ߟߞߊ߬ߙߊ߲߬ߠߌ߲߬ߠߊ ߡߍ߲ ߠߎ߬ ߦߋ߫ ߛߊߛߋ ߞߎ߲߬ߞߘߐ߫ ߞߊ߲ߞߊ߲߫ ߕߌ߲߬ߞߎߘߎ߲ ߘߐ߫߸ ߣߴߊ߬ߟߎ߫ ߣߍ߰ߓߐ߬ߣߍ߲߫ ߝߘߏ߬ߓߊ߬ ߗߋߘߊ ߟߎ߫ ߕߊ߬ߟߌ߬ ߞߏ ߘߐ߫߸ ߏ߬ ߟߎ߫ ߞߊ߬ ߔߊߞߌߛߦߊ ߟߋ߬ ߞߍ߫ ߞߊ߲ߞߊ߲߫ ߂߀߂߅ ߞߏ߲ߞߏߘߓߌ ߕߋ߬ߟߋ߫ ߃ ߡߊ߬، ߊ߬ߟߎ߬ ߛߌߦߊߡߊ߲߫ ߠߋ߬ ߞߵߊ߬ߟߎ߬ ߟߊߘߍ߬ ߞߵߊ߬ߟߎ߬ ߟߊ߫ ߣߌߛߐߜߏߦߊ ߦߌ߬ߘߊ߬߸ ߊ߬ߟߎ߬ ߘߊ߲ߞߎ߲ߓߊߟߌߦߊ ߞߏߛߐ߲߬ ߕߊ߬ߟߌ߫ ߕߊ߬ߡߌ߲߬ߣߍ߲ ߢߌ߲߬ ߠߎ߬ ߘߐ߫ ߜߍ ߘߐ߫ ߓߍ߯ ߢߣߊ߫ ߕߋߟߋ߲ߓߊߟߌߦߊ ߟߊ߫߸ ߊ߬ ߣߌ߫ ߟߊ߬ߤߘߌ߬ ߡߝߊ߬ߓߊߟߌߦߊ ߘߐ߫ ߝߊ߰ߡߊ ߟߎ߬ ߓߟߏ߫.
ߊ߬ߟߎ߬ ߛߌߦߊߡߊ߲߫ ߠߋ߬ ߓߐ߫ ߘߊ߫ ߡߙߊ߬ߓߊ߰ߘߊ ߟߎ߬ ߞߣߐ߫ ߞߊ߬ ߣߊ߬ ߞߊ߲ߞߊ߲߫߸ ߗߍ߭ ߟߎ߬ ߣߌ߫ ߡߏ߬ߛߏ ߟߎ߬߸ ߞߊ߲ߞߊ߲߫ ߡߙߊ߬ߓߊ߰ߘߊ߬ ߟߏ߯ߟߎ ߡߎ߰ߡߍ ߞߐߦߌ߬ߘߊ߬ߣߍ߲߫ ߕߍ߬ߘߍ߫ ߊ߬ߟߎ߬ ߘߐ߫، ߊ߬ߟߎ߬ ߟߊ߫ ߕߊ߯ߡߊ ߖߎ߭ߛߌ߰ ߘߊ߫ ߢߐ߲߬ߞߌ߲߬ߘߊ ߟߋ߬ ߟߊ߫߸ ߞߊ߬ ߓߐ߫ ߦߋ߲߬ ߞߵߊ߬ߟߎ߬ ߛߌ߲߫ ߞߊ߲ߞߊ߲߫ ߕߌ߲߬ߞߎߘߎ߲ ߟߞߊ߬ߙߊ߲߬ߠߌ߲ ߜߋ߬ߟߎ߲߬ߠߌ߲߬ߘߊ ߟߊ߫߸ ߊ߬ ߣߌ߫ ߡߙߊ߬ߓߊ߰ߘߊ ߟߞߊ߬ߙߊ߲߬ߠߌ߲ ߗߋߕߌ߯ߘߊ ߣߌ߫ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ߫.
ߊ߬ߟߎ߬ ߣߌ߫ ߥߊ߲߬ߥߊ߲ ߠߋ߬ ߕߘߍ߬ ߕߊ߯ߡߊ ߣߌ߲߬ ߘߐ߫߸ ߊ߬ߟߎ߬ ߟߊ߫ ߡߞߊ߬ߛߟߌ߬ ߞߊ߲ ߠߎ߬ ߛߓߍߣߍ߲߫ ߡߍ߲ ߠߎ߬ ߞߊ߲߬߸ ߊ߬ߟߎ߬ ߦߋ߫ ߞߊ߬ߛߌ߬ ߟߴߊ߬ߟߎ߬ ߟߊ߫ ߝߊ߲ߞߊ߲ ߞߟߊ߬ߣߐ߬ߦߊ߬ ߞߏ ߟߋ߬ ߘߐ߫߸ ߛߴߊ߬ߟߎ߬ ߘߌ߫ ߕߊ߬ ߝߘߏ߬ߓߊ߬ ߗߋߘߊߕߌ߯ߦߊ ߘߐ߫، ߊ߬ߟߎ߬ ߟߊ߫ ߛߙߊߕߌ߫ ߝߐߣߍ߲ ߠߎ߬ ߦߴߊ߬ ߦߌ߬ߘߊ߬ ߟߊ߫߸ ߞߏ߫ ߊ߬ߟߎ߫ ߛߊ߲߬ ߦߙߌߞߊ ߟߋ߬ ߕߋ߲߬߸ ߞߌ߬ߛߍ߬ ߕߍ߫ ߖߓߊ߬ ߘߐ߫ ߞߵߊ߬ ߓߍ߲߬ ߊ߬ߟߎ߫ ߞߎ߲߬ߞߏ ߟߎ߬ ߢߣߊߓߐ ߡߊ߬.
ߡߎߛߊ߫ ߖߊ߬ߞߌ߬ߕߋ߬ ߡߍ߲ ߦߋ߫ ߟߞߊ߬ߙߊ߲߬ߠߌ߲߬ߠߊ߫ ߕߊ߬ߓߊߟߌ ߟߎ߬ ߟߊ߫ ߢߌ߲߬ߘߍ ߞߎ߲߬ߠߊ߫߸ ߏ߬ ߞߊ߬ ߛߙߊ߬ߣߎ߲ ߕߊ߬ ߟߋ߬ ߊ߬ߟߎ߬ ߟߊ߫ ߟߐ߬ߟߌ߬ ߘߊߞߎ߲ ߠߎ߬ ߘߐ߫߸ ߞߵߊ߬ߟߎ߬ ߡߙߌߣߊ߲ ߠߎ߬ ߦߌ߬ߘߊ߬߸ ߞߵߊ߬ߟߎ߬ ߟߊ߫ ߜߊ߬ߒ߬ߠߊ ߣߴߊ߬ߟߎ߬ ߟߊ߫ ߘߌߡߌ߲ ߠߎ߬ ߦߌ߬ߘߊ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߟߞߊ߬ߙߊ߲߬ߠߌ߲߬ߠߊ߫ ߕߊ߬ߓߊߟߌ ߛߌߦߊߡߊ߲߫ ߠߋ߬ ߦߋ߲߬߸ ߡߍ߲ ߠߎ߬ ߓߘߊ߫ ߝߊߕߏ߫ ߢߜߊ߫ ߞߌߛߍ߫ ߥߎߟߋ߲ ߕߍߡߊ߬߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߡߊ߫ ߕߊ߬، <<ߊ߲ ߓߘߊ߫ ߕߊ߯ߡߊ߫ ߛߌߦߊߡߊ߲߫ ߞߍ߫߸ ߞߵߊ߬ ߕߊ߬ ߞߐߖߋߓߌ ߟߎ߬ ߟߊߓߐ߫ ߡߊ߬ ߤߊ߲߯ ߕߋ߲߬߸ ߊ߲ ߡߊ߫ ߛߋ߫ ߞߎߡߊ߫ ߖߐ߲ߖߐ߲߫ ߛߌ߫ ߛߐ߬ߘߐ߲߬ ߠߊ߫، ߊ߲ ߠߊ߫ ߝߘߏ߬ߓߊ߬ ߓߐߟߌ ߣߌ߲߬ ߦߋ߫ ߛߌߟߊ߫ ߟߋ߬ ߘߌ߫ ߡߎ߬ߕߎ߲߬߸ ߛߴߊ߲ ߘߌ߫ ߟߊߡߍ߲߫، ߊ߲ ߧߋ߫ ߡߍ߲ ߝߍ߬ ߘߐߙߐ߲߫߸ ߏ߬ ߟߋ ߊ߲ ߠߊ߫ ߕߊ߬ߟߌ߬ߞߏ ߝߊ߲ߞߊ߲ ߞߟߊ߬ߣߐ߬ߦߊ ߘߌ߫ ߝߘߏ߬ߓߊ߬ ߗߋߘߊߕߌ߯ߦߊ ߘߐ߫߸ ߦߏ߫ ߊ߲ ߘߍ߬ߢߐ߲߮ ߠߎ߫ ߕߊ߬ ߘߊ߫ ߢߊ ߡߍ߲ ߡߊ߬.>> ߡߎߛߊ߫ ߖߊ߬ߞߌ߬ߕߋ߫ ߟߋ߬ ߞߊ߬ ߣߌ߲߬ ߝߐ߫.
ߞߊ߲ߞߊ߲߫ ߕߌ߲߬ߞߎߘߎ߲ ߟߊ߬ߞߟߏ߬ߞߟߏ߬ߟߌ ߜߋ߬ߟߎ߲߬ߠߌ߲߬ߠߊ߬ ߛߙߍߞߍ߸ ߡߎߛߊ߫ ߞߋߕߊ߬ ߞߊ߬ ߔߊߞߌߛߦߊߟߊ ߟߎ߬ ߞߎߟߎ߲ߖߋ߫ ߊ߬ߟߎ߬ ߟߊ߫ ߓߐߟߌ ߣߌ߲߬ ߞߍ ߘߐ߫ ߡߊ߬ߝߊ ߣߌ߫ ߖߐ ߞߣߐ߫، ߞߊ߬ ߓߊ߲߫ ߞߊ߬ ߟߊ߬ߤߘߌ ߕߊ߬ ߞߏ߫ ߊ߬ ߓߍߣߵߊ߬ߟߎ߬ ߟߊ߫ ߡߞߊ߬ߛߌ߬ ߞߊ߲ ߠߎ߬ ߟߊߦߟߍ߬ ߛߊ߲ߝߍ߫ ߡߐ߮ ߟߎ߫ ߡߊ߬، <<ߊߟߎ߫ ߟߊ߫ ߕߊ߯ߡߊ ߣߌ߲߬ ߦߋ߫ ߖߡߊ߬ߣߊ߬ߘߋ߲߬ ߓߘߍ߬ߦߊ ߣߌ߫ ߛߊ߬ߙߌ߬ߦߊ ߟߋ߬ ߞߣߐ߫ ߝߛߊߦߌ߫، ߊߟߎ߫ ߓߘߊ߫ ߓߐ߫ ߛߊ߬ߙߌ߬ߦߊ߬ ߡߊ߬ߓߏ߲ߧߊ ߞߣߐ߫߸ ߢߊ ߡߊ߲߫ ߞߊ߲߫ ߞߊ߬ ߖߐ߬ ߦߙߐ ߏ߬ ߡߊ߬ ߝߋߎ߫، ߒ ߓߘߊ߫ ߟߊ߬ߤߘߌ ߕߊ߬ ߞߏ߫ ߒ ߘߴߊߟߎ߫ ߟߊ߫ ߞߎߡߊ ߣߌ߲߬ ߠߊߛߋ߫ ߊ߬ ߟߊߛߋ߫ ߦߙߐ ߘߐ߫ ߓߌ߬ ߡߎ߰ߡߍ.>> ߡߎߛߊ߫ ߞߋߕߊ߬ ߟߋ߬ ߞߊ߲߫ ߕߋ߲߬߸ ߊ߬ ߞߊ߬ ߟߞߊ߬ߙߊ߲߬ߠߌ߲߬ߠߊ ߟߎ߬ ߞߟߊߓߎߘߏ߲߬ ߡߊ߬ߝߊ ߟߊ߫߸ ߊ߬ ߣߌ߫ ߞߟߊߓߎ ߟߊ߫߸ ߊ߬ߟߎ ߡߍ߲ ߠߎ߬ ߦߋ߫ ߖߡߊ߬ߣߊ ߟߊ߫ ߛߌߣߌ߲߫ ߘߐߓߍ߲߬ߓߊ߮ ߟߎ߬ ߘߌ߫ ߞߊ߬ߣߌ߲߬.
ߊ߬ߟߎ߬ ߛߋ ߞߎ߲߬ߠߊ߬ߛߌ߰ߟߊ߫߸ ߊ߬ߟߎ߬ ߡߊ߫ ߞߎ߲߬ߠߊ߬ߛߌ߰ߟߊ ߖߍ߬ߘߍ ߦߋ߫߸ ߏ߬ ߡߍ߲ ߦߋ߫ ߕߊ߯ߡߊ ߘߐ߫ ߞߐߣߊߞߙߌ߫ ߕߋ߲߬ ߞߊ߬ߣߌ߲߬، ߓߊ߬ߙߌ߬߸ ߟߊ߱ߖߌ߬ ߊߓߎߓߞߊߙ ߕߎ߲߬ߞߙߊ ߡߍ߲ ߦߋ߫ ߞߎ߲߬ߠߊ߬ߛߌ߰ߟߊ ߟߊ߫ ߘߊ߯ߘߐ ߞߎ߲߫߬ߕߌ߮ ߘߌ߫߸ ߏ߬ ߞߵߊ߬ߟߎ߬ ߟߊߞߢߐ߬ߡߊ߬، ߏ߬ ߞߊ߬ ߟߞߊ߬ߙߊ߲߬ߠߌ߲߬ߠߊ ߟߎ߬ ߞߎߟߎ߲ߖߋ߫߸ ߞߊ߬ ߓߊ߲߫ ߞߵߊ߬ߟߎ߫ ߟߐ߬ ߊ߬ߟߎ߬ ߟߊ߫ ߡߞߊ߬ߛߟߌ߬ߞߊ߲߬ߠߊ ߟߎ߬ ߘߊߘߐߓߍ߲߬ ߠߊ߫ ߦߟߌߣߐ ߘߌ߫߸ ߡߍ߲ ߘߌ߫ ߛߌ߰ ߞߎ߲߬ߠߊ߬ߛߌ߰ߟߊ ߢߍ߫߸ ߊ߬ ߓߊ߯ ߣߊ߬ ߌߞߘߐ߫ ߞߵߏ߬ ߦߌ߬ߘߴߊ߬ ߟߊ߫.
ߊ߬ߟߎ߬ ߕߊ߯ ߘߴߊ߬ߟߎ߬ ߟߊ߫ ߕߊ߫ߡߊ ߣߌ߲߬ ߞߎ߲߭ߝߊ߰ ߕߌ߲߬ߓߏ߲߫ ߠߋ߬߸ ߞߊ߲ߞߊ߲߫ ߕߌ߲ߓߌߘߌ߲ߘߓߊ ߢߍߓߊ߮ ߦߋ߫ ߦߋ߲߬ ߡߍ߲ ߘߐ߫ ߞߊ߬ߣߌ߲߬، ߖߐ߲߲߰ߛߊ߫ ߏ߬ ߝߣߊ߫ ߘߌ߫ ߘߎ߬ߥߊ߬ߥߎ ߞߍ߫ ߊ߬ߟߎ߬ ߦߋ߫߸ ߦߏ߫ ߊ߬ߟߎ߬ ߕߊ߯ ߘߊ߫ ߘߎ߬ߥߊ߬ߥߎ ߢߌߣߌ߲߫ ߢߐ߲߬ߞߌ߲߬ߘߊ ߟߊ߫ ߢߊ ߡߍ߲ ߡߊ߬، ߏ߬ ߟߵߊ߬ ߦߌ߬ߘߊ߬ ߟߊ߫ (ߞߵߊ߬ ߓߍ߲߬ ߊ߬ߟߎ߬ ߘߊߘߐߞߊ߲ ߠߎ߬ ߡߊ߬)߸ ߞߏ߫ ߊ߬ߟߎ߬ ߕߍ߫ ߣߌ߫ ߣߌ߫ ߝߊ߬ߛߊ߫ ߝߍ߬ ߣߌ߲߬ ߞߏ ߘߐ߫߸ ߓߊ߬ߙߵߊ߬ߟߎ߬ ߦߋ߫ ߡߍ߲ ߞߐ߫߸ ߏ߬ ߟߋ ߊ߬ߟߎ߫ ߕߊ߭ ߘߌ߫߸ ߞߵߊ߬ߟߎ߬ ߢߌߣߌ߲ߞߏ ߟߎ߬ ߞߍ߫ ߊ߬ߟߎ߬ ߦߋ߫ ߕߋߟߋ߲ ߞߣߐ߫.
ߟߞߊ߬ߙߊ߲߬ߠߌ߲߬ߠߊ ߟߎ߬ ߟߊ߫ ߞߏ ߞߏ߬ߣߌ߲ ߓߘߊ߫ ߞߍ߫ ߞߏ߫ ߘߌ߫ ߓߌ߬߸ ߢߊ ߞߊ߫ ߞߊ߲߫ ߞߊ߬ ߕߏ߫ ߡߍ߲ ߝߍ߬، ߓߊߏ߬߸ ߓߍ߯ ߛߐ߲߬ߣߍ߲߫ ߊ߬ ߡߊ߬ ߞߏ߫ ߞߊ߬ߙߊ߲߬ߡߐ߰ ߞߏ߬ߖߊ ߦߋ߫ ߦߙߐ߫ ߛߌߦߊߡߊ߲߫ ߘߐ߫، ߓߊ߬ߙߌ߬ ߤߊ߲߯ ߕߋ߲߬߸ ߘߏ߫ ߟߎ߫ ߕߊ߬ ߞߏ ߓߘߊ߫ ߝߐ߫ ߏ߬ ߟߎ߬ ߡߊ߫ ߕߊ߬، ߊ߬ ߞߏ߬ߣߌ߲߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߣߌ߫ ߞߌ߬ߛߍ߬ ߡߊ߫ ߦߋ߫ ߖߓߊ߬ ߘߐ߫ ߣߌ߲߬ ߝߣߊ߫ ߞߐߝߍ߬߸ ߞߏ߫ ߊ߬ߟߎ߬ ߓߍߣߊ߬ ߓߐ߫ ߛߌߟߊ߫ ߜߘߍ߫ ߟߎ߫ ߘߌ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߆߂߀߉߁߇߁߀߄
