ߊ߬ߟߋ ߡߊߕߊ߯ߣߍ߲߫ ߠߋ߬ ߢߣߊߕߊߟߌ ߟߊ߫ ߞߏߟߌ߲ߞߏߟߌ߲ ߂߈ ߣߊ߬ߕߐ ߣߌ߲߬ ߡߊ߬߸ ߝߍߓߊ ߞߙߎߞߊ ߛߌ߲ߘߌߓߊ߮߸ ߗߍ߬ߥߎߟߋ߲߫ ߘߎ߲߬ߓߎ߬ߦߊ߬ ߞߊ߲߫ ߞߏ߫ ߕߋߟߋ߲ߓߊߟߌߦߊ߫ ߓߊ߯ߙߊ ߟߋ߬ ߞߍߣߴߊ߬ ߟߊ߫߸ ߞߏ߫ ߊ߬ ߞߏ߬ߣߌ߲ ߕߴߊ߬ ߟߊ߫ ߛߍ߬ߘߏ߲ ߘߊߓߌ߬ߟߊ߫ ߡߐ߰ ߟߊ߫ ߞߏ߫ ߟߊ߫ ߖߌ߬ߣߍ߬ ߟߊ߫ ߖߘߍ߬ߕߌ߰ߦߊ ߢߊߢߌߣߌ߲ ߘߐ߫ ߞߊ߲߫ ߞߏ ߛߌߟߊ ߝߍ߬߸ ߊ߬ ߣߌ߫ ߛߐ߬ߘߐ߲ ߣߌ߫ ߟߐ߲ߠߌ߲ߦߊ ߡߊ߬ߘߎ߮ ߘߐ߫.
ߗߍ߬ߥߎߟߋ߲߫ ߘߎ߲߬ߓߎ߬ߦߊ߬ ߟߊ߫ ߞߊ߲ߕߌ߯ߦߊ߫ ߞߏ ߓߘߊ߫ ߞߍ߫ ߖߌߜߍ߫ ߟߊ߫ ߛߌߓߏ ߘߌ߫߸ ߘߋ߲ߡߌߛߍ߲ ߞߍ߲ߘߍ߸ ߊ߬ߟߋ ߡߍ߲ ߦߋ߫ ߝߍߓߊ ߞߙߎߞߊ ߞߊ߲ߕߌ߮ ߘߌ߫ ߞߊ߬ߣߌ߲߬.
ߖߌ߬ߣߍ߬ ߞߕߌߖߌ߲ ߛߊ߲ߘߐߕߊ ߣߐ߬ ߢߣߊߕߊߟߌߟߊ ߟߎ߬ ߟߊ߫ ߛߙߍߘߍ߫ ߘߍ߲߬ߞߍ߬ߕߎ߬ߣߍ߲ ߡߍ߲ ߠߊߓߐ߫ ߟߊ߫߸ ߞߵߊ߬ ߓߍ߲߬ ߂߀߂߅ ߞߏߟߌ߲ߞߏߟߌ߲ ߂߈ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ ߡߊ߬߸ ߛߐ߲߬ ߡߊ߫ ߞߍ߫ ߗߍ߬ߥߎߟߋ߲߫ ߘߎ߲߬ߓߎ߬ߦߊ߬ ߟߊ߫ ߡߊ߬ߡߌ߬ߘߊ߬ߟߌ ߘߐ߫߸ ߞߵߏ߬ ߛߊߓߎ ߞߍ߫ ߛߌ߬ߞߛߊߓߌ ߟߊ߫ ߘߐ߯ߦߊ ߘߌ߫ ߞߊ߲ߕߌ߯ߦߊ߫ ߢߌߣߌ߲ ߛߙߊߕߌ ߘߐ߫.
ߒ߬ߓߊ߬߸ ߊ߬ ߟߊ߫ ߝߐߟߌ߫ ߘߐ߫ ߓߌ߬ ߣߍߣߍߓߊ ߕߋ߬ߟߋ߫ ߉ ߣߌ߲߬ ߡߊ߬ ߞߐߣߊߞߙߌ߫ ߞߣߐ߫߸ ߗߍ߬ߥߎߟߋ߲߫ ߘߎ߲߬ߓߎ߬ߦߊ߫ ߞߵߊ߬ ߦߌ߬ߘߊ߫ ߝߐ߰ߓߍ߬ ߜߙߊ ߘߐ߫ ߞߏ߫ ߊ߬ ߓߘߊ߫ ߛߋ߲߬ߓߐ߬ ߝߋߎ߫߸ ߓߊ߬ߙߵߊ߬ ߕߍߣߵߊ߬ ߟߊ߫ ߛߍ߬ߘߏ߲ ߘߊߓߌ߬ߟߊ߬ ߟߊ߫.
<<ߓߊ߲߬ ߓߘߊ߫ ߞߍ߫ ߒ ߠߊ߫ ߡߊ߬ߡߌ߬ߘߊ߬ߟߌ ߘߐ߫ ߝߛߊߦߌ߫߸ ߞߵߊ߬ ߛߊߓߎ߫ ߒ ߛߌ߬ߞߛߊߓߌ ߘߌ߫، ߞߵߊ߬ ߛߐ߬ߘߐ߲߬ ߜߎ߸ ߒ ߞߊ߬ ߞߏ ߓߍ߯ ߟߋ߬ ߘߝߊ߫ ߞߊ߬ ߒ ߠߊ߫ ߘߐ߬ߛߙߋ ߟߊߘߏ߲߬: ߊ߬ߟߎ߬ ߞߊ߫ ߢߌ߲߬߸ ߊ߬ߟߎ߬ ߘߝߊߣߍ߲߫߸ ߒ ߠߊ߫ ߘߊ߲ߘߊߟߌ ߡߊ߬ߝߟߍ߬ߟߌ߬ ߛߓߍ ߓߍ߯ ߦߴߊ߬ ߘߐ߫، ߛߊ߲߬ ߃߅ ߦߋ߫ ߒ ߓߟߏ߫߸ ߞߊ߲ߕߌ߯ ߛߌߦߊߡߊ߲߫ ߠߋ߬ ߝߣߊ߫ ߦߋ߫ ߘߎߢߊ߫ ߞߣߐ߫߸ ߡߍ߲ ߠߎ߬ ߛߋ߫ ߘߊ߫ ߟߊߛߌ߰ ߟߊ߫ ߖߡߊ߬ߣߊ ߞߎ߲߬ߠߊ߫ ߞߵߊ߬ߟߎ߬ ߕߏ߫ ߛߌ߬ߞߛߊ߬ߓߌ߬ ߛߎ߮ ߏ߬ ߘߐ߫.>> ߗߍ߬ߥߎߟߋ߲߫ ߠߋ߬ ߞߊ߲߫ ߕߋ߲߬.
ߘߋ߲ߡߌ߬ߛߍ߲ ߤߊߞߟߌߡߊ߸ ߊ߬ ߣߌ߫ ߝߘߊ߬ߝߌ߲߬ߠߊ߬ߟߊ߲߬ߘߌ ߣߌ߫ ߞߊ߲߫ ߞߏ ߢߊߦߋߓߊ߮߸ ߗߍ߬ߥߎߟߋ߲߫ ߘߎ߲߬ߓߎ߬ߦߊ߬ ߞߊ߲߫ ߞߏ߫ ߊ߬ ߛߊ߲߬ ߦߙߌߞߊ ߟߋ߬ ߕߋ߲߬߸ ߊ߬ ߦߴߊ߬ ߡߙߌ߫ ߟߊ߫ ߢߊ߫ ߛߎ߮ ߣߌ߲߬ ߡߊ߬: ߞߊ߬ ߛߋ߫ ߟߐ߬ߘߎ߰ ߘߌ߫ ߟߊ߫ ߝߊ߬ߛߏ߬ ߞߊ߲ ߠߎ߬ ߡߊ߬ ߞߊ߬ߙߊ߲߬ߕߊ ߟߎ߬ ߟߊ߫߸ ߊ߬ ߣߌ߫ ߖߊ߯ߓߘߊ ߟߎ߬ ߟߊ߫ ߖߡߊ߬ߣߊ ߞߣߐ߫߸ ߞߵߏ߬ ߞߍ߫ ߟߐ߲ߠߌ߲ߦߊ ߖߘߍ߬ߕߌ߰ߦߊ ߕߐ߰ߡߊ߬ߛߙߋ ߘߌ߫.
<<ߊ߲ ߧߴߊ߬ ߝߍ߬ ߟߋ߬߸ ߖߌ߬ߣߍ߬ ߦߋ߫ ߞߍ߫ ߊ߬ ߖߘߍ߬ ߘߌ߫ ߞߊ߲߫ ߞߏ ߛߌߟߊ ߝߍ߬߸ ߛߐ߬ߘߐ߲ ߛߌߟߊ ߝߍ߬߸ ߊ߬ ߣߌ߫ ߟߐ߲ߠߌ߲ߦߊ ߛߌߟߊ ߝߍ߬، ߊ߲ ߞߊ߫ ߞߊ߲߫ ߞߊ߬ ߓߟߏߞߏߟߏ߲ߧߊ ߞߍ߬ߟߍ߫ ߟߋ߬ ߒ߬ ߓߘߊ ߦߊ߲߬߸ ߊ߲ ߛߋߞߏ ߓߍ߯ ߟߊ߫.>>
ߊ߬ ߛߋ߲߬ߓߐ ߣߌ߲߬ ߓߍ߯ ߣߴߊ߬ ߕߊ߫߸ ߝߍߓߊ ߞߊ߲߫ ߞߏ߫ ߊ߬ߟߎ ߡߊ߫ ߗߌߙߏ߲߫ ߘߋ߬ <<ߗߌߙߏ߲ߠߌ߲߫ ߕߍ߫ ߣߌ߲߬ ߘߌ߫ ߡߎ߰ߡߍ߫، ߊ߲ ߞߊ߫ ߞߊ߫ ߞߊ߬ ߘߏ߫ ߟߋ߬ ߟߴߊ߲ ߘߐ߲߬ߛߋ߲ ߞߊ߲߬߸ ߞߊ߬ ߛߋ߫ ߛߌ߰ߝߋ߲ ߘߏ߫ ߛߐ߬ߘߐ߲߬ ߠߊ߫ ߝߊ߬ߛߏ߬ ߜߙߊ ߟߊ߫߸ ߓߊߏ߬ ߛߊ߬ߙߌ߬ߦߊ ߟߎ߬ ߦߋ߫ ߛߎߥߊ߲ߘߌ߫ ߟߊ߫ ߦߋ߲߬ ߠߋ߬، ߝߍߓߊ ߘߏ߲߬ ߘߴߊ߬ ߞߊߘߊ߲߫ ߞߵߊ߬ ߣߌ߭ ߛߐ߬ߘߐ߲߫ ߦߋ߲߬߸ ߞߵߊ߬ ߟߊ߫ ߟߊ߬ߢߌߣߌ߲ ߠߎ߬ ߓߐ߫ ߢߟߊ߫: ߏ߬ ߕߍ߫ ߘߏ߫ ߜߘߍ߫ ߘߌ߫ ߞߊ߲ ߠߎ߬ ߡߐ߬ߟߐ߲߬ߡߊ߬ߦߊ ߞߐ߫߸ ߞߊ߬ ߝߊ߲߬ߞߊ߬ ߘߌ߫ ߊ߲ ߠߊ߫ ߞߊ߲ ߠߎ߬ ߡߊ߬߸ ߊ߬ ߣߌ߫ ߞߊ߬ ߖߌ߬ߣߍ߬ ߟߊ߫ ߛߐ߬ߘߐ߲ ߞߏߢߊ ߟߎ߬ ߢߊߓߐ߫.>>
ߘߋ߲ߡߌߛߍ߲߫ ߥߊ߬ߣߊ߸ ߝߊ߬ ߓߘߊ ߟߊߥߙߎߞߌ ߛߌߟߊ߫ ߛߌߦߊߡߊ߲߫ ߦߋ߫ ߡߍ߲ ߓߟߏ߫߸ ߊ߬ߟߋ ߡߍ߲ ߕߊ߫ ߖߊ߬ߕߋ߬ ߘߐ߫߸ ߞߏ߫ ߛߌߦߊߡߊ߲߫ ߘߌ߫ ߛߋ߫ ߞߍ߫ ߟߴߊ߲ ߖߍ߬ߘߍ ߓߟߏ߫ ߦߊ߲߬߸ ߡߍ߲ ߡߊ߫ ߘߍ߲߫ ߞߐߞߊ߲߫ ߡߐ߯ ߟߊ߫ <<ߛߌ߲ߘߟߌߟߊ߫ ߛߌߦߊߡߊ߲߫ ߠߋ߬ ߖߌ߬ߣߍ߬ ߞߣߐ߫ ߦߊ߲߬، ߊ߲ ߞߊ߫ ߞߊ߲߫ ߞߊ߬ ߖߍ߬ߝߙߍ ߘߴߊ߬ߟߎ߫ ߡߊ߬߸ ߛߴߊ߬ߟߎ߬ ߘߌ߫ ߛߴߊ߲ ߠߊ߫ ߕߙߏ߬ߞߏ ߟߎ߬ ߟߊߘߊ߲߫ ߠߊ߫ ߦߊ߲߬، ߊ߲ ߡߊ߲߫ ߞߊ߲߫ ߞߊ߬ ߝߋ߲߫ ߢߌߣߌ߲߫ ߞߐߞߊ߲߬߸ ߡߍ߲ ߘߌ߫ ߛߋ߫ ߟߊߘߊ߲߫ ߠߴߊ߲ ߠߊ߫ ߘߋ߲ߡߌߛߍ߲ ߠߎ߬ ߓߟߏ߫ ߦߊ߲߬.>>
ߗߍ߬ߥߎߟߋ߲߫ ߘߎ߲߬ߓߎ߬ߦߊ߫ ߘߍ߲߬ߞߣߍ߬ߦߊ߬ߣߴߊ߬ ߡߊ߬ ߡߎߣߎ߲߬߸ ߞߏ߫ ߊ߬ߟߎ߬ ߘߌ߫ ߛߋ߫ ߓߍ߯ ߢߍߕߍ߰ ߟߊ߫߫ ߓߘߍ߬ߓߘߍ߬ߟߌ ߘߐ߫ ߖߌ߬ߣߍ߬ ߞߣߐ߫، <<ߛߋߞߕߎߙߋߦߊ߫ ߞߎߓߋ ߘߌߣߊ߬ ߞߍ߫ ߝߍߓߊ ߕߊ ߘߌ߫ ߥߊ߯ߕߌ߫ ߣߊ߬ߕߐ߫، ߖߡߊ߬ߣߊ߬ߘߋ߲ ߠߎ߬ ߟߊߣߴߊ߲ ߠߊ߫، ߊ߲ ߘߏ߲߬ ߘߴߊ߲ ߛߋߞߏ ߞߍ߫ ߞߊ߬ ߖߌ߬ߣߍ߬ ߟߊߝߙߍ߫߸ ߞߵߊ߬ ߞߏ ߟߎ߬ ߢߊߞߎߘߦߊ߫.>>
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
