ߞߎߣߎ߲߬ ߛߌ߬ߣߌ߲߬ߟߏ߲ ߡߊ߬߸ ߂߀߂߅ ߕߙߊߓߊ ߕߋ߬ߟߋ߫ ߂߁߸ ߡߙߊ߬ߒ߬ߡߊ߬ߟߌ ߘߏ߫ ߟߋ߬ ߞߍ߫ ߘߊ߫ ߞߏߞߏߙߎ߫ ߕߌ߲߬ߞߎߘߎ߲ ߘߐ߫߸ ߊ߬ ߕߌ߯ߕߌ߯ ߝߐ߲ߕߌߓߊ߫ ߘߎ߰ߣߍ߲ ߞߣߐ߫߸ ߞߊ߬ ߡߐ߰ ߄߄ ߓߐ߬ߣߐ߫ ߊ߬ ߣߌ ߘߐ߫، ߦߋ߲߬ ߦߋ߫ ߖߋ߬ߟߌ߬ߓߊ߬ߘߎ߯ ߥߙߏ߬ߘߎ߰ ߕߟߋߓߋ ߟߋ߬ ߘߐ߫، ߡߙߊ߬ߒ߬ߡߊ߬ߟߌ ߣߌ߲߬ ߞߍ߫ ߘߊ߫ ߛߎ߲ߞߊߙߏ ߢߌ߲߬ ߠߋ߬ ߟߊ߫߸ ߞߵߊ߬ ߛߐ߬ߘߐ߲߬ ߡߐ߱ ߟߎ߬ ߦߋ߫ ߕߌ߲ߓߌߘߌ߲ߘߊ ߟߊ߫ ߖߎߡߊ߫ ߛߊߟߌ߫ ߞߊ߲ߡߊ߬، ߖߋ߬ߟߌ߬ߓߊ߬ߘߎ߯ ߞߣߐߟߊ ߞߏߕߌ߮ ߡߏ߬ߤߊ߬ߡߍ߬ߘ ߕߎ߲ߓߊ߬ ߞߊ߬ ߟߊ߬ߛߋ߬ߟߌ ߘߏ߫ ߞߍ߫ ߞߵߊ߬ ߦߌ߬ߘߊ߬ ߞߏ߫ ߡߐ߰ ߘߌ߫ ߛߋ߫ ߖߊ߬ߕߋ߫ ߞߎ߲߬ߝߟߐ ߡߍ߲ ߠߎ߬ ߝߐ߫ ߟߊ߫ ߡߎߣߎ߲߬߸ ߏ߬ ߟߋ ߡߐ߰ ߄߄ ߝߊ߰ ߞߏ ߘߌ߫߸ ߊ߬ ߣߌ߫ ߞߊ߬ ߡߐ߰ ߁߃ ߖߐߞߌ߫، ߖߐߞߌߓߊ߯ߕߐ ߏ߬ ߟߎ߬ ߘߐ߫߸ ߡߐ߰ ߄ ߓߍ߫ ߦߋ߲߬߸ ߏ߬ ߟߎ߬ ߟߊ߫ ߖߐߞߟߌ ߖߎ߯ߡߊ߲߫ ߞߏߛߓߍ߫.
ߞߵߊ߬ ߓߍ߲߬ ߖߡߊ߬ߣߊ ߖߌ߬ߦߊ߬ߞߊ߲߬ߛߏ߬ߓߊ ߟߊ߫ ߞߎ߲߬ߠߊ߬ߝߎ߬ߟߋ߲߬ ߘߌߣߍ߲ ߡߊ߬߸ ߞߏ߫ ߡߐ߱ ߘߏ߫ ߟߎ߫ ߟߋ߬ ߣߌ߫ ߡߙߊ߬ߒ߬ߡߊ߬ߝߋ߲ ߕߊ߯ ߘߊ߫ ߡߌ߬ߛߙߌ ߘߏ߫ ߟߊߡߌߣߌ߲߫߸ ߞߵߊ߬ ߛߐ߬ߘߐ߲߬ ߛߌ߬ߟߡߊ߬ ߖߡߊ ߟߎ߬ ߦߋ߫ ߖߎߡߊ߫ ߛߊߟߌ ߞߊ߲߬߸ ߞߕߎ߬ߓߊ ߦߴߌߘߐ߫ ߢߍߓߊ߮ ߓߟߏ߫، ߌߞߘߐ߫߸ ߞߊ߬ ߡߎ߮ ߛߏ߲ߛߙߏߡߴߊ߬ ߘߐ߫ ߛߊߟߌߟߊ ߏ߬ ߟߎ߫ ߞߊ߲߬ ߦߋ߲߬߸ ߞߊ߬ ߜߊ߬ߙߊ ߖߍ߲ߛߍ߲߫ ߕߊ߬ߘߌ߬ߓߊ߬ߕߊߘߌߓߊ ߟߊ߫، ߊ߬ߟߎ߬ ߓߊ߲ߣߍ߲ ߡߙߊ߬ ߟߊ߫ ߖߊ߬ߡߊ ߏ߬ ߟߎ߫ ߡߊ߬ ߦߋ߲߬ ߝߋߎ߫߸ ߊ߬ߟߎ߫ ߕߊ߬ߡߌ߲߬ ߘߊ߫ ߕߊ ߛߎ߫ ߟߊ߫ ߛߏ ߟߐ߯ߝߍ ߟߊ߫߸ ߞߊ߬ ߓߊ߲߫ ߞߊ߬ ߟߎ߫ ߛߌߦߊߡߊ߲߫ ߝߣߊ߫ ߖߋ߬ߣߌ߲߬ ߞߎߙߍ߫، ߏ߬ ߣߊ߬ ߘߊ߫ ߕߏ߰ߝߏ߬ߕߊ߰ߝߊ߬ ߛߌߦߊߡߊ߲߫ ߠߋ߬ ߘߌ߫ ߘߎ߰ ߡߐ߮ ߟߎ߫ ߞߊ߲߬.
ߖߋ߬ߟߌ߬ߓߊ߬ߘߎ߯ ߞߎ߲߬ߠߊ߬ߛߌ߮ ߞߊ߬ ߣߌ߲߬ ߞߏ ߞߐ߲߫ ߠߋ߬ ߝߋߝߋ߫߸ ߞߵߊ߬ ߘߐߜߏߦߊ߫، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߦߋ߫ <<ߣߊ߬ߤߎ߲߬ߒ߬ߞߐ߬ߦߊ>> ߟߋ߬ ߘߌ߫߸ <<ߥߘߊߦߊ ߣߌ߫ ߞߘߊ߬ߜߟߍ߬ߦߊ>> ߝߛߊߦߌ߫، ߊ߬ߟߎ߬ ߟߊ߫ ߟߊ߬ߛߋ߬ߟߌ߬ ߞߟߊߒߞߋ ߡߍ߲ ߞߍ߫ ߘߊ߫ ߖߌ߬ߦߊ߬ߞߊ߲߬ߛߏ߬ߓߊ ߟߊ߫߸ ߞߎ߲߬ߠߊ߬ߛߌ߮ ߞߵߊ߬ ߟߊߢߌߣߌ߲߫ ߞߏ߫ ߝߏ߫ ߞߊ߬ ߢߊߢߌߣߌ߲ߠߌ߲ ߖߍ߬ߘߍߖߍ߬ߘߍ ߟߋ߬ ߞߍ߫ ߣߌ߲߬ ߞߏ ߞߊ߲߬߸ ߞߵߊ߬ ߞߍߓߊ߮ ߟߎ߬ ߟߐ߲߫߸ ߞߵߊ߬ߟߎ߬ ߟߊߕߊ߬ߡߌ߲߬ ߞߕߌߘߊ ߡߊ߬.
ߥߊ߬ߥߎߟߋ ߣߌ߲߬ ߟߊߡߌ߬ߘߊ ߘߐ߫ ߛߊ߫߸ ߞߎ߲߬ߠߊ߬ߛߌ߮ ߓߘߊ߫ ߕߟߋ߬ ߛߓߊ߬ ߝߙߌߦߊ߫ ߛߌ߰ ߛߋ߲߬ߠߊ߫߸ ߞߵߏ߬ ߘߊߡߌ߬ߣߊ߫ ߓߌ߬ ߞߍ߲ߘߍߟߏ߲ ߣߌ߲߬ ߡߊ߬ ߌߞߘߐ߫߸ ߂߀߂߅ ߕߙߊߓߊ ߕߋ߬ߟߋ߫ ߂߂߸ ߞߵߏ߬ ߞߍ߫ ߛߊ߬ߓߊ߰ߕߐ ߟߎ߬ ߣߌ߫ ߛߏ߰ߟߊ߬ߓߊ߰ߕߐ ߟߎ߬ ߡߊ߬ߤߌ߬ߣߊ߬ ߟߊ߬ߡߌߘߊ ߘߌ߫.
ߝߐ߲ߕߌߓߊ߫ ߣߌ߲߬ ߦߋ߫ ߕߋߙߊ߫ ߡߙߊ ߟߋ߬ ߘߐ߫߸ ߕߌߟߊߓߋߙߌ߫ ߕߌ߲߬ߞߎߘߎ߲ ߘߐ߫߸ ߡߊ߬ߟߌ ߣߌ߫ ߓߙߎߞߌߣߊ߫ ߓߐߕߏ߲ ߠߊ߫، ߊ߬ ߦߋ߫ ߝߐ߫ ߟߊ߫ ߦߋ߲߬ ߠߋ߬ ߡߊ߬ ߞߏ߫ ߖߡߊ߬ߣߊ߫ ߛߊ߬ߓߊ ߣߌ߫ ߢߐ߲߯ ߕߍ߸ ߓߊ߰ߓߊ߰ߟߌ߬ ߞߙߎ߫ ߛߌߦߊߡߊ߲߫ ߦߋ߫ ߡߙߊ߬ߒ߬ߡߊ߬ߟߌ ߞߍ߫ ߟߊ߫ ߦߙߐ ߡߍ߲ ߘߐ߫ ߞߊ߬ ߛߌߦߊߦߊ߫߸ ߦߏ߫ ߘߊ߬ߦߌ߬ߛߎ ߟߎ߬ ߣߌ߫ ߊߟߑߞߊߦߌߘߊ ߓߏߟߏ߲ߝߘߊ ߟߎ߬.
ߞߊߙߏ߫ ߟߊߓߊ߲ ߢߌ߲߬ ߠߎ߬ ߟߊ߫߸ ߡߙߊ߬ߒ߬ߡߊ߬ߟߌ߬ ߛߌߦߊߡߊ߲߫ ߠߋ߬ ߓߘߊ߫ ߞߍ߫ ߖߡߊ߬ߣߊ ߦߙߐ ߏ߬ ߘߐ߫ ߦߋ߲߬، ߤߊߟߌ߬ ߕߙߊߓߊ ߕߟߋ߬ ߁߅ ߡߊ߬߸ ߓߊ߰ߓߊ߰ߟߌ߬ߟߊ ߟߎ߬ ߕߊ߯ ߘߊ߫ ߓߋ߬ ߖߋ߬ߟߌ߬ߓߊ߬ߘߎ߯ ߣߊ߲߬ߕߌ߰ ߓߏߟߏ߲ߝߘߊ ߘߏ߫ ߟߎ߫ ߞߊ߲߬ ߛߊߣߌ߲߫ ߘߊߡߊ߲ߘߊ ߘߏ߫ ߟߊ߫ ߕߋߙߊ߫ ߡߙߊ ߘߐ߫، ߣߊ߲߬ߕߌ߯ ߉ ߟߋ߬ ߝߊ߰ ߘߊ߫ ߦߋ߲߬߸ ߞߊ߬ ߡߐ߰ ߇ ߖߐߞߌ߫، ߏ߬ ߟߎ߫ ߞߏ߬ߣߌ߲ ߞߵߊ߬ߟߎ߬ ߘߐߖߊ߬߸ ߞߊ߬ ߓߊ߰ߓߊ߰ߟߌ߬ߟߊ߫ ߡߐ߰ ߄߅ ߝߊ߰ ߦߋ߲߬.
ߓߊߘߋ߲ ߠߎ߬߸ ߊ߲ ߧߋ߫ ߦߙߐ ߡߍ߲ ߘߐ߫ ߕߋ߲߬߸ ߓߊ߰ߓߊ߰ߟߌ߬ ߞߙߎ߫ ߛߌ߫ ߡߊ߫ ߛߐ߬ߘߐ߲߬ ߡߎߣߎ߲߬߸ ߒ߬ ߠߊ߫ ߞߎߡߊ ߣߌ߲߬ ߝߐ߫ ߥߊ߯ߕߌ ߢߌ߲߬ ߠߊ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߟߋ߬ ߣߐ߬ ߡߙߊ߬ߒ߬ߡߊ߬ߟߌ ߣߌ߲߬ ߞߍ߫ ߟߊ߫ ߝߐ߲ߕߌߓߊ߫ ߘߎ߰ߣߍ߲ ߞߣߐ߫، ߓߊ߬ߙߌ߬߸ ߖߡߊ߬ߣߊ ߞߎ߲߬ߠߊ߬ߛߌ߮ ߟߎ߬ ߞߊ߲߫ ߞߏ߫ ߓߊ߰ߓߊ߰ߟߌ߬ ߞߙߎ ߟߎ߫ ߟߋ߬ ߣߐ߬ ߝߛߊߦߌ߫߸ ߊ߬ ߕߌ߯ߕߌ߯ ߞߌ߬ߢߍ߬ߞߏ߲ߞߏ߫ ߓߏ߲߬ߓߊ ߘߊ߬ߦߌ߬ߛߎ ߟߎ߬ (ߘߊ߬ߦߌߛ ߏ߬ ߜ߭ߑߙߊ߲ ߛߤߊߙߊ).
ߡߙߊ߬ߒ߬ߡߊ߬ߟߌ ߣߌ߲߬ ߞߐ ߘߐ߫߸ ߖߋ߬ߟߌ߬ߓߊ߬ߘߎ߰ߞߊ ߟߎ߬ ߓߘߊ߫ ߟߊ߬ߞߊ߲߬ߘߊ߬ߟߌ߬ ߛߌߟߊ ߟߎ߬ ߘߐߖߊ߬ ߜߘߋߜߘߋ߫߸ ߞߊ߬ ߣߊ߲߬ߕߌ߮ ߟߎ߬ ߟߛߊߙߌ߫ ߕߌ߲߬ߞߎߘߎ߲ ߏ߬ ߝߊ߲߭ ߓߍ߯ ߟߊ߫، ߊ߬ߟߎ߬ ߟߊ߫ ߞߣߐߟߊ ߞߏߕߌ߮ ߞߵߊ߬ ߞߊ߲ߘߌ߫߸ ߞߏ߫ ߊ߬ߟߎ߬ ߘߌ߫ ߘߐ߬ߖߊ ߓߍ߯ ߞߍ߫ ߞߊ߬ ߡߌ߬ߙߌ߲߬ߘߌ ߟߊߞߊ߲ߘߊ߫߸ ߞߊ߬ ߓߊ߰ߓߊ߰ߟߌ߬ߟߊ ߟߎ߫ ߞߟߍ߬ ߞߵߊ߬ߟߎ߬ ߜߍ߲߫ ߕߌ߲߬ߞߎߘߎ߲ ߏ߬ ߘߐ߫ ߦߋ߲߬ ߝߋߎ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫
