ߬ ߟߊߦߟߍ߬ ߟߊ߫ ߢߐ߲߮ ߞߊ߲߬ ߛߐ߲߬ ߏ߬ ߘߌ߫ ߖߐ߫ ߸ ߊ߬ ߓߐߣߍ߲߫ ߦߋ߲߬ ߠߋ߬ ߞߊ߬ ߓߋ߬ ߊ߬ ߞߎ߲߭ ߞߊ߲߬.
ߒ߬ߓߊ߬ ߸ߞߵߊ߬ ߟߊߥߟߌ߬ ߣߌ߲߬ ߞߏ ߟߊ߫ ߛߊߣߌ߲ߧߊ߫ ߡߊ߬ ߸ ߊ߬ ߣߴߊ߬ ߘߍ߬ߢߐ߲߮ ߡߍ߲ ߠߎ߬ ߞߵߌ ߘߏ߲߬ ߛߎ ߘߐ߫ ߞߊ߬ ߕߊ߯ ߛߎ ߘߐ߫ ߓߊ߯ߙߊ߫ ߦߌߟߊ ، ߣߴߊ߬ ߕߐ߯ ߞߏ߫ ߊߓߑߘߎߟ ߖߊߟߏ߲ ߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߣߌ߫ ߛߊ߰ߓߊ߬ߕߐ ߓߍ߯ ߕߘߍ߬ ߞߙߎ߫ ߞߋߟߋ߲ ߠߋ߬ ߘߐ߫ ߝߛߊߦߌ߫ ߸ ߊ߬ߟߎ߬ ߥߊߣߍ߲ ߘߏ߲߬ߠߌ߲߬ ߓߟߏ߫ ߟߋ߬ ߡߊ߬، ߞߊ߬ ߥߊ߫ ߢߍ ߡߊߛߎ߲߬ߧߊ߬ ، ߕߏ߫ ߞߍߣߍ߲߫ ߏ߬ ߟߋ ߘߐ߫ ߸ ߖߊ߰ ߊ߬ߟߎ߫ ߢߐ߲߱ ߘߏ߫ ߟߎ߫ ߝߣߊ߫ ߣߊ߬ߣߍ߲߫ ߘߏ߲߬ߠߌ߲߬ ߓߟߏߡߊ߬ ߌߞߐ߫ ߸ ߊ߬ߟߎ߬ ߓߍ߯ ߢߍߛߌ߲ߣߍ߲߫ ߢߐ߲߮ ߠߊ߫ ߛߍߣߍ߲߬ ߸ ߊ߬ߟߎ߫ ߝߣߊ߫ ߣߐ߬ ߏ߬ ߟߎ߫ ߟߋ߬ ߓߛߌ߬ߞߌ߬ ߟߊ߫ ߣߊ߲߰ߕߌ߯ ߟߎ߫ ߘߌ߫ ߛߊ߫ ߸ ߊ߬ߟߎ߬ ߕߏߣߍ߲߫ ߖߘߍ߬ ߡߞߊߘߊ߲ ߏ߬ ߟߋ ߟߊ߫ ߞߵߊ߬ߟߋ ߦߌ߬ߙߌ߲߬ߘߌ߫ ߞߊ߬ ߓߋ߬ ߊ߬ ߞߎ߲߭ ߞߊ߲߬ ،ߓߊߏ߬ ߕߌ߲ߘߌ ߏ߬ ߖߊ߰ߢߊ ߘߌ߫ ߥߊ߫ ߝߏ߯ ߜߟߊ߬ߗߡߍ߬ߘߋ߲߫ ߂߀ ߥߟߊ߫ ߃߀ ߢߐ߲߰ >> ߊ߬ ߘߍ߬ߢߐ߲߰ߗߍ߫ ߟߋ߬ ߞߊ߲߫ ߕߋ߲߬߸ ߏ߬ ߡߍ߲ ߕߘߍ߬ ߜߍ ߘߐ߫ ߞߊ߬ߣߌ߲߬.
ߞߏߕߐ ߕߐ߯ ߟߋ߬ ߞߏ߫ :ߡߐ߬ߤߊߡߍߘ ߛߊߟߌߎ߫ ߖߊ߲ߟߏ߫ ߸ ߊ߬ ߦߋ߫ ߛߊ߲߬ ߂߀ ߖߊ߬ߕߋ ߟߋ߬ ߘߐ߫.
ߊ߬ ߡߊ߫ ߝߘߎ߫ ߞߍ߫ ߘߋ߲ ߖߍ߬ߘߍ ߝߣߊ߫ ߕߴߊ߬ ߓߟߏ߫ ߌߞߐ߫ ߸ ߊ߬ߟߎ߬ ߦߴߊ߬ ߝߐ ߟߊ߫ ߕߌ߲߬ߞߎ߬ߘߎ߲߬ߙߋ߲ ߡߍ߲ ߡߊ߬ ߞߏ߫ "ߞߊߙߋߝߎߙ" ߊ߬ߟߋ ߛߌ߰ߣߍ߲߫ ߕߘߍ߬ ߦߋ߲߬ ߠߋ߬ ، ߞߐ߬ߣߵߊ߬ߟߋ ߖߍ߬ߘߍ ߦߋ߫ ߓߐ߫ ߟߊ߫ ߓߊߣߏߙߊ߫ ߟߋ߬ ߏ߬ ߦߋ߫ ߘߌ߲ߜ߭ߌߙߊߦߌ߫ ߡߊ߬ߙߊ ߟߋ߬ ߘߐ߫.
ߊߟߎ߫ ߦߴߊ߬ ߝߊ߰ߡߎ߲߬ ߞߏ߫߸ ߞߏ ߕߍ߫ ߡߍ߲ ߞߏ߫ ߘߏ߲߬ߣߍ߲߬ ߘߌ߫ ߦߏ߫ ߡߐ߱ ߟߎ߬ ߦߴߊ߬ ߟߊߞߊ߬ߟߌ߫ ߞߊ߲߬ ߢߊ߫ ߡߍ߲ ߡߊ߬ ߸ ߞߏ߫ ' ߞߟߍ߬ߡߐ߮ ߟߎ߫ ߟߋ߬ ߞߵߊ߬ߟߎ߬ ߜߍ߲߫ ߞߵߊ߬ ߕߘߍ߬ ߏ߬ ߣߌ߫ ߕߎ߬ߢߊ ߕߍ߫ ߞߊ߫ ߖߊ߲߬ ߢߐ߲߮ ߠߊ߫ ߞߏߛߓߍ߫߸ ߓߊߏ߬ ،ߊ߬ߟߎ߫ ߣߌ߫ ߣߊ߲߬ߕߌ߰ ߛߌ߫ ߡߊ߫ ߢߐ߲߮ ߦߋ߫ ߘߌ߲߬ߞߌߙߊ߫ ߏ߬ ߘߐ߫ ߟߋ߬.
ߏ߬ ߘߐ߫ ߣߴߊ߲ ߡߊ߫ ߡߊ߬ߛߎ߬ߓߊ߬ߞߏ ߣߌ߲߬ ߞߍߢߊ ߢߊߝߐ߫ ߊߟߎ߫ ߦߋ߫ ߊ߬ ߕߍ߫ ߓߍ߲߬ ،ߓߊ ߸ ߞߏ ߓߊ߯ ߞߍ߫ ߌߞߘߐ߫ ߸ ߓߍ߯ ߘߴߊ߬ ߟߊߞߊ߬ߟߌ߬ ߊ߬ ߕߊ ߢߊ ߡߊ߬ ߡߍ߲ ߣߌ߫ ߕߎ߬ߢߊ ߕߍ߫ ߞߋߟߋ߲߫ ߘߌ߫.
ߘߊ߲ߘߊߟߌߟߊ ߊߓߘߎߟߊߦߌ߬ ߓߊߛߌߙߎ߬ ߞߐ߲ߘߍ߫ ߞߵ ߊ߬ ߦߌ߬ߘߊ߬ ߌߞߐ߫ ߞߏ߫ :
ߊ߲ ߞߊ߬ ߞߕߌߞߊ߲ߘߊ ߟߊ߫ ߟߐ߲ߠߌ߲ߧߊ ،ߏ߬ ߝߣߊ߫ ߞߊ߬ ߕߌ߲ߞߌ ߝߎ߬ߙߋ ߡߊ߬ ߞߊ߬ ߓߊ߲߫ ߞߊ߬ ߖߊ߬ߡߊߙߌ ߘߌ߫ ߞߏ߫ ߞߊ߬ ߛߎ߭ ߟߊߕߊ߬ߡߌ߲߬ ߊ߬ ߟߊ߫ ߡߐ߱ ߟߎ߬ ߡߊ߫.
ߝߊ߰ߡߊ ߟߎ߬ ߞߊ߬ ߡߐ߱ ߟߎ߬ ߦߟߌߓߌ߬ߟߊ߬ ߞߏ߫ ߊ߬ߟߎ߬ ߦߋ߫ ߛߊ߬ߙߌ߬ߦߊ ߟߎ߬ ߡߊߓߎ߲߬ߧߊ߬ ߞߊ߬ ߘߊ߲߬ ߝߊ߰ߡߊ ߞߎߡߊ߫ ߞߊ߲߫ ߠߎ߬ ߟߊ߫ ߸ ߛߊ߫ ߏ߬ ߘߌ߫ ߞߍ߫ ߛߊߓߎ߫ ߢߌߡߊ ߘߌ߫ ߞߊ߬ ߥߊ߬ߥߎ߬ߟߋ߲߬ ߛߎ߯ ߣߌ߲߬ ߡߊߕߊ߲߬ߞߊ߬.
Silabosoona.com
ߣߊߡߊ߲߬ߖߊ߲߫ ߡߐ߰ߟߊ߲߬ߘߌ߫ ߡߊ߰ߛߎ߬ߓߊ߬ ߓߟߏ߫.
