߂߀߂߅ ߘߓߊ߬ߕߊ ߕߟߋ߬ ߁߁ ߞߍ߫ ߘߊ߫ ߟߏ߲ߓߊ߫ ߟߋ߬ ߘߌ߫ ߖߌ߬ߣߍ߫ ߓߘߍ߬ߓߘߍ߬ߟߌ ߟߊ߬ߡߊ߮ ߟߎ߬ ߘߐ߫، ߓߊߏ߬߸ ߝߊ߬ߛߏ߬ ߞߊ߲ ߛߍ߬ߘߏ߲߬ߠߊ ߟߎ߬ ߝߣߊ߫ ߓߘߊ߫ ߘߏ߲߬ ߘߐ߲߭ ߘߐ߫߸ ߞߊ߬ ߓߘߍ߬ߓߘߍ߬ߟߌ߬ ߕߏ߯ߝߏ߫ ߟߊߥߟߌ߬߸ ߡߍ߲ ߕߐ߯ߟߊߣߴߊ߬ߟߎ߬ ߓߟߏ߫ ߞߏ߫ <<ߖߌ߬ߣߍ߫ ߞߊ߬ߣߎ߲߬ߕߋ߬ߦߊ>>.
ߖߌ߬ߣߍ߫ ߞߊ߬ߣߎ߲߬ߕߋ߬ߦߊ߸ ߝߊ߬ߛߏ߬ ߞߊ߲߬ ߞߏ ߛߍ߬ߘߏ߲߬ߠߊ ߟߎ߬ ߟߊ߫ ߕߏ߰ߝߏ߸ ߏ߬ ߟߎ߫ ߞߊ߬ ߞߘߏ߬ߛߊ߬ ߞߍ߫ ߟߋ߬ ߊ߬ߟߎ߬ ߕߊ ߘߌ߫ ߞߊ߯ߙߌߟߏ߲߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߊߙߌ߲ߠߊ߸ ߊ߬ ߣߌ߫ ߞߡߊ߬ߙߊ ߟߊ߱ߦߌ߬ ߟߊ߫ ߛߏ߸ ߞߘߏ߬ߛߊ߫ ߟߋ߬ ߤߊ߬ߙߌ߬ߖߍ߮ ߞߍ߫ ߘߊ߫ ߓߘߍ߬ߓߘߍ߬ߟߌ߬ ߕߏ߯ߝߏ ߣߌ߲߬ ߠߊ߫ ߟߊ߬ߥߊ߲߬ߞߊ߲߬ߠߌ߲߬ ߜߙߊ ߘߐ߫ ߢߌ߬ߣߊ߲߬.
ߖߊ߬ߡߊ߫ ߝߌ߬ߙߌ߲߬ߞߐ߲߬ߞߐ߲ ߠߋ߬ ߓߐ߫ ߘߊ߫߸ ߞߊ߬ ߛߐ߰ ߛߏߘߐߦߊ߯ߟߊ ߡߊ߬ ߡߎߣߎ߲߬߸ ߞߊ߬ ߕߊ߯ ߘߋ߲ߡߌߛߍ߲߫ ߓߏ߲ߓߊ ߟߊ߫، ߝߐߟߌߟߊ ߟߎ߬ ߡߊ߫ ߕߏ߫ ߞߐ߫ ߕߊ߯ߡߊ ߣߌ߲߬ ߘߐ߫߸ ߘߐ߲߬ߠߊ ߟߎ߬߸ ߡߊ߲߬ߘߋ߲߬ ߟߐ߲ߠߌ߲ߦߊ ߟߊߖߊ߲ߞߏ߫ ߘߊ߫ ߟߋ߬ ߜߊ߬ߙߊ ߣߌ߲߬ ߘߐ߫ ߝߛߊߦߌ߫
ߕߏ߰ߝߏ ߣߌ߲߬ ߛߌ߲ߘߌߓߊ߯ ߛߌ߲ߝߏ߲ ߘߏ߫߸ ߡߊ߲߬ߛߊ߬ ߊߡߙߊ߫ ߘߎ߲ߓߎߦߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߞߊ߬ ߕߏ߰ߝߏ ߣߌ߲߬ ߛߌ߲ߘߌ߫ ߞߎ߲߬ ߘߊ߲ߘߐ߫ ߟߋ߬ ߞߏߛߐ߲߬.
ߛߏ߫ ߛߌߦߊߡߊ߲߫ ߛߐ߬ߘߐ߲߬ ߘߊ߫ ߟߋ߬ ߟߊ߬ߥߊ߲߬ߞߊ߲߬ߠߌ߲߬ ߜߙߊ ߣߌ߲߬ ߘߐ߫: ߓߊߓߌߟߊ߫߸ ߓߊ߲ߝߟߍ߫߸ ߛߌ߬ߛߋ߬ߟߊ߫߸ ߓߟߊߕߏ߫߸ ߝߏߘߋߛߏߙߌߦߊ߫߸ ߛߐߙߐ߲ߞߐߣߌ߲߫߸ ߝߊߘߎ߯߸ ߤߙߍߡߊߞߐߣߐ߲߫߸ ߓߊ߯ߙߏ߫߸ ߞߵߏ߬ ߟߊ߫ ߛߏ߫ ߛߌߦߊߡߊ߲߫ ߜߘߍ߫ ߟߎ߫ ߞߊ߲߬ ߞߘߏ߬ߛߊ߬ ߟߊߡߌߣߌ߲ ߘߐ߫߸ ߞߎߡߊߕߍ߫ ߞߐߣߊߞߙߌ߫ ߣߌ߫ ߞߊ߲ߞߊ߲߫ ߡߊ߬߸ ߏ߬ ߟߎ߬ ߓߍ߯ ߟߋ߬ ߕߍ߬ߘߍ߫ ߕߐ߲߬ߕߐ߲ ߣߌ߲߬ ߘߐ߫.
ߞߘߏ߬ߛߊ߫ ߡߙߊ߬ߓߊ߮ ߞߐߦߌߘߊ ߕߘߍ߬ ߞߣߍ ߞߊ߲߬߸ ߏ߬ ߞߊ߬ ߝߏ߬ߟߌ߬ ߞߙߍߞߙߍߣߍ߲ ߠߊߛߋ߫ ߖߊ߲߬ߖߏ߲ ߛߌ߲߬ߝߏ߲߬ߧߊ߬ߓߊ߮ ߟߎ߫ ߡߊ߬.
ߘߋ߲ߓߊߢߌߡߊ߫ ߕߎ߲߬ߞߙߊ߫ ߡߍ߲ ߦߋ߫ ߖߌ߬ߣߍ߫ ߞߊ߬ߣߎ߲߬ߕߋ߬ߦߊ ߖߡߊ߬ߞߏ ߟߎ߫ ߞߟߊ߬ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߕߏ߰ߝߏ ߟߊߥߊ߲߬ߞߊ߲ ߣߴߊ߬ ߕߊ߫߸ ߊ߬ߟߎ߬ ߛߍߥߊߣߍ߲߫ ߞߵߊ߬ ߞߎ߲߭ ߞߍ߫ ߝߊ߬ߛߏ߬ ߞߊ߲ ߠߎ߬ ߘߊ߲ߞߎ߲ ߠߋ߬ ߘߌ߫ ߛߌ߰ߞߊ߲߬ ߞߎߘߊ ߞߣߐ߫، ߏ߬ ߟߋ ߘߐ߫߸ ߞߏ߫ ߊ߬ߟߎ߬ ߦߋ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߐߡߊߓߌ߲ߓߌ߲߫ ߠߊ߫.
ߖߊ߲߬ߖߏ߲ ߣߌ߲߬ ߞߍ߫ ߘߊ߫ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲߬ ߖߊ߲ߖߏ߲߫ ߠߋ߬ ߘߌ߫߸ ߛߊ߫ ߡߌ߬ߙߌ߲߬ߘߌ ߘߌ߫ ߕߊ߯ ߛߙߍߘߍߦߊߟߌ ߡߊ߬߸ ߞߊ߬ ߛߋ߫ ߞߊ߲ߘߟߌ ߢߣߊߓߊ߯ߦߊ߫ ߟߊ߫، ߣߝߊ߬ߖߌ߫ ߛߏ߬ߙߌ߬ ߞߐ߲ߘߍ߫ ߡߍ߲ ߦߋ߫ ߗߋߕߌ߯ ߛߙߍߞߍ߫ ߝߊ߬ߛߏ߬ߟߊ߬ߞߊ߫ ߘߌ߫߸ ߏ߬ ߞߊ߬ ߘߏ߫ ߝߐ߫ ߏ߬ ߞߏ ߞߊ߲߬.
ߣߌ߲߬ ߞߍ߫ ߘߊ߫ ߖߊ߲߬ߖߏ߲߬ ߘߌߡߊ߲߫ ߠߋ߬ ߘߌ߫߸ ߡߐ߱ ߟߎ߬ ߓߐ߫ ߘߊ߫ ߟߋ߬ ߝߏ߯ ߡߏߙߌߕߊߣߌ߫ ߖߡߊ߬ߣߊ ߞߊ߲߬߸ ߞߊ߬ ߣߊ߬ ߖߊ߲߬ߖߏ߲ ߣߌ߲߬ ߘߐ߫، ߡߊ߲߬ߘߋ߲߬ߞߊ߬ߘߋ߲ ߞߟߊߓߎߡߊ ߕߙߊߥߟߋ߫ ߦߴߏ߬ ߘߏ߫ ߟߋ߬ ߘߌ߫.
ߜߊ߬ߙߊ ߣߌ߲߬ ߞߍ ߞߘߏ߬ߛߊ߫߸ ߕߏ߬ߝߏ ߝߘߏ߬ߓߊ߬ ߞߟߊ߬ߕߌ߮ ߞߊ߬ ߘߏ߫ ߝߐ߫ ߏ߬ ߞߊ߲߬߸ ߡߊ߲߬ߘߋ߲߫ ߖߋ߬ߟߌ߬ߓߊ ߞߎߦߊߕߍ߫
ߡߐ߰ ߛߌߦߊߡߊ߲߫ ߠߎ߫ ߞߎߡߊ߫ ߘߊ߫߸ ߞߵߊ߬ ߓߍ߲߬ ߞߟߌߟߌ ߡߊ߬ ߞߕߘߍ߬ ߞߊ߲ߘߟߌ ߡߊ߬߸ ߏ߬ ߘߏ߲߬ ߕߍ߫ ߞߍ߫ ߣߌ߫ ߛߙߍߘߍߦߊߟߌ ߕߍ߫.
ߡߊ߲߬ߘߋ߲߬ ߟߐ߲ߠߌ߲ߦߊ ߟߎ߬ ߞߍ߫ ߘߊ߫ ߟߋ߬ ߝߍ߬ߘߍ ߘߐ߫ ߜߙߊ߬ ߓߟߋߓߟߋ ߣߌ߲߬ ߘߐ߫߸ ߡߍ߲ ߢߐ߲߰ ߟߐ߲ߠߌ߲ߦߊ߫ ߟߊߖߊ߲ߞߏ߫ ߕߎ߲߬ ߓߘߊ߫ ߝߡߊ߬ ߞߍ߫ ߟߊ߫ ߒߞߏߞߏ ߛߌ߲߬ߝߏ߲߬ߧߊ߬ߟߌ ߟߎ߬ ߘߐ߫، ߘߎ߬ߣߎ߲߬ ߘߐ߲߸ ߛߏߟߌߥߎߟߋ߲߫ ߕߏߟߏ߲߸ ߊ߬ ߣߌ߫ ߘߐ߲߭ ߣߌ߫ ߘߐ߲߬ߞߟߌ ߝߊ߬ߓߏ߲߬ ߛߌߦߊߡߊ߲߫߸ ߏ߬ ߟߎ߬ ߦߋ߫ ߘߊ߫.
ߛߌߟߊߓߐߛߐ߯ߣߊ߫ ߛߘߍ߫ ߘߝߊߣߍ߲ ߠߋ߬ ߕߘߍ߬ ߞߣߍ ߞߊ߲߬:
ߘߐ߬ߝߐ߰ߓߍ߬ߝߐ߰ߓߍ߬ߟߌ ߘߊߞߎ߲ ߘߐ߫: ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ
ߞߊ߲߬ߞߎߡߊ: ߝߊ߲ߕߊ߫ ߞߊߙߌߝߊ߫ ߛߘߌ߬ߓߋ߫
ߖߌ߬ߦߊ߬ߖߟߎ߬ߦߊ߬ߟߌ: ߛߎ߯ߟߊ߲ߘߌ߫ ߛߊ߬ߞߐ߬ ߣߌ߫ ߖߌ߬ߓߙߌߟ ߞߐ߲ߘߍ߫
