߂߀߂߅ ߘߓߊ߬ߕߊ ߕߟߋ߬ ߁߀ ߞߍ߫ ߘߊ߫ ߘߐ߬ߝߐ ߟߊ߫ ߦߟߌߡߊߛߙߋߦߊ ߟߏ߲ߓߊ߫ ߟߋ߬ ߘߌ߫ ߝߐ߬ߓߍ߬ߦߊ߬ߟߌ ߞߊ߬ߘߊ߲ ߞߣߐ߫ ߖߌ߬ߣߍ߬ ߞߣߐ߫، ߓߊߏ߬߸ ߞߏ ߡߍ߲ ߢߐ߲߰ ߡߊ߫ ߘߋ߬ߙߌ߬ ߦߋ߫ ߟߊ߫ ߡߌ߬ߙߌ߲߬ߘߌ ߓߟߏ߫߸ ߞߏ ߡߍ߲ ߢߐ߲߰ ߕߎ߲߬ ߡߊ߫ ߡߍ߲߫ ߡߌ߬ߙߌ߲߬ߘߌ ߓߟߏ߫، ߥߟߊ߫ ߡߐ߰ ߦߟߌ߫ ߕߎ߲߬ ߕߴߛߋ߫ ߟߊ߫ ߡߍ߲ ߡߊ߬ ߖߡߊ߬ߣߊ ߞߣߐ߫߸ ߏ߬ ߟߋ ߞߍ߫ ߘߊ߫، ߘߏ߫ ߜߘߍ߫ ߕߴߏ߬ ߘߌ߫߸ ߝߐ߬ߓߍ߬ߦߊ߬ߟߊ ߘߏ߫ ߟߎ߫ ߟߋ߬ ߣߐ߬ ߊ߬ߟߎ߬ ߟߊߘߍ߬ ߞߙߎ߫ ߞߋߟߋ߲߫ ߘߐ߫߸ ߞߵߊ߬ ߝߐ߫ ߊ߬ߟߎ߫ ߡߊ߬ ߞߏ߫: <<ߛߋ.ߍߣ.ߍߙ.ߘߋ ߟߊ߫ ߞߍߣߍ߲ ߠߎ߬ ߞߐߡߊߓߌ߲ߓߌ߲ ߝߐ߰ߓߍ߬ߦߟߊ߬ ߞߎߛߊ߲ ߠߎ߬ ߟߊ߫ ߢߌ߲߬ߘߍ (ߛߋ.ߖ߭ߌ.ߔߊߞ)>>߸ ߣߴߊ߬ ߘߏ߲߬ߖߟߎ߬ߡߊ߬ߟߌ߬ߟߊ ߦߋ߫ ߛ߭ߍߞ ߡߊ߬ߡߊ߬ߘߌ߬ ߞߐ߲ߘߍ߫ ߘߌ߫.
ߒ߬ߓߊ߬߸ ߞߊ߲ߞߊ߲߫ ߝߊ߰ߡߊ ߟߎ߬ ߣߴߊ߬ ߞߏߟߊߕߍ߮ ߟߎ߬ ߞߟߌ߫ ߘߊ߫ ߛߌ߲߬ߝߏ߲߬ߘߊ߬ ߞߎߘߊ ߏ߬ ߟߋ ߘߊߦߟߍߟߌ߫ ߢߊ߯ߢߊ߮ ߡߊ߬ ߟߍߙߊߓߏ߲߫ ߟߊ߲߱ߛߌ߬ߣߍ߬ ߥߟߌߦߊߡߛ ߟߊ߫߸ ߁߀ߙߋ߲ ߡߊ߬߸ ߞߊ߬ ߕߊ߯ ߊ߬ ߞߏ ߟߊߥߊ߲߬ߞߊ߲߫ ߞߵߊ߬ ߓߌ߬ߟߊ߬ ߓߍ߯ ߕߟߏ߫ ߞߊ߲߬ ߟߊߒߞߣߍߡߦߊߟߌ߫ ߓߟߏ ߡߊ߬.
ߝߐ߬ߓߍ߬ߦߊ߬ߟߊ߫ ߛߌߦߊߡߊ߲߫ ߠߋ߬ ߣߐ߬ ߊ߬ߟߎ߬ ߓߟߏ ߘߌ߫ ߟߊ߫ ߢߐ߲߮ ߡߊ߬߸ ߞߊ߬߬ ߝߘߊ߫ ߞߌ߬ߓߊ߬ߙߏ߬ߘߊ߬ ߛߌߦߊߡߊ߲߫ ߠߊ߫߸ ߞߏ߫ ߊ߬ߟߎ߬ ߦߴߊ߬ ߝߍ߬ ߞߊ߬ ߝߐ߬ߓߍ߬ߦߊ߬ߟߌ ߝߊ߬ߘߌ߬ ߞߎߘߊ߫ ߦߌ߬ߘߊ߫ ߡߌ߬ߙߌ߲߬ߘߌ ߟߊ߫߸ ߣߴߏ߬ ߦߋ߫ ߓߊ߯ ߞߍ ߘߌ߫ ߢߊߟߐ߲ ߞߊ߲߬߸ ߕߎ߬ߢߊ ߞߊ߲߬߸ ߓߏ߲߬ߧߊ ߞߊ߲߬.
ߊ߬ߟߎ߬ ߟߊ߫ ߝߊ߬ߦߊ ߘߌ߫ ߘߊ߫ ߘߎ߲߬ߓߎߦߊ߬ ߞߘߐ߬ߞߍ߫ ߟߋ߬ ߡߊ߬߸ ߟߊ߱ߖߌ߬ ߗߍ߬ߖߊ߲ ߘߎ߲ߓߎߦߊ߫، ߏ߬ ߕߘߍ߬ ߞߣߍ ߞߊ߲߬߸ ߞߵߏ߬ ߟߊ߫ ߞߟߌߣߍ߲߫ ߞߟߊߒߞߋ߫ ߛߌߦߊߡߊ߲߫ ߞߊ߲߬.
ߊ߬ߟߎ߬ ߟߊ߫ ߘߏ߲߬ߖߟߎ߬ߡߊ߬ߟߌ߬ߟߊ ߛ߭ߍߞ ߡߊ߬ߡߊ߬ߘߌ߬ ߞߐ߲ߘߍ߫ ߟߊ߫ ߓߋߟߋ߲ߠߊ ߘߐ߫߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫: <<ߛߟߊߕߌ߮ ߣߌ߫ ߓߐ߬ߟߐ߲߬ߞߊ ߟߎ߬߸ ߓߍ߯ ߟߊߘߍ߬ߣߍ߲ ߖߊ߲߬ ߦߴߊ߬ ߘߐ߫ ߞߏ߫ ߞߊ߬ߦߌ߯ ߂߀߂߁ ߕߎߟߊߝߌ߲ ߕߟߋ߬ ߅ ߡߊ߬߸ ߛߋ.ߍߣ.ߍߙ.ߘߋ ߞߊ߬ ߢߊߞߎߘߦߊߟߌ߫ ߓߟߋߓߟߋߋ ߟߎ߫ ߟߋ߬ ߛߌ߰ ߛߋ߲߬ߠߊ߫߸ ߞߊ߬ ߞߍߢߐ߲߯ߝߍ ߝߊ߲߬ߞߊߘߏ߲߬.... ߞߊ߬ ߖߡߊ߬ߣߊ ߕߋߟߋ߲ߓߊ߯ߦߊ ߢߊߞߎߘߦߊ߫߸ ߞߊ߬ ߦߙߎ߬ߞߎ߬ߦߙߎߞߎ ߞߟߍ߬߸ ߞߊ߬ ߟߐ߬ߟߌ ߝߊ߲߬ߞߊߘߏ߲߬. ߓߊ߬ߙߌ߬߸ ߊ߬ߟߎ߬ ߟߊ߫ ߓߊ߯ߙߓߊ߫ ߞߟߊ߬ߥߟߎ ߏ߬ ߣߴߊ߬ ߕߊ߫߸ ߏ߬ ߟߎ߬ ߟߊߛߋ߫ ߢߊ ߕߍ߫ ߓߍ߲߬ ߠߊ߫߸ ߊ߬ߟߎ߬ ߦߋ߫ ߟߊߛߋ߫ ߟߊ߫ ߢߊ߫ ߟߋ߬ ߡߊ߬ ߡߍ߲ ߠߎ߬ ߕߍ߫ ߛߌߟߊ߫ ߖߐ߲ߖߐ߲߫ ߘߌ߫، ߏ߬ ߟߋ ߞߏߛߐ߲߬߸ ߝߐ߬ߓߍ߬ߦߊ߬ߟߊ ߘߏ߫ ߟߎ߫ ߓߘߴߊ߬ߟߎ߬ ߟߊߘߍ߬߸ ߛߊ߫ ߞߊ߬ ߛߋ߫ ߖߡߊ߬ߣߊ ߡߙߊ߬ߓߊ߮ ߟߎ߬ ߟߊ߫ ߓߊ߯ߙߊ߫ ߓߟߋߓߟߋ߫ ߞߍߣߍ߲ ߠߎ߬ ߟߊߓߐ߫ ߟߊ߫ ߢߟߊ߫. ߏ߬ ߟߋ ߞߏߛߐ߲߬߸ ߊ߬ߟߎ ߣߐ߬ ߊ߬ߟߎ߬ ߟߊߘߍ߬ ߟߊ߫߸ ߞߊ߬ ߛߋ.ߍߣ.ߍߙ.ߘߋ߫ ߟߊ߫ ߞߍߣߍ߲ ߠߎ߬ ߟߊߥߊ߲߬ߞߊ߲߬߸ ߞߊ߬ ߓߊ߲߫ ߞߊ߬ ߖߡߊ߬ߣߊ߬ߘߋ߲ ߠ߬ߎ ߝߣߊ߫ ߞߊ߬ߛߌ߬ ߞߊ߲ ߢߊߝߐ߫߸ ߘߊߘߐߖߊߥߏ ߟߎ߬ ߘߐ߫߸ ߞߊ߲߬ߞߎߡߊ ߟߎ߬ ߘߐ߫߸ ߕߊ߯ߡߊ ߟߎ߬ ߘߐ߫ ߖߡߊ߬ߣߊ ߦߙߐ߫ ߓߐߣߍ߲߫ ߢߐ߲߰ ߡߊ ߟߎ߬ ߞߣߐ߫.>>
ߞߏ߫ ߊ߬ߟߎ߬ ߓߍߣߵߊ߬ߟߎ߬ ߓߊ߲ߓߊ߲߫ ߡߍ߲ ߞߊ߲߬߸ ߡߍ߲ ߞߍߣߍ߲߫߸ ߡߍ߲ ߡߊ߫ ߞߍ߫߸ ߡߍ߲ ߓߍ߲߬ߣߍ߲߫߸ ߡߍ߲ ߡߊ߫ ߓߍ߲߬߸ ߞߏ߫ ߊ߬ߟߎ߬ ߘߌߣߵߏ߬ ߓߍ߯ ߢߊߝߐ߫، ߓߊ߬ߙߌ߬ ߞߏ߫ ߊ߬ߟߎ߬ ߟߊ߫ ߓߊ߯ߙߊ ߟߎ߬ ߞߍߕߐ߫ ߢߊߟߐ߲ ߠߋ߬ ߞߣߐ߫߸ ߡߍ߲ ߣߌ߫ ߡߐߣߍߦߊ߫ ߟߊߓߐ߫ ߕߍ߫ ߞߋߟߋ߲߫ ߘߌ߫، ߓߊߏ߬߸ ߞߏ߫ ߊ߬ߟߎ߬ ߦߴߊ߬ ߝߍ߬ ߞߊ߬ ߝߐ߰ߓߍ߬ߦߊ߬ߟߌ ߞߍߢߊ߫ ߓߘߍ ߟߋ߬ ߦߌ߬ߘߊ߫ ߡߎ߬ߕߎ߲߬، ߞߊ߬ߕߎ߲߯߸ ߞߏ߫ ߝߟߐ߫ ߕߘߍ߬߸ ߣߴߌ ߦߴߊ߬ ߝߍ߬ ߞߵߊ߬ ߞߊ߬ ߞߍ߫ ߝߐ߬ߓߍ߬ߦߟߊ߬ ߓߘߍ ߘߌ߫ ߖߌ߬ߣߍ߬ ߞߣߐ߫߸ ߝߏ߫ ߌ ߦߴߌ ߞߐߘߏ߲߬ ߠߋ߬ ߞߎ߲߬ߠߊ߬ߛߌ߮ ߟߊ߫߸ ߞߊ߬ ߞߍ߫ ߡߐߣߍߦߊ߫ ߟߊߓߐߟߊ ߘߌ߫، ߏ߬ ߟߋ ߘߐ߫߸ ߞߏ߫ ߊ߬ߟߎ߬ ߦߴߊ߬ ߝߍ߬ ߞߊ߬ ߞߏߍߢߊ߫ ߞߘߐ ߏ߬ ߟߋ ߡߊߝߊ߬ߟߋ߲߫ ߡߎ߬ߕߎ߲߬߸ ߖߐ߲߰ߛߊ߫ ߡߌ߬ߙߌ߲߬ߘߌ ߘߴߊ߬ ߟߐ߲߫ ߞߏ߫ ߝߐ߬ߓߍ߬ߦߊ߬ߟߌ ߓߎ߲ߓߎ߲ߣߍ߲߫ ߢߊߟߐ߲ ߠߋ߬ ߡߊ߬.
ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߬ ߡߍ߲ ߦߋ߫ ߞߌ߬ߓߊ߬ߙߏ߬ߦߊ߬ߟߌ ߣߌ߫ ߓߌ߬ߟߊ߬ߢߐ߲߰ߡߊ ߗߋߕߌ߯ ߕߌ߲߬ߞߎ߬ߘߎ߲߬ߠߊ߬ߞߊ ߘߌ߫ ߞߊ߲ߞߊ߲߫ ߞߣߐ߫߸ ߏ߬ ߞߊ߬ ߦߌ߬ߘߴߊ߬ ߟߊ߫ ߓߋߟߋ߲ߠߊ ߘߐ߫ ߞߏ߫ ߘߍ߬ ߞߎߘߊ ߡߍ߲ ߠߊߘߊ߲ߣߍ߲߫ ߣߌ߲߬߸ ߏ߬ ߟߋ ߣߊ߬ߕߐ߫ ߟߊߒߠߦߊ ߟߊߞߎߘߦߊ߫ ߟߊ߫ ߝߐ߰ߓߍ߬ߦߊ߬ߟߊ ߟߎ߬ ߘߐ߫، ߕߍ߰ߒ߬ߛߏ߬ߦߊ ߡߍ߲ ߕߎ߲߬ ߓߘߊ߫ ߖߍ߲ߛߍ߲߫߸ ߞߵߏ߬ ߟߊߕߎߣߎ߲߫ ߞߊ߬ ߣߊ߬ ߟߊߒߠߦߊ ߘߌ߫، ߞߏ߫ ߛߋ.ߖ߭ߌ.ߔߊߞ ߞߊߣߊ߬ ߛߌߟߊ߲߫߸ ߞߏ߫ ߊ߬ߟߎ߬ ߦߋ߫ ߥߦߐ߬ߥߦߐ ߕߏ߫ ߦߋ߲߬߸ ߞߵߊ߬ߟߎ߬ ߟߊߕߋߟߋ߲߫ ߛߏ߬ߗߍ ߞߐ ߘߐ߫، ߞߏ߫ ߊ߬ߟߎ߬ ߦߋ߫ ߖߊ߬ߕߋ߬ߡߌߣߊ ߞߍ߫ ߘߐߙߐ߲߫߸ ߡߍ߲ ߠߎ߬ ߗߋ ߕߘߍ߬ ߘߊ߲ߕߌߢߍߟߌ ߣߌ߫ ߢߊ߲ߞߎߣߊ߲ߦߊ ߘߌ߫߸ ߏ߬ ߟߎ߬ ߦߋ߫ ߘߌ߬ ߓߌ߬؟ ߏ߬ ߘߐ߫߸ ߞߏ߫ ߓߊ߯ߙߊ ߞߍ߫ ߕߎ߬ߢߊ ߢߌߣߌ߲ ߞߊ߲߬߸ ߞߎ߲߬ߠߊ߬ߛߌ߮ ߓߏ߲߬ߧߊ ߞߊ߲߬߸ ߏ߬ ߟߋ ߝߐ߰ߓߍ߬ߦߊ߬ߟߌ ߘߌ߫߸ ߊ߬ ߣߌ߫ ߞߊ߬ ߛߋ߫ ߟߊߒߠߦߊ ߟߊߘߏ߲߬ ߠߊ߫ ߞߎ߲߬ߠߊ߬ߛߌ߮ ߣߌ߫ ߝߐ߰ߓߍ߬ߦߊ߬ߟߊ ߟߎ߬ ߕߍ߫.
ߛ߭ߊߙߟ ߥߑߙߊߦߕ ߡߍ߲ ߞߍ߫ ߘߊ߫ ߖߊ߲߬ߖߏ߲ ߣߌ߲߬ ߝߊ߬ߓߘߍ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߒ ߘߌ߫ ߞߎߡߊ߫ ߞߋߟߋ߲߫ ߝߐ߫ ߊߟߎ߫ ߦߋ߫߸ ߊߟߴߊߟߎ߫ ߖߊ߲߬ߕߏ߫ ߏ߬ ߘߐ߫، ߞߊ߲ߕߌ߮ ߕߍ߫ ߞߎߡߊ߫ ߟߊ߫߸ ߊ߬ ߕߍ߫ ߟߊ߬ߤߘߌ߫ ߕߊ߬ ߟߊ߫߸ ߊ߬ ߘߏ߲߬ ߡߊ߬ߞߏ߬ ߕߍ߫ ߘߐ߬ߖߏ߰ߙߏ߬ߟߌ߬ ߟߊ߫، ߕߙߐߦߊ߫ ߛߐ߬ߘߐ߲߬ߣߍ߲ ߓߍ߯ ߦߋ߫ ߥߟߊ߬ߘߊ߫ ߟߋ߬ ߘߌ߫، ߊߟߎ߫ ߞߊߣߊ߬ ߛߐ߲߬ ߖߎ߯ ߟߊߘߊ߲ ߡߊ߬߸ ߤߊߟߌ߬ ߣߌ߫ ߞߐߣߌ߲ߧߊߓߊ߯ ߞߍ߫ ߘߴߊߟߎ߫ ߟߊ߫، ߊߟߎ߫ ߦߋ߫ ߞߍ߫ ߞߊ߬ߙߊ߲߬ߕߊ ߟߋ߬ ߘߌ߫߸ ߕߐ߭ ߟߎ߬ ߘߴߊ߬ߟߎ߬ ߢߡߊߟߴߊߟߎ߫ ߡߊ߬ ߢߊ ߡߍ߲ ߞߊ߬ ߥߟߊ߬ߘߊ ߕߵߊߟߎ߫ ߡߊ߬، ߣߴߏ߬ ߞߍ߫ ߘߊ߫߸ ߓߍ߯ ߘߌߣߊ߬ ߘߏ߲߬ ߢߌ߲߬ߘߍ ߣߌ߲߬ ߘߐ߫ ߞߋߟߋ߲ߞߋߟߋ߲߫. ߊߟߎ߫ ߦߴߊ߬ ߟߐ߲߫ ߞߏ߫ ߊߟߎ߫ ߓߊ߯ ߞߍ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߝߍ߬߸ ߞߏ߫ ߊ߬ ߕߍߣߊ߬߬ ߥߊߘߌ߫ ߝߘߎߘߎ߫ ߟߴߊߟߎ߫ ߕߍ߫، ߊߟߎ߫ ߘߏ߲߬ ߞߊߣߊ߬ ߞߍ߫ ߊ߬ ߝߍ߬ ߞߵߊ߬ ߝߐ߫ ߞߏ߫ ߊߟߎ߫ ߞߍߕߐ߫ ߊ߬ ߟߊ߫ ߖߋ߬ߟߌ߬ߓߊ ߘߌ߫߸ ߊ߬ ߡߊ߬ߞߏ߬ ߕߴߏ߬ ߟߊ߫ ߤߊ߲߫، ߊ߬ ߡߊ߬ߞߏ ߦߴߊߟߎ߫ ߟߊ߫ ߛߓߍ߬ߡߊ߬ߦߊ ߟߋ߬ ߟߊ߫߸ ߊ߬ ߣߴߊߟߎ߫ ߟߊ߫ ߕߡߌߣߊ߲ߘߌߦߊ.>>
ߖߊ߲߬ߖߏ߲߬ ߘߊߞߎ߲ ߣߌ߲߬ ߘߐ߫߸ ߖߌ߬ߦߊ߬ߖߟߎ ߘߏ߫ ߟߎ߫ ߛߊߙߌ߫ ߘߊ߫ ߘߊ߬ߣߊ߲߬ߥߟߊ ߟߊ߫߸ ߡߍ߲ ߠߎ߬ ߞߊ߬ ߡߐ߱߱ ߟߎ߬ ߢߊߞߘߐߛߋ߫ ߛߋ.ߖ߭ߌ.ߔߊߞ ߟߊ߫ ߞߏ ߘߐ߫ ߝߛߊߦߌ߫، ߓߊߏ߬߸ ߊ߬ߟߎ߫ ߞߊ߬ ߞߊ߲ߞߊ߲߫ ߛߌߟߊ߫ ߓߊ߯ߙߊ ߡߍ߲ ߦߴߌ ߘߐ߫߸ ߊ߬ ߣߌ߫ ߘߎ߬ߣߍ߲ ߡߍ߲ ߠߎ߬ ߦߋ߫ ߡߐ߱ ߟߎ߬ ߞߊ߲ߞߕߐߡߊ߬߸ ߊ߬ߟߎ߫ ߞߊ߬ ߞߊ߲߬ߞߎ߬ߡߊ߬ ߞߟߊߒߞߋ߫ ߞߍ߫ ߏ߬ ߟߎ߫ ߞߊ߲߬. ߊ߬ ߞߏ ߞߏ߬ߣߌ߲ ߞߍ߫ ߘߊ߫ ߥߊ߬ߛߊ ߟߋ߬ ߘߌ߫ ߓߌ߬߸ ߡߍ߲ ߞߎ߲߭ߘߏ߲߬ ߘߊ߫ ߛߍߥߊ ߣߌ߫ ߡߎ߯ߙߌ ߘߐ߫، ߓߊߏ߬߸ ߛ߭ߊߙߟ ߥߑߙߊߦߕ ߞߊ߬ ߞߓߊߞߏ ߘߏ߫ ߟߎ߫ ߝߐ߫ ߖߌ߬ߣߍ߫ ߛߌ߰ߞߊ߲߬ ߞߏ ߘߐ߫ ߞߣߍ ߞߊ߲߬ ߦߋ߲߬߸ ߡߐ߰ ߛߌߦߊߡߊ߲߫ ߕߎ߲߬ ߕߍ߫ ߡߍ߲ ߞߊ߬ߟߊߡߊ߬.
ߒ߬ߓߊ߬ ߓߊߘߋ߲ ߠߎ߬߸ ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߡߐ߰ ߛߌߦߊߡߊ߲߫ ߡߊ߫ ߝߐ߰ߓߍ߬ߦߊ߬ߟߊ ߢߌ߲߬ ߠ߬ߎ ߟߊ߫ ߞߏ ߢߊߦߋ߫، ߊ߬ߟߎ߫ ߞߏ߲߬ߣߌ߲ ߓߘߊ߫ ߟߊߥߊ߲߬ߞߊ߲߬߸ ߊ߬ߟߎ߬ ߓߘߊ߫ ߟߊߘߌ߬ߢߍ߬، ߊ߬ߟߎ߬ ߓߍߣߊ߬ ߞߍߦߙߐ߫ ߓߟߏߡߊߞߊ߬ߣߍ߲ ߘߏ߫ ߛߌ߲ߘߌ߫߸ ߊ߬ ߣߌ߫ ߓߟߐߟߐ߫ ߞߊ߲߫ ߖߌߦߊߞߊ߲ߛߏ ߘߏ߫߸ ߡߍ߲ ߓߍߣߊ߬ ߞߟߌ߫ ߊ߬ߟߎ߬ ߓߟߏ߫ ߞߏ߫ ߙߋߝߐ߲ߘߊߛߌߦߐ߲، ߊ߬ߟߎ߫ ߘߏ߲߬ ߟߊߣߴߊ߬ ߟߊ߫ ߝߣߊ߫߸ ߞߏ߫ ߡߍ߲ ߠߎ߬ ߡߴߊ߬ߟߎ߬ ߢߊߦߋ߫ ߓߌ߬߸ ߏ߬ ߟߎ߬ ߓߍߣߵߊ߬ߟߎ߬ ߢߊߦߋ߫ ߛߌߣߌ߲߫، ߓߊߏ߬߸ ߞߏ߫ ߊ߬ߟߎ߬ ߦߋ߫ ߕߎ߬ߢߊ ߟߋ߬ ߞߊ߲߬߸ ߣߴߏ߬ ߦߋ߫ ߞߏ ߟߎ߬ ߞߍߢߊ߫ ߞߘߐ߫ ߖߎ߯ߡߊ߲ ߡߊߝߊ߬ߟߋ߲ ߘߌ߫ ߞߍߢߊ߫ ߞߎߘߊ߫ ߢߌ߬ߡߊ ߟߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫
ߒߞߏ ߝߐ߰ߓߍ߬ߦߊ߬ߟߊ ߞߊ߲ߞߊ߲߫
