ߖߌ߬ߣߍ߫ ߢߊ߬ߙߊ ߟߎ߬ ߦߋ߫ ߛߎ߬ߣߎ߲ ߖߍ߬ߘߍߖߍ߬ߘߍ ߟߋ߬ ߘߐ߫ ߕߋ߲߬߸ ߞߵߏ߬ ߞߎ߲߭ ߞߍ߫ ߡߎ߲߬ ߞߋߟߋ߲߫ ߘߌ߫߹ ߓߍ߯ ߟߊߘߍ߬ߣߍ߲ ߞߊ߬ ߗߍ߬ߓߊ߬ ߞߋߟߋ߲ ߡߍ߲ ߟߐ߲߫߸ ߦߟߍߡߊߞߏߟߊߓߐߟߊ߫ ߢߐ߲߰ߦߋ߬ߜߏ߸ ߓߙߊߘߐߦߟߊ߫ ߞߎߛߊ߲߸ ߡߎߛߊ߫ ߞߏ߬ߝߏߦߌ߬ ߟߋ߬ ߝߊߕߏߣߍ߲߫ ߞߐ߬ߓߊ߬ߟߏ߲ ߂߀߂߅ ߘߓߊ߬ߕߊ ߕߟߋ߬ ߁߂ ߡߊ߬߸ ߞߵߊ߬ ߛߌ߬ߞߛߊߓߌ ߕߏ߫ ߛߊ߲߬ ߆߇ ߘߐ߫، ߏ߬ ߞߍ߫ ߘߊ߫ ߞߌ߲ߘߌߦߊ߫ ߟߋ߬߸ ߖߊ߲߬ߞߊߙߏ߫ ߞߎ߲߬ߘߐ߬ߛߎߘߎ߲ ߘߏ߫ ߞߐߝߍ߬.
ߊ߬ߟߋ ߡߍ߲ ߞߵߊ߬ ߟߊ߫ ߢߣߊߡߦߊ ߟߊߝߟߐ߫ ߞߙߊߟߌ ߡߊ߬߸ ߞߊ߬ ߣߊ߬ ߞߍ߫ ߝߊ߬ߥߏ߬ߟߊ߬ߓߐ߬ߟߊ߫ ߛߘߊߡߊ߫ ߕߐ߯ߕߌ߮ ߘߌ߫߸ ߖߌ߬ߣߍ߬ߞߊ ߓߍ߯ ߞߊ߬ ߡߍ߲ ߟߐ߲߫߸ ߝߘߊ߬ߝߌ߲߬ߠߊ߫ ߕߟߋ߬ߓߋ ߝߊߣߍ߲߫ ߡߍ߲ ߠߊ߫ ߞߏ ߘߐ߫. ߌ ߢߊ ߕߎ߲߬ ߓߊ߯ ߟߊ߫ ߞߏ߬ߝߏߦߌ߬ ߞߊ߲߬ ߌߞߘߐ߫߸ ߌ ߘߌ߫ ߦߟߍ ߦߋ߫ ߦߋ߫ ߢߊ ߘߐ߫߸ ߊ߬ ߞߎߡߊ߫ ߢߊ ߘߐ߫߸ ߊ߬ ߡߊߛߘߌ߬ ߢߊ ߘߐ߫، ߊ߬ ߞߍ߫ ߘߊ߫ ߡߐ߰ ߟߋ߬ ߘߌ߫߸ ߡߍ߲ ߠߊ߫ ߦߟߍߡߊߞߏ ߟߎ߬ ߞߍ߫ ߘߊ߫ ߘߏ߲߬ ߝߋ߲߫ ߘߌ߫ ߓߍ߯ ߡߊ߬.
ߞߏ߬ߝߏߦߌ߬߸ ߊ߬ߟߋ ߡߍ߲ ߕߐ߯ ߓߘߍ ߦߋ߫ ߡߎߛߊ߫ ߞߋߕߊ߬ ߘߌ߫߸ ߊ߬ ߛߐ߬ߘߐ߲߬ ߘߊ߫ ߁߉߅߀ ߟߋ߬ ߟߊ߫߸ ߞߐߣߊߞߙߌ߫ ߛߏ ߞߣߐ߫، ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߘߏ߫ ߟߎ߫ ߦߴߊ߬ ߛߐ߬ߘߐ߲߬ ߦߙߐ ߞߍ߫ ߟߊ߫ ߞߌ߲ߘߌߦߊ߫ ߘߌ߫، ߓߊ߬ߙߌ߬߸ ߊ߬ߟߋ߫ ߖߍ߬ߘߍ ߟߊ߫ ߘߟߊߛߎ߲ߓߎߟߌ ߘߏ߫ ߞߍ߫ ߘߊ߫ ߂߀߂߄ ߠߊ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߛߐ߬ߘߐ߲߬ ߘߊ߫ ߞߐߣߊߞߙߌ߫ ߟߋ߬߸ ߊ߬ ߝߊ߬ ߞߊ߬ ߟߐ߬ߟߌ ߓߍ߯ ߞߍ߫ ߦߋ߲߬.
ߞߊ߬ߦߌ߯ ߊ߬ ߟߊ߫ ߘߋ߲ߣߍ߲ߧߊ ߕߎ߬ߡߊ ߏ߬ ߟߋ ߟߊ߫߸ ߡߐ߱ ߟߎ߬ ߞߵߊ߬ ߟߊߞߙߐ߬ߛߌ ߘߊߡߌ߬ߣߊ߫ ߡߐ߰ ߟߊ߬ߘߍ߲߮ ߠߎ߬ ߘߐ߫߸ ߦߟߍߡߊߞߏ߫ ߟߊߓߐ ߟߎ߬ ߘߐ߫، ߝߊߦߌߘߊ߫߸ ߊ߬ ߣߴߊ߬ ߕߊ ߏ߬ ߛߐ߬ߘߐ߲߬ߣߍ߲߫ ߠߋ߬، ߓߊߏ߬߸ ߞߊ߬ߦߌ߯ ߊ߬ ߡߊ߫ ߓߘߍ߬ ߓߐ߫߸ ߊ߬ ߕߘߍ߬ ߡߐ߱ ߟߎ߬ ߢߣߊߕߍ߰ ߟߊ߫ ߞߊߙߏߜߍ ߟߎ߬ ߟߊ߫߸ ߊ߬ ߣߌ߫ ߕߏߟߏ߲߫ ߦߙߐ ߟߎ߬ ߘߐ߫.
ߡߎߛߊ߫ ߞߋߕߊ߬߸ ߓߍ߯ ߦߋ߫ ߡߍ߲ ߞߟߌ߫ ߟߊ߫ ߞߏ߫ ߞߏ߬ߝߏߦߌ߬߸ ߊ߬ ߞߊ߬ ߦߙߐ ߟߎ߬ ߟߊߝߏ߭ ߘߊߡߌ߬ߣߊ߬ ߈߀ ߝߊ߲߬ߝߍ߬ߟߊ ߟߎ߫ ߟߋ߬ ߘߐ߫߸ ߞߵߊ߬ ߟߊ߫ ߞߏ ߞߍ߫ ߛߘߊߞߘߎ߬ߛߘߊ ߘߌ߫، ߤߊ߲߯ ߊ߬ ߣߌ߫ ߡߊ߬ߡߊ߬ߘߌ߬ ߞߎߦߊߕߍ߫ ߣߊ߬ ߘߊ߫ ߘߏ߲߬ ߢߐ߲߮ ߘߐ߫߸ ߏ߬ ߡߍ߲ ߕߎ߲߬ ߦߋ߫ ߞߟߌ߫ ߟߊ߫ ߞߏ߫ ߞߎ߲߬ߕߏ߬ߞߏ߫، ߊ߬ߟߎ߬ ߟߊ߫ ߘߍ߭ ߞߍ߫ ߘߊ߫ ߛߊߓߎ߫ ߘߊ߫߸ ߞߵߊ߬ߟߎ߫ߎ ߝߌ߬ߟߊ ߓߍ߯ ߞߍ߫ ߛߊ߲ߡߊߟߏߟߏ ߘߌ߫ ߖߡߊ߬ߣߊ ߞߣߐ߫߸ ߞߵߊ߬ߟߎ߬ ߟߊ߫ ߖߌ߬ߦߊ߬ߖߟߎ ߟߎ߬ ߞߍ߫ ߢߊ߬ߒ߬ߞߐ߬ߓߊߟߌ ߣߌ߫ ߞߎ߲ߝߊ߲߫ ߡߊ߫ ߝߋ߲ ߘߌ߫، ߊ߬ߟߎ߫ ߞߊ߬ ߖߡߊ߬ߣߊ ߞߣߐߟߊ ߟߎ߬ ߘߐߦߊ߯ߟߊ߫ ߢߐ߲߯ ߝߍ߫߬ ߞߋߟߋ߲ߘߌ߫، ߛߌߞߊ߫ ߕߴߊ߬ ߘߐ߫߸ ߊ߬ߟߎ߫ ߝߌ߬ߟߊ ߣߌ߲߬ ߛߌ߫ ߟߊ߫ ߞߏ ߕߍ߫ ߓߐ߫ ߡߌ߬ߙߌ߲߬ߘߌ ߞߣߐ߫ ߏ߬ ߞߐ߫.
ߡߎߛߊ߫ ߞߏ߬ߝߏߦߌ߬߸ ߊ߬ ߡߊ߫ ߡߐ߱ ߟߎ߬ ߟߊߦߟߍ ߢߌߣߌ߲߫ ߊ߬ ߢߊ ߟߊ߫ ߘߋ߬߸ ߦߟߍ ߟߋ߬ ߜߎ ߕߘߍ߬ ߊ߬ߟߋ ߢߌߣߌ߲߫ ߠߊ߫، ߊ߬ ߟߊ߫ ߖߌ߬ߦߊ߬ߖߟߎ ߟߎ߬ ߦߴߏ߬ ߟߊߒߡߊ ߘߏ߫ ߟߎ߫ ߟߋ߬ ߘߌ߫߸ ߦߏ߫ ߊ߬ ߟߊ߫ ߡߐߙ ߝ߭ߌߝ߭ߊ߲ ߖߌ߬ߦߊ߬ߖߟߎ، ߡߊ߭ߜߊ߲߬ߣߊ߲، ߓߊ߲߬ߖߘߍ߬ߦߋ، ߍ߲ ߝ߭ߌߟߊߖ߭ߎߥߊ ߊ߬ ߔߊ߬ߙߌ߬. ߊ߬ ߟߊ߫ ߞߎ߬ߛߊ߲߬ߧߊ ߡߊ߬߸ ߊ߬ ߞߊ߬ ߖߌ߬ߣߍ߫ ߖߡߊ߬ߣߊ ߞߐߛߊ߬ߥߏ߬߸ ߞߊ߬ ߘߎߢߊ߫ ߟߊߝߏ߬، ߏ߬ ߟߋ ߘߐ߫߸ ߂߀߁߆ ߟߊ߫߸ ߞߊ߬ ߝߘߊ߬ߝߌ߲߬ߊߠ߫ ߕߟߋ߬ߓߋ ߝߊ߬ߥߏ߬ߟߊ߬ߓߐ߬ߟߊ߫ ߢߐ߲߰ߕߍ߬ ߞߐ߲ߘߐ߲ ߛߐ߬ߘߐ߲߬߸ <<ߦߟߍߓߜ߭ߎ߫ ߝߐߟߌߜߙߊ>> ߛߋ߲߭ߝߍ߬، ߏ߬ ߞߵߊ߬ ߕߐ߮ ߛߊ߲ߞߘߐߕߊ߬ ߞߏߞߎߘߊ߫.
ߞߏ߬ߝߏߦߌ߬ ߘߏ߲߬ ߞߍ߫ ߘߊ߫ ߡߐ߰ ߟߋ߬ ߘߌ߫߸ ߡߍ߲ ߞߵߊ߬ ߛߎ߯ ߛߌߦߊߡߊ߲߫ ߠߊߘߊ߲߫߸ ߦߟߍߡߊߞߏ ߛߌߟߊ ߝߍ߬߸ ߖߏ߯ߘߏ߲ ߘߐ߫߸ ߊ߬ ߣߌ߫ ߓߍ߲߭ ߠߊߛߓߊ߬ߕߌ ߘߐ߫ ߖߡߊ߬ߣߊ ߞߣߐ߫߸ ߞߊ߬ ߛߋ߫ ߟߊ߬ߟߌ߬ߟߌ ߞߍ߫ ߟߊ߫ ߖߌ߬ߦߊ߬ߖߟߎ ߘߐ߫، ߞߊ߬ ߟߊ߬ߟߌ߬ߟߌ ߞߍ߫ ߦߟߍߡߊߞߏ ߘߐ߫، ߊ߬ ߞߍ߫ ߘߊ߫ ߡߐ߰ ߟߋ߬ ߘߌ߫߸ ߡߍ߲ ߡߊ߫ ߞߍ߫ ߞߏ߫ ߡߊߦߟߍߡߊ߲ ߝߍ߬، ߞߏ߬ߝߏߦߌ߬ ߝߊߕߏ߫ ߘߊ߫ ߞߊ߬ ߡߏ߬ߛߏ߫ ߛߊ߬ߓߊ߫ ߟߋ߬ ߕߏ߫߸ ߊ߬ ߣߌ߫ ߘߋ߲߫ ߡߐ߰ ߉، ߊ߬ ߘߏ߲߬ ߞߍ߫ ߘߊ߫ ߡߐ߰ ߟߋ߬ ߘߌ߫߸ ߡߍ߲ ߡߊ߫ ߢߌ߬ߣߴߊ߬ ߓߐߛߎ߲ ߞߐ߫ ߡߎ߰ߡߍ߫.
ߓߊ߬ߙߌ߬ ߓߊߘߋ߲ ߠߎ߬߸ ߊ߬ ߛߊ߲߬ ߘߊ߲ߘߐ ߟߋ߬ ߕߋ߲߬߸ ߞߏ߬ߝߏߦߌ߬ ߕߴߊ߬ ߝߊ߬ߘߌ߬ ߘߐ߫، ߊ߬ ߞߊ߬ ߓߌ߬ߟߊ߬ߒ߬ߘߐ߬ߖߎ߰ߓߊ ߘߏ߫ ߞߍ߫ ߂߀߂߃ ߟߊ߫߸ ߏ߬ ߞߵߊ߬ ߛߍ߰ ߞߏߛߓߍ߫، ߞߵߊ߬ ߟߴߊ߬ ߞߊ߲߬߸ ߗߊߥߎ߲ ߦߴߊ߬ ߟߊ߫߸ ߞߟߏߘߐߘߌߡߌ߲، ߊ߬ ߘߊ߲߬ ߕߴߏ߬ ߘߌ߫ ߘߋ߬߸ ߘߊ߲ߘߊߟߌߟߊ ߟߎ߬ ߞߊ߲߫ ߞߏ߫ ߛߐ߰ߛߐ߰ߣߍ߲߬ߜߍ߬ ߘߊ߲ߘߓߊߟߌ. ߒ߬ߓߊ߬߸ ߖߐ߲߬ߣߍ߲ ߦߴߊ߬ ߕߊ߫ ߘߐ߫߸ ߊߟߊ߫ ߦߴߊ߬ ߕߊ߫ ߘߐ߫، ߞߏ ߟߎ߬ ߛߓߊߓߎ ߦߋ߫ ߘߏ߲߬ ߠߊ߫ ߞߏ ߘߏ߫ ߟߋ߬ ߝߣߊ߫ ߘߐ߫، ߏ߬ ߟߋ ߘߐ߫߸ ߂߀߂߅ ߘߓߊ߬ߕߊ ߕߟߋ߬ ߁߂ ߡߊ߬߸ ߏ߬ ߡߍ߲ ߓߍ߲߬ ߘߊ߫ ߞߐ߬ߓߊ߬ߟߏ߲ ߡߊ߬ ߞߊ߬ߣߌ߲߬، ߏ߬ ߟߏ߲ ߛߐ߰ߡߊ߬ߟߊ ߟߋ߬ ߞߍ߫ ߘߊ߫ ߞߏ߬ߝߏߦߌ߬ ߟߊ߫ ߘߎߢߊ߫ ߕߏ߫ ߟߏ߲ ߘߌ߫، ߒ߬ߓߊ߬߸ ߊ߬ ߞߵߊ߬ ߝߐ߫ ߊ߬ ߟߊ߫ ߓߐ߬ߟߐ߲߬ߞߊ ߦߋ߫ ߏ߬ ߟߏ߲ ߠߋ߬߸ ߊ߬ ߟߊ߫ ߓߐ߬ߟߐ߲߬ߞߊ ߡߍ߲ ߕߐ߯ ߞߏ߫ ߘߐ߰ߡߊ߲߬ߣߍ߲߫ ߣߊ߬ߓߋ߬߸ ߊ߬ ߞߵߊ߬ ߝߐ߫ ߏ߬ ߦߋ߫ ߏ߬ ߟߏ߲ ߠߋ߬ ߞߏ߫: <<ߓߌ߬߸ ߊ߬ ߓߍ߯ ߓߘߊ߫ ߓߊ߲߫>>
ߛߐ߰ߡߊ߬ߘߊ ߟߊ߫߸ ߘߐ߰ߡߊ߲߬ߣߍ߲ ߣߌ߫ ߞߏ߬ߝߏߦߌ߬ ߓߍ߯ ߟߋ߬ ߕߊ߯ ߘߊ߫ ߘߊ߲ߘߊߛߏ ߟߊ߫ ߞߋߟߋ߲ߘߌ߫ ߕߏߟߏ߲߫ ߣߌ߫ ߦߟߍ ߘߌ߫، ߊ߬ߟߎ߬ ߕߊ߯ ߘߊ߫ ߘߡߊߞߊߣߌߦߊ߫ ߕߙߌߔߊߣߏ ߟߋ߬ ߟߊ߫߸ ߊ߬ ߛߋ ߞߐ ߦߋ߲߬ ߕߎ߬ߡߊ߬ߙߋ߲߬ ߘߊ߲ߘߐ߫߸ ߊ߬߬ ߞߊ߬ ߡߊ߰ߙߌ ߟߊ߫ ߞߟߌߟߌ ߟߊߡߌ߬ߘߊ߬߸ ߖߋ߬ߟߌ߬ߓߐ߬ ߛߌߦߊߡߊ߲ ߞߐߝߍ߬ (ߓߊߏ߬ ߊ߬ ߕߘߍ߬ ߝߐ߯ߣߐ߫ ߟߊ߫ ߖߋ߬ߟߌ ߟߋ߬ ߟߊ߫).
ߊ߬ ߟߊ߫ ߛߊ߬ߦߊ ߣߌ߲߬ ߞߍߣߍ߲߫ ߛߎ߬ߣߎ߲ ߘߌ߫ ߖߡߊ߬ߣߊ ߡߎ߰ߡߍ ߟߋ߬ ߡߊ߬، ߊ߬ ߟߊ߫ ߛߎ߫߬ߣߎ߲ ߣߐ߬ ߖߌ߬ߣߍ߬ ߓߙߊߘߐߦߊ ߣߴߊ߬ ߝߊ߬ߥߏ ߟߋ߬ ߓߌ߬ߟߊ߬ ߟߊ߫ ߢߊߖߌ ߘߐ߫، ߏ߬ ߟߋ ߘߐ߫߸ ߖߊ߬ߡߊ ߞߵߊ߬ߟߎ߬ ߟߊߘߍ߭ ߘߊߡߌ߬ߣߵߊ߬ ߟߊ߫ ߟߎ ߞߣߐ߫ ߦߊߓߙߊ߫، ߊ߬ ߕߋ߬ߙߌ ߟߎ߬߸ ߊ߬ ߘߍ߬ߒ߬ߞߏ߬ߡߊ߬ߢߐ߲߮ ߠߎ߬߸ ߊ߬ ߓߊߘߋ߲ ߠߎ߬߸ ߊ߬ ߣߴߊ߬ ߕߘߍ߬ ߡߍ߲ ߠߎ߬ ߟߊߦߟߍ߫ ߟߊ߫߸ ߏ߬ ߟߎ߬ ߓߍ߯ ߟߋ߬ ߛߣߍ߫ ߘߴߊ߬ ߟߊ߫ ߟߎ ߞߣߐ߫߸ ߝߏ߬ߟߌ ߣߌ߫ ߛߎ߬ߞߊߛߌ ߟߎ߬ ߟߊ߫.
ߞߎ߲߬ߠߊ߬ߛߌ߮ ߞߵߊ߬ ߢߊ߫ ߞߍ߫ ߊ߬ ߢߊ߫ ߘߌ߫ ߊ߬ ߟߊ߫ ߛߊ߬ߦߊ ߣߌ߲߬ ߘߐ߫߸ ߡߐ߰ߓߊ߬ ߛߌߦߊߡߊ߲߫ ߞߵߊ߬ ߟߊ߫ ߛߎ߬ߣߎ߲ ߦߌ߬ߘߊ߬، ߊ߬ ߓߊߘߍ ߟߐ߯ߟߊ߫ ߘߊ߫ ߞߵߊ߬ ߕߏ߫ ߓߌ߬ ߞߐ߬ߟߏ߲ ߠߋ߬ ߟߊ߫߸ ߞߌ߲ߘߌߦߊ߫ ߛߏ ߞߣߐ߫، ߞߊߣߌߦߞߊ߫ ߛߌ߫ ߡߊ߫ ߕߏ߫ ߞߐ߫، ߣߊ߬ߓߊ߰ߕߐ ߟߎ߬ ߘߐ߫߸ ߞߎ߲߬ߠߊ߬ߛߌ߰ ߛߌ߲ߝߏ߲߫ ߡߎߛߊ߫ ߡߏ߬ߦߌߖ߭ ߛߌ߬ߟߊ ߡߍ߲ ߦߋ߫ ߟߐ߲ߠߌ߲ߦߊ ߞߏߕߌ߮ ߘߌ߫߸ ߏ߬ ߖߍ߬ߘߍ ߛߐ߬ߘߐ߲߬ ߘߴߊ߬ ߘߐ߫߸ ߞߵߏ߬ ߟߊ߫ ߖߡߊ߬ߣߊ ߡߐ߰ߘߐ߬ߜߍ߬ ߛߌߦߊߡߊ߲߫ ߞߊ߲߬߸ ߊ߬ ߣߌ߫ ߛߏߘߌߦߊ߫ ߟߊߓߐߟߊ ߛߌߦߊߡߊ߲߫.
ߞߏ߬ߝߏߦߌ߬ ߓߊߘߍ ߞߍ߫ ߘߊ߫ ߞߌ߲ߘߌߦߊ߫ ߛߋ߰ߘߎ߬ ߝߎߙߋ ߟߎ߬ ߟߊ߫ ߜߍߞߣߍ ߟߋ߬ ߘߐ߫ (ߔߑߟߊߛ ߘߍ߬ ߡߊߙߑߕߌߙ)، ߞߊ߬ ߓߊ߲߫ ߞߵߊ߬ ߛߎ߭ߘߏ߲߬ ߛߊ߬ߙߌ߬ߟߏ ߘߐ߫، ߊ߬ ߟߊ߫ ߛߊ߬ߦߊ ߣߌ߲߬ ߘߐ߫߸ ߓߙߎߞߌߣߊ߫ ߣߌ߫ ߡߊ߬ߟߌ߸ ߊ߬ ߣߌ߫ ߝߘߊ߬ߝߌ߲߬ߠߊ߫ ߖߡߊ߬ߣߊ߬ ߛߌߦߊߡߊ߲߫߸ ߏ߬ ߟߎ߫ ߞߵߊ߬ߟߎ߬ ߟߊ߫ ߛߊ߲߬ߞߊ߬ߝߏ ߟߎ߬ ߞߍ߫.
ߡߎߛߊ߫ ߞߏ߬ߝߏߦߌ߬ ߓߘߊ߫ ߕߊ߯߸ ߓߊ߬ߙߵߊ߬ ߞߊ߬ ߗߍ߫ ߕߊ߬ߕߊ ߟߎ߬ ߕߏ߫ ߊ߬ ߞߐ߫߸ ߊ߬ ߞߵߊ߬ ߣߐ߭ ߕߏ߫ ߘߎߢߊ߫ ߘߐ߫، ߊ߬ ߟߊ߫ ߞߏ ߕߍ߫ ߓߐ߫ ߡߐ߰ ߛߌ߫ ߞߣߐ߫ ߏ߬ ߞߐ߫، ߊ߬ ߦߋ߫ ߦߟߍߡߊߞߏߟߊߓߐߟߊ ߟߎ߬ ߞߊ߬ߙߊ߲߬ߡߐ߰ߓߊ ߘߏ߫ ߟߋ߬ ߘߌ߫ ߖߡߊ߬ߣߊ ߣߌ߲߬ ߞߣߐ߫، ߊ߬ ߕߐ߮ ߕߍ߫ ߕߎߣߎ߲߫ ߖߡߊ߬ߣߊ ߣߌ߲߬ ߘߐ߬ߝߐ ߘߐ߫ ߡߎ߬ߕߎ߲߬߸ ߝߊ߬ߥߏ߬ߟߊ߬ߓߐ ߛߌߟߊ ߝߍ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫
ߒߞߏ ߝߐ߰ߓߍ߬ߦߊ߬ߟߊ ߞߊ߲ߞߊ߲߫
