ߣߌ߲߬ ߞߍߣߍ߲߫ ߖߊߡߌߦߊ߲ߖߏ߫ ߟߋ߬߸ ߙߎߝߌߛߞ ߡߊ߬ߙߊ ߘߐ߫ ߛߣߍ߬ߜ߭ߊߟߌ߫ ߖߡߊ߬ߣߊ ߞߣߐ߫، ߥߊ߬ߦߌ ߘߏ߫ ߟߋ߬߸ ߊ߬ ߛߌ ߦߋ߫ ߞߋߕߊ ߟߋ߬ ߘߌ߫߸ ߊ߬ ߛߌ߬ߞߛߊߓߌ ߦߋ߫ ߛߊ߲߬ ߄߄ ߢߐ߲߰ ߘߐ߫߸ ߡߏ߬ߛߏ߫ ߛߓߊ߬ ߦߴߊ߬ ߞߎ߲߬ ߝߘߎ߫ ߟߊ߫߸ ߘߋ߲߫ ߕߊ߲ ߣߌ߫ ߥߐ߯ߙߐ߫ ߦߴߊ߬ ߓߟߏ߫، ߒ߬ߓߊ߬߸ ߕߍ߮ ߓߘߊ߫ ߞߍ߫ ߏ߬ ߟߋ ߘߐ߫ ߞߵߊ߬ ߡߌ߬ߘߊ߫ ߞߵߊ߬ ߟߊߘߏ߲߬ ߥߛߎ ߟߊ߫߸ ߞߏ߫ ߊ߬ ߓߘߊ߫ ߓߋ߬ ߊ߬ ߡߏ߬ߛߏ ߘߋ߲ ߞߊ߲߬ ߛߋ߲߬ߢߊ߬ ߦߙߌߞߊ߫߸ ߏ߬ ߡߍ߲ ߛߌ߬ߞߛߊߓߌ ߦߋ߫ ߛߊ߲߭ ߂߀ ߢߐ߲߰ ߘߐ߫ ߕߋ߲߬.
ߊ߲ ߠߊ߫ ߞߎ߲߬ߠߊ߬ߝߎߟߋ߲ ߠߎ߬ ߘߐ߫߸ ߞߏߢߊ ߣߌ߲߬ ߘߊߡߌ߬ߣߊ߬ ߘߊ߫ ߞߊ߬ߦߌ߯ ߂߀߁߉ ߟߋ߬ ߟߊ߫߸ ߞߵߊ߬ ߛߐ߬ߘߐ߲߬ ߘߋ߲ߡߛߏ ߛߌ߭ ߦߋ߫ ߛߊ߲߬ ߁߄ ߘߐ߫، ߒ߬ߓߊ߬߸ ߞߏߢߊ ߣߌ߲߬ ߟߐ߲߫ ߘߊ߫ ߟߊ߬ߞߎ߲߬ߘߎ߬ߟߌ߬ ߞߊ߲ ߘߏ߫ ߟߋ߬ ߡߊ߬ ߛߊ߫߸ ߡߍ߲ ߕߘߍ߬ ߘߋ߲ߡߛߏ ߣߌ߲߬ ߓߟߏ߫، ߡߍ߲ߞߊ߲ ߢߌ߲߬ ߘߐ߫߸ ߊ߬ ߟߊߞߎ߲߬ߘߎ߬ߣߍ߲߫ ߗߍ߭ ߢߌ߬ߣߊߡߊ߬ ߟߋ߬، ߊ߬ ߦߴߊ߬ ߝߐ߫ ߟߴߊ߬ ߘߐ߫ ߞߏ߫ ߊ߬ ߘߌ߫ ߜߋߟߋ߲ߜߋߟߋ߲ ߘߌ߫ ߘߋ߲ߡߛߏ ߡߊ߬߸ ߓߊ߬ߙߌ߬ ߊ߬ ߦߴߊ߬ ߝߍ߬ ߊ߬ߟߎ߬ ߦߋ߫ ߥߊ߫ ߢߐ߲߮ ߦߋ߫ ߦߙߐ ߘߏ߫ ߘߐ߫߸ ߦߋ߲߬ ߦߋ߫ ߓߏ߲߫ ߟߐ߬ߣߍ߲ ߘߏ߫ ߟߋ߬ ߘߌ߫، ߡߍ߲ߞߊ߲ ߏ߬ ߟߋ ߟߊߕߊ߬ߡߌ߲߬ߣߍ߲߫ ߦߋ߲߬ ߞߟߍ߬ߡߐ߰ߘߊ ߡߊ߬ ߖߊߡߌߦߊ߲ߖߏ߫ ߘߎ߱ ߞߣߐ߫ ߦߋ߲߬߸ ߣߴߊ߬ ߞߏ ߢߍߡߌ߬ߘߊ߬ߣߍ߲߫ ߛߏ߬ߝߊ߬ߥߣߊ߫ ߊߟߛߊߣ ߕߎ߲߬ߞߙߊ߫ ߓߟߏ߫.
ߡߍ߲ߞߊ߲ ߓߌ߬ߟߊ ߞߐ ߘߐ߫ ߊ߬ ߟߊ߫ ߗߍ߭ ߢߣߊ߫߸ ߊ߬ ߡߊ߫ ߛߴߊ߬ ߛߐ߬ߛߐ߬ ߟߴߊ߬ ߟߊ߫ ߡߎ߬ߕߎ߲߬߸ ߊ߬ ߞߊ߲߫ ߞߏ߫ ߕߎ߬ߢߊ ߟߋ߬ ߝߋߎ߫߸ ߊ߬ ߞߍ߫ ߘߊ߫ ߕߋ߲߬ ߠߋ߬، ߊ߬ ߟߊ߫ ߞߕߌ ߘߐ߫ ߛߊ߫߸ ߊ߬ ߡߊߢߌ߬ߣߌ߲߬ߞߊ ߡߍ߲ ߞߍ߫ ߘߊ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ <<ߛߋ߬ߕߣߊ߫ ߟߋ߬ ߕߘߍ߬>> ߊ߬ ߞߊ߲߬߸ ߊ߬ ߞߵߏ߬ ߟߋ ߞߍ߫ ߊ߬ ߘߊ߬ߟߎ ߘߌ߫ ߣߌ߲߬ ߞߏ ߘߐ߫، ߓߊ߬ߙߌ߬ߟ ߛߊ߬ߙߌ߬ߦߊ߫ ߖߍ߬ߘߍ ߡߴߊ߬ ߢߊ ߟߐ߬ ߏ߬ ߘߐ߫ ߟߋ߬ ߞߟߋ߫، ߢߊߢߌߣߌ߲ߠߌ߲ ߡߍ߲ ߞߍߣߍ߲߫ ߝߊ߰ߡߊ ߟߎ߬ ߓߟߏ߫߸ ߊ߬ ߓߘߊ߫ ߦߋ߫ ߞߏ߫ ߘߋ߲ߡߛߏ ߛߐ߬ߘߐ߲߬ ߣߊ ߖߍ߬ߘߍ߸ ߏ߬ ߡߍ߲ ߦߋ߫ ߗߍ߭ ߣߌ߲߬ ߡߏ߬ߛߏ ߘߏ߫ ߘߌ߫߸ ߞߏߏ߫ ߏ߬ ߦߋ߫ ߣߌ߲߬ ߞߏ ߞߊ߬ߟߊߡߊ߬ ߕߊߦߌ߫، ߓߊ߬ߙߵߊ߬ ߞߵߊ߬ ߗߍ߬ ߛߎ߬ߕߙߊ߫ ߟߋ߬߸ ߞߵߊ߬ߟߎ߬ ߢߊ ߟߊߜߊ߲߫ ߊ߬ ߞߏ ߞߎ߲߬ߠߊ߫.
ߒ߬ߓߊ߬߸ ߞߏߢߊ ߞߏ߬ߣߌ߲ ߓߘߊ߫ ߛߋ߫ ߞߕߌߘߊ ߟߊ߫߸ ߝߏ߫ ߗߍ߭ ߓߘߊ߫ ߡߌ߬ߘߊ߫ ߞߵߊ߬ ߓߌ߬ߟߊ߬ ߥߛߎ ߟߊ߫ ߡߎߣߎ߲߬، ߛߊ߬ߙߌ߬ߦߊ߬ ߓߘߊ߫ ߣߌ߲߬ ߞߏ ߟߊߥߙߊ߬ ߞߵߊ߬ ߦߌ߬ߘߊ߬ ߞߏ߫ ߓߌ߬ߟߊ߬ ߞߍߣߍ߲߫ ߗߍ߭ ߞߏ߫ ߞߏ߫ ߛߌߦߊߡߊ߲߫ ߠߋ߬ ߘߐ߫: ߓߋ߬ߒ߬ߞߊ߲߬ߠߌ߲ ߘߋ߲ߣߍ߲ ߞߊ߲߬ (ߞߊ߬ߝߏ߬ߢߐ߲߰ߦߊ ߛߌߟߊ ߝߍ߬) ߊ߬ ߟߊ߫ ߣߐ߭ ߦߋ߫ ߡߍ߲ ߞߊ߲߬ ߥߟߴߊ߬ ߟߊ߫ ߡߙߊ߬ ߡߐ߮߸ ߊ߬ ߣߌ߫ ߡߛߏ߬ߞߏ߬ߒ߬ߕߋ߬ߦߊ߸ ߘߋ߲ߣߍ߲߫ ߠߊߡߎߙߎ߲ߕߌ߸ ߞߵߏ߬ ߟߊ߫ ߡߐ߱ ߘߐߜߍ߬ߘߍ߲ ߞߊ߲߬ ߞߊ߬ߝߏ߬ߢߐ߲߰ߦߊ߬ ߞߏ ߘߐ߫. ߒ߬ߓߊ߬߸ ߗߍ߭ ߣߴߊ߬ ߟߊ߫ ߘߋ߲ߓߦߊ ߓߘߊ߫ ߓߐ߫ ߢߐ߲߮ ߞߊ߲߬߸ ߊ߬ߟߋ ߓߘߊ߫ ߛߋ߫ ߛߊ߬ߙߌ߬ߦߊ߬ ߕߊ߫ ߓߟߏ߫ ߡߊ߬.
ߣߌ߲߬ ߞߏ߫ ߛߎ߮ ߘߏ߲߬ ߓߘߊ߫ ߛߌߦߊߦߊ߫ ߓߊߟߋ߬ ߛߣߍ߬ߜ߭ߊ߬ߟߌ߬ ߞߣߐ߫ ߕߋ߲߬߸ ߦߏ߫ ߖߍ߲߬ߘߍ߬ ߣߌ߫ ߞߐߟߑߘߊ߬߸ ߟߎ߫ ߞߋߟߋ߲ ߞߣߐ߫ ߡߐ߮ ߟߎ߫ ߟߋ߬ ߡߊߝߌ߲߬ߣߍ߲߫ ߊ߬ߟߋ߬ ߞߙߌ߬ߞߙߊ߬ߒ߬ߕߋ߬ߦߊ ߘߐ߫ ߦߋ߲߬، ߏ߬ ߟߋ ߞߏߛߐ߲߬߸ ߊ߬ ߓߘߊ߫ ߦߌ߬ߘߊ߬ ߞߏ߫ ߝߏ߫ ߛߊ߬ߙߌ߬ߦߊ߬ ߦߋ߫ ߞߊߘߊ߲ ߓߍ߯ ߞߍ߫ ߞߊ߬ ߛߋ߫ ߢߊ ߡߊߖߌ߰ ߟߊ߫ ߣߌ߲߬ ߞߏ ߝߍ߬ ߞߵߊ߬ ߟߊߕߐ߲߫ ߞߏ ߢߊߢߌߣߌ߲߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
