ߛߊ߲߭ ߝߌ߬ߟߊ߬ ߓߊ߯ߙߊ ߞߐߝߟߌ߸ ߊ߬ ߣߌ߫ ߥߊߘߌ߫ ߞߐ߲߬ߜߍ߲ ߠߊ߫ ߓߐߟߌ߸ ߏ߬ ߟߋ ߣߐ߬ ߓߊ߲߬ߓߋߕߏ߬ ߝߊ߬ߟߋ߲߬ߕߍ ߟߐ߬ ߟߊ߫߸ ߞߵߊ߬ ߞߍ߫ ߗߋ߲߰ߧߊ߬ ߝߋ߲߫ ߘߌ߫ ߖߌ߬ߣߍ߬ ߞߎߓߋߘߊ ߟߊ߫ ߞߐߣߊߞߙߌ߫، ߊ߬ ߓߌ߬ߟߊ߬ ߘߊ߫ ߖߊ߬ߡߊ ߛߊ߬ߥߏ߬ ߘߐ߫ ߞߎߣߎ߲߬ ߞߍ߲ߘߍߟߏ߲ ߠߋ߬ ߡߊ߬ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߖߍ߬ߘߍ ߓߟߏ߫ ߖߊ߬ߡߊ߫ ߘߍ߬ߜߍ ߢߊߞߘߐ߫.
߂߀߂߅ ߣߍߣߍߓߊ ߕߟߋ߬ ߡߍ߲ ߓߍ߲߬ ߘߊ߫ ߞߍ߲ߘߍߟߏ߲ ߡߊ߬߸ ߏ߬ ߟߋ ߞߍ߫ ߘߊ߫ ߓߊ߲߬ߓߋߕߏ߬ ߝߊ߬ߟߋ߲߬ߕߍ ߓߌ߬ߟߊ߬ ߕߎߡߊ ߘߌ߫ ߡߐ߱ ߟߎ߫ ߛߊ߬ߥߏ߬ ߘߐ߫߸ ߏ߬ ߡߍ߲ ߞߍ߫ ߘߊ߫ ߖߌ߬ߣߍ߬ ߞߎߓߋߘߊ ߟߊߗߋ߲߰ߧߊ߬ ߞߏ߬ߓߊ ߘߏߏ߫ ߘߌ߫߸ ߞߊ߬ ߕߊ߬ߡߌ߲߬ ߞߐߣߊߞߙߌ߫ ߛߌߟߊ ߟߎ߬ ߟߊߗߋ߲߰ߧߊ߬ ߟߊ߫ ߞߏߞߎߘߊ߫، ߒ߬߬ߓߊ߬߸ ߓߍ߲߬ߕߍ ߡߍ߲ ߞߏ߫ ߦߴߏ߬ ߘߌ߫ ߗߐ߫߸ ߊ߬ ߖߊ߬ߕߋ߬ߘߐ߬ߛߌ߮ ߡߊ߫ ߞߍ߫ ߦߋ߲߬ ߕߋ߲߬ ߜߊ߲ߛߊ߲߫ ߘߋ߬߸ ߖߌ߬ߣߍ߬ ߕߊߡߊ߲ ߥߟߎ߬ߡߊ߫ ߗߍ߬ߡߍ߫ ߛߓߊ߬ ߣߌ߫ ߓߌߛߓߊ߬ ߣߌ߫ ߞߐ߬ߣߐ߲߬ߣߐ߲߬ߘߐ߬ ߣߌ߫ ߞߋ߲߬ߥߟߎ߫ ߗߡߍ߬ ߥߐ߯ߙߐ߫ ߢߐ߲߰ ߠߋ߬ ߘߏ߲߬ ߘߴߊ߬ ߟߊ߫ (߃߃߉ ߆߀߀ ߀߀߀ ߀߀߀)߸ ߡߍ߲ ߖߐ߰ߣߍ߬ߦߊ߬ ߘߊ߫ ߖߌ߬ߣߍ߫ ߖߡߊ߬ߣߊ ߖߍ߬ߘߍ ߓߟߏ߫ ߓߟߏ߫߸ ߊ߬ ߣߌ߫ ߞߏߥߍߕ ߡߊߣߊ߲ߞߎ߲ߘߊ ߘߏ߫ ߊߙߊߓߎߘߎ߯ ߡߊ߬ߞߐ߬ߙߐ߲߬ߞߐ߲߬ߠߌ߲ ߠߊߥߙߎߞߌ߫ ߞߊ߲ߡߊ߬.
ߝߘߏ߬ߓߊ߬ ߓߊ߯ߙߊ ߣߌ߫ ߖߎ߬ߓߌߟߊ ߞߏߕߌ߮ ߟߊ߱ߦߌ߬ ߛߋߞߎ߬ ߞߡߊ߬ߙߊ߬ ߟߊ߫ ߓߋߟߋ߲ߠߊ ߘߐ߫߸ ߊ߬ ߞߊ߬ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߝߏ߬߸ ߊ߬ ߖߘߍ߬ߓߊ߬ߞߎ߲ ߠߊ߫ ߞߍߟߌ߫ ߕߣߐ߬ߡߊ ߘߏ߫ ߟߎ߫ ߞߏߛߐ߲߬ ߣߌ߲߬ ߞߏ ߘߐ߫، ߞߏߕߌ߮ ߞߵߊ߬ ߦߌ߬ߘߊ߬ ߞߏ߫ ߞߊ߬ߝߏ߬ߖߊ߬ߛߏ߲߬ߠߊ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߋ߬ ߕߎ߲߬ ߦߋ߫ ߖߊ߬ߕߋ߬ߘߐ߬ߛߌ߮ ߣߌ߲߬ ߣߌߘߐ ߘߌ߫ <<ߓߊ߯ߙߊߞߣߍ ߡߍ߲ ߦߋ߫ ߣߌ߲߬߸ ߌ ߞߵߌ ߢߊ ߕߏ߫ ߟߋ߬ ߣߌ߲߬ ߝߍ߬ ߛߎ ߣߌ߫ ߕߋ߬ߟߋ، ߌ ߞߊ߬ ߛߎ߫ ߘߐ߫ ߓߐߟߌ ߓߍ߯߯ ߞߍ߫ ߦߊ߲߬، ߒ߬ߓߊ߬ ߒ ߘߴߌ ߦߟߌߟߊߕߍ߰ ߓߌ߬߸ ߞߏ߫ ߓߊ߯ߙߊ ߣߌ߲߬ ߞߍߣߍ߲߫ ߢߊ߫ ߟߋ߬ ߡߊ߬߸ ߊ߬ ߣߌ߫ ߡߍ߲ ߞߊ߫ ߞߊ߲߫.>> ߞߏߕߌ߮ ߟߋ߬ ߞߊ߲߫ ߕߋ߲߬.
ߝߊ߬ߟߋ߲߬ߕߍ ߣߌ߲߬ ߦߋ߫ ߘߐ߬ߛߊ߲ ߝߙߍߕߍ߫ ߝߌߟߊߣߊ߲ ߠߋ߬ ߘߐ߫:
ߕߊ߬ߡߌ߲߬ ߦߙߐ ߘߏ߫ ߦߋ߫ ߛߊ߲ߝߍ߬߸ ߡߍ߲ ߦߋ߫ ߜߟߊ߬ߜߟߊ߫ ߂߆߁ ߘߌ߫.
ߕߊ߬ߡߌ߲߬ߦߙߐ߬ ߜߘߍ߫ ߦߋ߫ ߘߎ߱ߡߊ߬߸ ߏ߬ ߦߋ߫ ߜߟߊ߬ߜߟߊ߫ ߂߅߃ ߟߋ߬ ߘߌ߫.
ߕߙߎߕߙߎߟߌ߫ ߓߍ߲ߕߍ߫ ߝߊ߲߬ߝߌ߬ߟߊ߬ߡߊ ߘߏ߫ ߦߴߊ߬ ߟߊ߫.
ߊ߬ ߣߌ߫ ߛߌߟߊ߫ ߞߊ߬ߞߎ߬ߘߊ߬ߡߊ߫ ߝߌ߬ߟߊ߫ ߢߐ߲߰.
ߛߊߣߌ߲ߧߊ߫ ߦߙߐ ߘߏ߫ ߟߎ߫ ߣߌ߫ ߞߣߍߦߊ߫ ߦߙߐ ߟߎ߬ ߝߣߊ߫ ߓߌ߬ߟߊ߬ߣߴߊ߬ ߟߊ߫.
ߊ߬ ߓߊ߯ߙߊ ߟߎ߬ ߞߍ߫ ߘߊ߫ ߛߌߣߏߤߌߘߙߏ ߥߊߟߌߘߊ ߟߋ߬ ߓߟߏ߫، ߞߏߕߌ߮ ߟߊ߫ ߝߐߟߌ߫ ߘߐ߫߸ ߖߊ߬ߕߋ߬ߘߐ߬ߛߌ߮ ߣߌ߲߬ ߦߋ߫ ߞߐߣߊߞߙߌ߫ ߦߋߝߊߘߌ ߡߊߝߊ߬ߟߋ߲߬ ߠߊ߫ ߟߋ߬ ߝߋߝߋ߫: <<ߓߊ߲߬ߓߋߕߏ߬ ߞߣߐ߫ ߕߊߡߌ߲ ߦߋ߫ ߞߊߦߌߙߊ ߟߋ߬ ߘߌ߫ ߡߎ߬ߕߎ߲߬߸ ߖߐ߰ߖߐ߰ ߞߏ ߤߊߡߌ߲߫ ߕߴߌ ߟߊ߫߸ߏ߬ ߘߏ߲߬ ߓߍ߯ ߞߍߣߍ߲߫ (ߞߊ߲ߕߌ߮ ߟߊ߫) ߞߎ߲߬ߕߌ߰ ߓߘߍ߬ߦߊ ߟߋ߬ ߞߣߐ߫.>> ߊ߬ ߞߵߏ߬ ߟߋ ߝߐ߫ ߞߵߊ߬ ߟߐ߬ ߞߊ߲ߕߌ߮ ߡߊ߬.
ߊߟߎ߫ ߦߴߊ߬ ߟߐ߲߫ ߝߣߊ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߖߊ߬ߕߋ߬ߘߐ߬ߛߌ߮ ߣߌ߲߬ ߦߋ߫ ߛߌߡߊ߲ߘߎ߯ ߂߀߄߀ ߢߍߥߟߊ ߟߋ߬ ߞߣߐ߫߸ ߓߊ߲߬ߓߋߕߏ߬ ߝߊ߬ߟߋ߲߬ߕߍ ߣߌ߲߬ ߞߍߣߍ߲߫ ߛߏ ߛߌ߲ߞߐ߲ ߡߊߝߊ߬ߟߋ߲߬ ߞߏ߬ߓߊ߫ ߟߋ߬ ߘߴߊ߬ߟߎ߬ ߓߟߏ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
