ߊ߬ ߕߘߍ߬ ߞߟߌ߫ ߟߊ߫ ߕߐ߮ ߡߍ߲ ߠߊ߫ ߖߐ߫߸ ߏ߬ ߡߊ߫ ߡߊߝߊ߬ߟߋ߲߬ ߜߘߍ߫ ߞߍ߫ ߡߎ߬ߕߎ߲߬߸ ߊ߬ ߓߘߊ߫ ߕߐ߯ߟߊ߫ ߞߎ߲߬ߠߊ߬ߛߌ߮ ߓߟߏ߫ ߛߍߣߍ߲߬ ߞߏ߫ <<ߓߊ߲߬ߓߋߕߏ߬ ߝߊ߬ߟߋ߲߬ߕߍ>>߸ ߞߵߏ߬ ߞߍ߫ ߊߞߛ ߘߋ߲ߡߌߛߍ߲߫ ߞߏߕߐ ߟߎ߫ ߡߊ߬ߤߌ߬ߣߊ߬ ߟߊ߬ߡߌߣߊ ߘߌ߫߸ ߡߍ߲ ߠߎ߬ ߞߊ߬ ߞߏ߫ ߛߐ߬ߘߐ߲߫ ߓߘߍ߬ߓߘߍ߬ߟߌ ߝߐߢߐ߲߯ߞߐ ߟߎ߬ ߘߐ߫ ߤߊߡߑߘߟߊߦߌ߬ ߣߌ߫ ߓߊ߲߬ߓߋߕߏ߬ ߣߌ߫ ߞߏߖ߭ߊ߬ ߟߎ߬ ߘߐ߫߸ ߦߋ߲߬ ߡߍ߲ ߦߋ߫ ߖߌ߬ߣߍ߫ ߓߘߍ߬ߓߘߍ߬ߟߌ ߝߐߢߐ߲߯ߞߐ߫ ߦߙߐߓߊ ߘߏ߫ ߘߌ߫ ߞߊ߬ߣߌ߲߬.
ߓߌ߬ ߞߍ߲ߘߍߟߏ߲ ߣߌ߲߬ ߡߊ߬ ߂߀߂߅ ߣߍߣߍߓߊ ߕߟߋ߬ ߁߅߸ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߓߊ߲߬ߓߋߕߏ߬ ߝߊ߬ߟߋ߲߬ߕߍ ߓߌ߬ߟߊ߫ ߖߊ߬ߡߊ ߛߊ߬ߥߏ߬ ߘߐ߫߸ ߦߋ߲߬ ߡߍ߲ ߦߋ߫ ߤߊߡߑߘߟߊߦߌ߬-ߓߊ߲߬ߓߋߕߏ߬-ߞߏߖ߭ߊ߬ ߟߎ߬ ߣߌߞߎ߲ ߣߴߊ߬ߟߎ߫ ߓߌ߬ߢߐ߲߰ߡߊ߬ ߦߙߐ߬ߓߊ ߘߌ߫ ߞߐߣߊߞߙߌ߫ ߞߣߐ߫ ߞߊ߬ߣߌ߲߬، ߒ߬ߓߊ߬߸ ߞߊ߲ߕߌ߮ ߞߊ߬ ߓߏ߲߬ߧߊ߬ߓߊ߫ ߞߍ߫ ߦߋ߲߬ ߡߐ߮ ߟߎ߬ ߦߋ߫ ߓߌ߬߸ ߞߵߊ߬ ߡߙߌ ߟߊߕߊ߯ ߘߐ߬ߝߐ ߡߊ߬߸ ߊ߬ ߣߌ߫ ߓߘߍ߬ߓߘߍ߬ߟߌ ߥߟߌߞߊߟߐ ߟߎ߬ ߡߊ߬߸ ߦߋ߲߬ ߡߍ߲ ߦߋ߫ ߔߊߞߌߛߦߊߟߊ ߟߎ߬ ߣߌ߫ ߡߊ߲߬ߞߊ߲߬ߕߋ߬ߟߊ ߟߎ߫ ߢߊ߲߱ ߘߌ߫߸ ߣߴߊ߬ߟߎ߫ ߕߍ߬ߘߍ߫ ߜߊ߰ߢߊ߬ߜߊ߰ߢߊ߬ ߟߴߊ߬ߟߎ߬ ߟߊ߫ ߡߝߊ߬ߓߊߟߌߦߊ ߏ߬ ߞߏߛߐ߲߬ ߕߎ߬ߡߊ߬ ߛߌߦߊߡߊ߲߫ ߛߊ߲߬ ߕߊ߲߬ ߣߌ߬ ߟߏ߰ߟߎ߬ ߟߊ߬ߓߊ߲ ߣߌ߲߬ ߞߣߐ߫.
ߖߊ߲߬ߖߏ߲ ߣߌ߲߬ ߝߍ߬߸ ߞߏߕߌ߯ ߦߊߦߊ߬ ߛߏ߸ ߟߊ߬ߟߌ߬ߟߌ߬ߟߊ߫ ߟߵߊ߬ߟߋ߬ ߘߌ߫ ߞߊ߲ߕߌ߯ߘߊ ߟߊ߫߸ ߣߴߊ߬ ߘߐ߱ߘߏ߲߬ߣߍ߲߫ ߖߎ߬ߓߌߟߊ ߞߏߢߊ ߟߎ߬ ߟߊ߫߸ ߏ߬ ߟߋ ߞߊ߬ ߕߐ߯ ߟߊߥߛߊ ߞߍ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߐ߯ ߘߐ߫، ߖߊ߲߬ߖߏ߲ ߘߟߊߞߊ߭ ߝߍ߬߸ ߡߌ߬ߛߍ߲߬ ߞߋߟߋ߲߫ ߛߌߡߊߟߌ߫ ߟߋ߬ ߞߍ߫ ߘߊ߫ ߡߊ߬ߞߎ߲ ߘߐ߫ ߡߎߣߎ߲߬߸ ߞߵߏ߬ ߞߍ߫ ߛߌߡߊߟߌ ߓߘߍ߬ߓߘߍ߬ߟߌ ߞߎ߲߬ߠߊ߬ߕߊ߲ߞߌ߲ ߞߏߕߐ ߟߎ߬ ߡߊ߬ ߊߞߛ ߞߣߐ߫߸ ߞߣߊ߬ߕߏ߫ ߞߊ߲ߕߌ߮ ߟߊ߫ ߗߋߛߓߍ ߟߊߕߊ߬ߡߌ߲߬ ߠߊ߫.
<<߂߀߂߂ ߞߏ߲ߞߏߘߌ߬ߓߌ ߕߟߋ߬ ߁߃ ߟߋ߬ ߡߊ߬߸ ߒ ߕߘߍ߬ ߞߣߍ ߞߊ߲߬ ߦߊ߲߬ ߡߊ߬ߓߏ߲߬ߧߊ߬ߕߊ߫ ߛߟߊߕߌ߯ ߞߊ߲ߓߍ߲ ߞߊ߲ߕߌ߮ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߊߝߍ߬ ߦߊ߲߬ ߝߊ߬ߟߋ߲߬ߕߍ ߣߌ߲߬ ߞߓߊ߫ ߝߟߐ߫ ߛߌ߮ ߝߍ߬. ߓߌ߬߸ ߊ߲ ߓߘߴߊ߲ ߞߐߛߊ߬ߦߌ߲߬ ߞߣߍ߫ ߞߋߟߋ߲ ߣߌ߲߬ ߞߊ߲߬ ߦߊ߲߬ ߝߣߊ߫߸ ߞߊ߬ ߣߵߊ߬ ߘߟߊߞߊ߬ ߞߵߊ߬ ߓߌ߬ߟߊ߫ ߖߊ߬ߡߊ ߛߊ߬ߥߏ߬ ߘߐ߫߸ ߛߊ߫ ߞߊ߬ ߞߎߟߎ߲ߞߎߟߎ߲ߠߌ߲ ߠߊߣߐ߰ߦߊ߫ ߖߊ߬ߡߊ ߦߋ߫.>>
ߊ߬ ߟߊ߫ ߛߙߊ߬ߣߎ߲ ߘߐ߫߸ ߦߊߦߊ߬ ߛߏ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߊ ߣߌ߲߬ ߕߍ߫ ߖߎ߬ߓߌ߬ߟߊ߬ ߜߊ߲ߛߊ߲߫ ߘߌ߫ ߘߋ߬߸ <<ߊ߬ ߦߋ߫ ߕߐ߰ߡߊ߬ߛߙߋ߬ߓߊ߫ ߟߋ߬ ߘߌ߫߸ ߢߝߍߕߊ߮ ߞߎߟߎ߲ߞߎ߲ ߠߋ߬ ߝߋߎ߫، ߊ߬ ߦߋ߫ ߛߌߡߊ߲ߘߎ߯ ߂߀߄߀ ߢߍߥߟߊ ߟߎ߬ ߘߏ߫ ߟߋ߬ ߘߌ߫.>> ߊ߬ ߞߵߊ߬ ߓߊ߲ߓߊ߲߫ ߊ߬ ߞߊ߲߬ ߝߣߊ߫߸ ߞߏ߫ ߕ߬ߐߣߐ ߘߏ߫ ߟߎ߫ ߦߴߊ߬ ߟߊ߫ ߝߋߎ߫: ߛߌߟߊ ߛߏ߬ߘߏ߲߬ߜߋ߬ߓߐ߸ ߓߐߒߣߘߐ ߟߊߣߐ߰ߦߊ߸ ߊ߬ ߣߌ߫ ߟߊ߬ߞߊ߲߬ߘߊ߬ߟߌ.
ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߦߙߐ ߣߌ߲߬ ߕߐ߯ߟߊ߫ ߟߋ߬ ߞߏ߫ <<ߓߊ߲߬ߓߋߕߏ߬ ߝߊ߬ߟߋ߲߬ߕߍ>>߸ ߞߵߏ߬ ߞߍ߫ ߊߞߛ ߛߋ߰ߘߎ߬ ߝߎߙߋ ߟߎ߬ ߛߌ߲ߞߐ߲ ߘߌ߫، <<ߞߊ߬ ߓߊ߲߬ߓߋߕߏ߬ ߖߊ߬ߡߊ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߞߏߢߌߡߊߟߐ߲߫ ߖߐ ߟߊߥߙߎߞߌ ߘߐ߫߸ ߊ߬ ߣߌ߫ ߞߋ߬ߟߋ߲߬ߧߊ ߣߌ߫ ߓߊߛߌ߯ߟߌ ߘߐ߫ ߖߡߊ߬ߣߊ ߞߣߐ߫، ߞߊ߲ߓߍ߲ ߞߊ߲ߕߌ߮ ߞߵߏ߬ ߟߋ ߡߊߝߟߍ߫߸ ߞߊ߬ ߓߊ߲߬ߓߋߕߏ߬ ߝߊ߬ߟߋ߲߬ߕߍ ߣߌ߲߬ ߘߍ߬ߡߍ߲߬ߘߌ߫ ߊ߬ߟߎ߬ ߟߊ߫ ߝߛߊߦߌ߫ ߛߊ߬ߓߊ߰ߕߐ ߟߎ߬ ߛߌ߲ߞߐ߲ ߘߌ߫.>> ߞߏߕߌ߮ ߟߋ߬ ߞߵߏ߬ ߝߐ߫.
ߓߘߍ߬ߓߘߍ߬ߟߌ ߘߊߝߐ߲ ߠߎ߬ ߕߎߣߎ߲ߓߊߟߌߦߊ ߣߴߊ߬ ߕߊ߫߸ ߞߌ߲߬ߘߊ ߡߐ߱ ߟߎ߬ ߛߍߥߊ߫ ߘߊ߫ ߡߙߌߘߐ ߣߌ߲߬ ߠߊ߫ ߞߏߛߓߍ߫، ߞߏߕߌ߮ ߞߊ߬ ߦߋ߲߬ ߛߌ߰ߓߊ߮ ߟߎ߫ ߝߏ߬ ߊ߬ߟߎ߬ ߟߊ߫ <<<ߓߊ߯ߙߊߢߐ߲߯ߦߊ ߞߏߢߌߡߊ>> ߟߊ߫، ߓߊߏ߬߸ ߓߊ߯ߙߊ ߘߊߡߌ߬ߣߊ߬ ߘߊ߫ ߟߋ߬ ߤߊ߲߯ ߞߵߊ߬ ߓߊ߲߫߸ <<ߔߊߞߌߛߦߊ߫ ߡߊ߫ ߞߍ߫߸ ߓߟߏߝߋ߲߫ ߡߊ߫ ߘߐߕߌߢߍ߫߸ ߛߋ߲߬ߡߊ߬ߕߐߙߐ߲ߜߐ߫ ߞߏ߫ ߜߘߍ߫ ߡߊ߫ ߞߍ߫.>>
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
