ߓߌ߬ ߞߎߣߎ߲ߟߏ߲ ߣߌ߲߬ ߡߊ߬߸ ߂߀߂߅ ߘߓߊ߬ߕߊ ߕߟߋ߬ ߇߸ ߝ߭ߊߕߌߞߊ߲߫ ߓߘߊ߫ ߘߏ߲߬ ߘߌ߯ߣߊߞߏ ߝߊ߲߬ ߞߎߘߊ߫ ߟߋ߬ ߘߐ߫ ߣߌ߲߬߸ ߡߍ߲ ߕߍ߫ ߞߏߣߍ߲߫ ߘߌ߫، ߞߊ߬ߕߎ߲߯߸ ߡߏߙߌ߫ ߜߙߊ ߡߍ߲ ߘߐ߱ߘߏ߲߬ߣߍ߲߫ ߝߓߊ߬ ߞߎߘߊ ߛߎߥߊ߲ߘߌ ߟߊ߫ ߝߊ߬ߓߊ ߟߎ߬ ߟߊ߫ ߢߐ߲߬ߞߌ߲߬ߘߊ ߟߊ߫߸ ߏ߬ ߟߎ߬ ߓߘߴߊ߬ߟߎ߬ ߟߊ߫ ߜߊ߬ߙߊ ߘߊߡߌ߬ߣߊ߬.
ߊߊ߬ߟߎ߬ ߦߙߌߞߊ ߦߋ߫ ߘߌ߯ߣߊ߫ ߞߏ߲ߓߏ߫ ߁߃߃ ߟߋ߬ ߘߌ߫߸ ߡߍ߲ ߠߎ߬ ߛߎߥߊ߲ߘߌߣߍ߲߫ ߝߓߊ߬ ߞߎߘߊ ߢߣߊߕߊ߬ ߞߊ߲ߡߊ߬߸ ߜߎ߲߬ߘߎ߬ ߘߐ߫߸ ߝߊߦߌߘߊ߫ ߞߊߟߌߥߊ߫ ߓߟߏ ߡߊ߬ ߝߛߊߦߌ߫، ߊ߬ߟߎ߬ ߟߊ߫ ߓߏ߲ ߏ߬ ߞߣߐ߫ ߦߋ߲߬߸ ߊ߬ߟߎ߬ ߣߌ߫ ߘߎߢߊ߫ ߡߐ߰ ߜߘߍ߫ ߛߌ߫ ߕߍ߫ ߞߎߡߊ߫ ߟߊ߫ ߞߐߞߊ߲߫ ߡߐ߯ ߘߐ߫߸ ߓߌ߬ߟߊ߬ߢߐ߲߰ߡߊ߬ ߕߴߊ߬ߟߎ߬ ߣߌ߫ ߡߐ߰ ߜߘߍ߫ ߛߌ߫ ߕߍ߫߸ ߤߊ߲߯ ߝߓߊ߬ ߞߎߘߊ ߦߋ߫ ߛߎߥߊ߲ߘߌ߫ ߊ߬ߟߎ߬ ߓߛߟߏ߫ ߕߎ߬ߡߊ ߡߍ߲ ߠߊ߫. ߏ߬ ߡߍ߲ ߓߌ߬ߟߊ߬ߕߐ߫ ߔߊߔ ߝߊ߬ߙߊ߲߬ߛߎߥߊ ߣߐ߭ ߘߐ߫߸ ߏ߬ ߡߍ߲ ߛߊ߬ ߘߴߊ߬ ߛߊ߲߬ ߈߈ ߡߊ߬ ߞߏ߲ߞߏߘߓߌ ߕߋ߬ߟߋ߫ ߂߁.
ߊ߬ ߞߍߢߊ ߘߐ߫߸ ߊ߬ ߛߙߊߕߌ ߟߎ߬ ߦߋ߫ ߞߘߐ߬ߡߊ߲߬ ߞߏ ߟߋ߬ ߘߌ߫߸ ߡߍ߲ ߠߊߕߍ߰ߣߍ߲߫ ߞߊ߬ߦߌ߯ ߛߊ߲߭ ߗߡߍ߬ ߦߙߌߞߊ߫߸ ߞߵߊ߬ ߓߍ߲߬ ߘߌ߯ߣߊ ߕߊ߯ߛߌߟߊ ߡߊ߬߸ ߜߎ߲߬ߘߎ ߘߐ߫، ߟߏ߲ ߓߍ߯߸ ߘߌ߯ߣߊ߫ ߞߏ߲ߓߏ ߟߎ߬ ߦߋ߫ ߢߣߊߕߊߟߌ ߞߍ߫ ߟߊ߫ ߟߋ߬ ߡߊ߲߯ ߛߋ߲߬ߢߊ߬ ߣߊ߯ߣߌ߲߫ ߢߐ߲߰߸ ߤߊ߲߯ ߡߊ߬ߡߌ߬ߘߊ߬ߟߌ߬ߟߊ ߘߏ߫ ߦߋ߫ ߛߓߊߢߐ߲߯ ߝߌ߬ߟߊ߫ ߛߐ߬ߘߐ߲߫ ߕߎ߬ߡߊ ߡߍ߲ ߠߊ߫، ߛߎߥߊ߲ߘߟߌ ߓߊ߯ ߞߍ߫ ߞߏߕߊ߲߫߸ ߛߌ߬ߛߌ߬ ߝߌ߲ ߘߏ߫ ߘߌ߫ ߓߐ߫ ߓߊ߬ߕߏ߬ߘߊ߬ߙߋ߲ ߞߎ߲߬ߕߍ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ ߡߊ߫ ߛߋ߫ ߝߓߖߊ߬ ߞߋߟߋ߲߫ ߠߊߕߍ߰ ߟߊ߫ ߝߟߐ߫، ߣߌ߫ ߛߌ߬ߛߌ߬ ߜߍ ߓߐ߫ ߘߊ߫ ߕߎ߬ߡߊ ߡߍ߲ ߠߊ߫ ߛߊ߫߸ ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߓߍ߲߬ ߓߘߊ߫ ߞߍ߫ ߝߓߊ߬ ߞߋߟߋ߲߫ ߡߊ߬.
ߢߊߢߌߣߌ߲ߠߌ߲ ߠߎ߬ ߓߍ߯ ߞߐ ߘߐ߫ ߊ߲ ߓߟߏ߫߸ ߡߐ߰ ߛߌ߫ ߕߍߣߊ߬ ߛߋ߫ ߟߊ߫ ߞߊ߲߫ ߞߋߟߋ߲߫ ߝߐ߫ ߟߊ߫߸ ߞߏ߫ ߊ߬ ߞߏ ߛߎ߬ߘߎ߬ߡߊ߲߫ ߞߊ߬ߘߌ߬ߛߊ߫ ߟߋ߬ ߟߊ߫߸ ߥߟߴߊ߬ ߛߎ߬ߘߎ߲߬ߡߊ߲߬ ߕߍ߫ ߢߌ߲߬ ߠߊ߫، ߊ߬ ߞߏ߬ߣߌ߲߸ ߊ߬ߟߎ߬ ߟߊ߫ ߡߊ߬ߡߌ߬ߘߊ߬ߟߌ߬ߟߊ ߟߎ߬ ߘߐ߫߸ ߊߡߙߌߞߌ߫ ߟߊߕߌߣ ߦߴߊ߬ ߘߐ߫߸ ߝߣߘߊ߬ߝߌ߲߬ߠߊ߬ ߘߐ߫߸ ߊߛߌ߫ ߦߴߊ߬ ߘߐ߫، ߏ߬ ߘߐ߫߸ ߛߌ߰ ߞߍߣߍ߲߫ ߞߵߊ߬ߟߎ߬ ߟߊ߫ ߓߊ߯ߙߊ ߟߎ߬ ߞߐߝߟߌ ߟߋ߬ ߡߊߞߐ߬ߣߐ߲߬.
ߊ߲ ߞߏ߬ߣߌ߲ ߞߊ߬ ߞߏ߫ ߞߋߟߋ߲߫ ߟߐ߲߫߸ ߂߀߁߃ ߟߊ߫߸ ߘߌ߯ߣߊ߫ ߞߏ߲ߓߏ ߡߍ߲ ߠߎ߬ ߟߊߘߍ߬ ߘߊ߫ ߝߓߊ߬ ߞߎߘߊ ߛߎߥߊ߲ߘߌ߫ ߞߊ߲ߡߊ߬߸ ߏ߬ ߟߎ߫ ߞߊ߬ ߕߋ߬ߟߋ߫ ߝߌ߬ߟߊ߫ ߖߊ߬ߣߍ߲ ߠߋ߬ ߞߍ߫ ߏ߬ ߞߏ ߞߊ߲߬߸ ߤߊ߲߯ ߊ߬ߟߎ߫ ߣߊ߬ ߘߊ߫ ߖ߭ߐߙߗ߭ ߡߊߙߌߦߏ ߓߍߙߑߜ߭ߏߜ߭ߟߌߦߏ߫ ߛߎߥߊ߲ߘߌ߫߸ ߞߵߏ߬ ߞߍ߫ ߔߊߔ ߝߊ߬ߙߊ߲߬ߛߎߥߊ ߘߌ߫ ߛߍߣߍ߲߬ ߛߊ߫، ߐ߲߬ߤߐ߲߫߸ ߢߌ߬ߣߊ߲߬ ߕߊ ߘߌ߫ ߕߊ߬ߡߌ߲߫ ߏ߬ ߞߊ߲߬ ߠߋ߬ ߓߊ߰.
ߏ߬ ߘߐ߫߸ ߊ߲ ߛߌ߰ߣߍ߲߫ ߞߊ߬ ߛߌ߬ߛߌ߬ ߜߍ ߡߊߞߐ߬ߣߐ߲߬߸ ߏ߬ ߡߍ߲ ߞߍߕߐ߫ ߓߍ߯ ߦߟߌߟߊߕߍ߰ ߟߊ߫߸ ߞߊ߬ ߞߣߐ߬ߘߐ߬ߝߟߌ ߓߊ߲߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫
ߒߞߏ ߝߐ߰ߓߍ߬ߦߊ߬ߟߊ ߞߊ߲ߞߊ߲߫
