ߖߌ߬ߣߍ߬ ߓߍߣߊ߬ ߛߌ߰ߞߊ߲߬ߞߏ ߞߊ߲ߘߟߌ ߘߏ߫ ߛߌ߲߬ߝߏ߲߬ߧߊ߬ ߕߎߟߊߝߌ߲ ߕߋ߬ߟߋ߫ ߂߁ ߣߊ߬ߕߐ ߡߊ߬߸ ߞߵߏ߬ ߞߍ߫ ߊ߬ ߕߊ߫ ߛߋ߲߬ߕߊ߬ ߞߟߏߡߊ߫ ߘߌ߫ ߘߐߕߊ߬ߡߌ߲ ߓߘߍ߬ߓߘߍ߬ߟߌ ߟߊߕߊ߯ߡߢߊ ߘߐ߫. ߞߊ߲ߕߌ߯ߘߊ ߝߘߏ߬ߓߊ߬ ߞߟߊ߬ߕߌ߰ ߞߏߕߌ߮߸ ߞߟߍ߬ߕߌ߮ ߊߡߙߊ߫ ߞߡߊ߬ߙߊ߫ ߟߋ߬ ߞߊ߬ ߟߌ߬ߤߟߊ߬ߦߊ ߣߌ߲߬ ߞߌ߬ߦߊ߫ ߟߊ߬ߕߍ߰ߦߊ ߘߏ߫ ߘߐ߫ ߝߘߏ߬ߓߊ߬ ߖߌߦߊߞߊ߲ ߠߊ߫߸ ߞߐ߬ߟߏ߲ ߥߎ߬ߙߊ ߝߍ߬.
ߞߵߊ߬ ߕߊ߬ ߞߊ߬ߝߏ߬ߖߊߛߏ߲ ߞߍ ߡߊ߬ ߂߀߂߁ ߕߎߟߊߝߌ߲ ߕߟߋ߬ ߅ ߟߊ߫߸ ߞߊ߲ߕߌ߯ ߊߟߌߝߊ߫ ߞߐ߲ߘߍ߫ ߟߊߥߟߏ߫ ߘߊ߫ ߝߊ߲߬ߞߊ ߟߊ߫ ߏ߬ ߡߍ߲ ߛߋ߲߭ߝߍ߬ ߞߊ߬ߣߌ߲߬. ߏ߬ ߟߏ߲߫ ߣߌ߫ ߓߌ߬ ߕߍ߫߸ ߣߌ߫ ߟߊ߬ߤߘߌ߬ߞߊ߲߬ ߡߊ߬ߛߊߦߌ ߕߍ߫ ߝߌ߬ߟߊ߬ ߘߌ߫ ߛߌ߰ߞߊ߲ ߠߊ߫ ߞߏ߫ ߘߐ߫߸ ߘߏ߫ ߓߘߊ߫ ߞߍ߫ ߏ߬ ߘߐ߫ ߞߟߍ߬ߕߌ߮ ߡߊ߬ߡߊߘߌ߫ ߘߎ߲߬ߓߎ߬ߦߊ߬ ߓߟߏ߫.
ߤߊߟߌ߬ ߣߴߊ߬ ߕߘߍ߬ ߘߊ߫ ߞߏ߫ ߊ߬ߟߎ߫ ߞߵߊ߬ ߝߐ߫ ߟߋ߬ ߞߏ߫ ߂߀߂߅ ߟߋ߬ ߣߊ߬ߕߐ߬ ߞߍ߫ ߟߊ߫ ߢߣߊߕߊߟߌ ߛߊ߲߭ ߘߌ߫ ߝߛߊߦߌ߫߸ ߓߊ߬ߙߌ߬ ߕߎ߬ߡߊ߬ ߛߌ߫ ߟߋ߬ ߟߊߕߍ߰ߣߍ߲߬ ߕߴߏ߬ ߞߏ ߟߊ߫߸ ߊ߬ ߝߐ߫ ߟߏ߲߫ ߣߌ߫ ߓߌ߬ ߕߍ. ߘߎߢߊ߫ ߡߌ߬ߙߌ߲߬ߘߌ ߟߊ߫ ߘߐ߬ߜߍ߬ߘߍ߲߬ߠߌ߲ ߞߐ߬ߣߐߡߊ߬߸ ߣߊ߲߬ߕߌ߮ ߢߌ߲߬ ߠߎ߫ ߕߎ߲߬ ߓߘߊ߫ ߟߊ߬ߤߘߌ ߕߊ߬ ߞߊ߲ߘߟߌ ߘߏ߫ ߛߌ߲߬ߝߏ߲߬ߧߊ ߟߊ߫ ߞߊ߬ ߝߊ߲߬ߞߊ ߟߊߕߊ߬ߡߌ߲߬ ߣߊ߲߬ߒߕߊ߲ ߠߎ߫ ߡߊ߬ ߞߊ߬ ߞߐ߲߬ ߂߀߂߄ ߓߊ߲ ߢߍ߫. ߓߊ߬ߙߌ߬ ߏ߬ ߞߏߢߊ ߓߘߊ߫ ߡߕߊߡߣߊ߫ ߢߊ߫ ߡߊ߬߸ ߡߍ߲ ߓߘߊ߫ ߛߌߞߊ ߟߊߘߏ߲߬ ߓߍ߯ ߘߐ߫ ߞߊ߬ ߓߍ߲߬ ߛߌߛߍ߲߬ ߡߙߊ߬ߞߍ߬ߟߊ ߟߎ߬ ߥߢߊ ߡߊ߬.
ߘߌ߲߬ߞߌߙߊ߫ ߢߊ߬ߕߣߐ߬ߡߊ߫ ߘߏ߫ ߦߋ߲߬ ߡߍ߲ ߡߊ߫ ߢߣߊߓߐ߫ ߝߟߐ߫ : ߣߊߟߌ߬ߡߎ߲߫ "ߘߐ߬ߕߊߡߌ߲ ߞߎ߬ߙߎ߲߬ߘߎ" ߘߌ߫ ߸ ߏ߬ ߡߍ߲ ߕߊ߬ߣߍ߲߫ ߞߊ߬ߝߏ߬ߖߊߛߏ߲ ߞߐߝߍ߬߸ ߣߴߊ߬ ߦߋ߫ ߡߊ߬ߡߌ߬ߘߊ߬ߟߌ ߟߊߕߐ߲߫ ߠߊ߫ ߣߊ߲߬ߕߌ߰ߦߊ ߛߌ߲߬ߝߏ߲ ߠߎ߬ ߣߌ߫ ߞߎ߲߬ߠߊ߬ߛߌ߰ ߞߏߟߊߕߍ߮ ߟߎ߫ ߡߊ߬ ߢߣߊߕߊߟߌ ߟߎ߬ ߘߐ߫. ߛߌ߰ߞߊ߲߬ ߞߎߘߊ ߘߏ߲߬ ߛߐ߬ߘߐ߲߬ߠߌ߲ ߘߌ߫ ߛߋ߫ ߞߍ߫ ߟߊ߫ ߛߊߓߎ߫ ߘߌ߫ ߞߊ߬ ߞߍߢߊ ߣߌ߲߬ ߡߊߦߟߍ߬ߡߊ߲߬߸ ߞߊ߬ ߛߌߟߊ ߟߊߞߊ߬ ߣߊ߲߬ߕߌ߰ߦߊ ߘߐ߫ ߡߊ߬ߡߌ߬ߘߊ߬ߟߌ ߦߋ߫ ߞߵߌ ߕߏ߫ ߝߊ߲߬ߞߊ ߟߊ߫.
ߖߡߊ߬ߣߊ ߦߴߊ߬ ߘߐߓߍ߲߭ ߞߊ߲߬ ߢߣߊߕߊߟߌ ߦߋ߫ ߕߎ߬ߡߊ ߡߍ߲߸ ߕߍ߰ߒ߬ߞߊ߲߬ߒ߬ߕߊ߲ߧߊ ߦߴߊ߬ ߘߋ߲߫ ߞߊ߲߬ ߕߋ߲߬ ߠߋ߬ ߓߘߏߓߘߊ߫ ߓߘߍ߬ߓߘߍ߬ߟߌ ߘߊߞߎ߲ ߘߐ߫ ߢߐ߲߯ ߘߐߖߌ߯ߖߌ߮ ߕߊߓߟߏߡߊ߬߸ ߞߊߕߙߍ߬ߕߍ߫ ߝߊ߰ߡߊ ߟߎ߬ ߟߊ߫ ߖߘߍ߬ߘߌ ߜߍߘߐߕߊ (ߟߊ߲߬ߝߏ߲) ߡߊ߬ ߓߍ߯ߦߊ߫ ߡߙߊߞߊ߲ ߠߊߛߊ߬ߦߌ߲ ߘߐ߫.
ߣߊߡߊ߲߬ߖߊ߲߫ ߡߊ߰ߛߎ߬ߓߊ߬ ߓߟߏ߫
silabosoona.com
